شیرین و خوسرەو/65

From Wikisource
Jump to navigation Jump to search
شیرین و خوسرەو  (1735)  by خانای قوبادی
65. رفتن شیرین به بیستون به دفن کردن فرهاد
بەی تەور کەرد «خانا» ئەی نەقشە بونیاد چە عەشق شیرین پەی فەوت فەرهاد
هەر جەو وەختەدا خۆر مبی ئاوا ئەی بەد هەواڵە بە شیرین یاوا
ئەو شەو خۆ شەو بی تا بە شەبەق زەرد ئەو شۆخ پەی فەرهاد شین و زاری کەرد
سا چون شەو شەق بی بە تێغ ئافتاو هۆرێزا شیرین شەو نەکەردە خاو
چەنی چەند ئەسباب جە حیساب ئەفزوون قەدەم بەرد وە پای سەنگ بێستوون
سا کە دیش فەرهاد دەروون مەوج هوون وێنەی سەرو نەی کەفتەن سەرنیگوون
پیا بی جە ئەسپ ئەو شای دڵنەواز سەرش گرت وە بان زڕانی بە ناز
واتش: غەریبەن، جەرگش کەبابەن بکەرمێش شیوەن خەیلێ سەوابەن
ئافەرین شیرین شۆخ بێ ئەندێش ئەو ڕۆ جە ڕای شەرت ئاداب دانیی وێش
دەستە زوڵف لوول شی کەرد پەی شینش بەناخوون هۆرکەند خاڵ جەمینش
حەڵقەی کەمەندان جە هوون کەردەوە بە ئەسرین سورمەی دیدەش بەردەوە
بەو تەور چون غونچەی چاک وست نە جامەش زاهیر بی نوختەی خاڵ شەمامەش
وستش نە ڕووی خاک عەرەق چین زەڕ جە لالەی نەرگس کەردش دامان پەڕ
کە شیرین فەرهاد ملاوناوە دڵ ئەر جە سەنگ بی متاوناوە
ئەوەند زاری کەرد جە ئەندۆی دەروون خورۆش کەرد نە سەنگ قوللەی بێستوون
نە پای بێستوون یەند ڕێزا سێڵاو گرت گێج مەوجش سەنگ پای پەڕاو
ئاحر ئەو گوڵ بووم گوڵ بۆی گوڵ ئەندام وەختێ بەی دەستوور شینش کەرد تەمام
فەرما بە دەستوور شاهان چینش بە دێبای بۆ موشک کەردن تەکفینش
بە عیززەت نەعشش بە خاک سپەردن فەرماش میعمارێ تەڕ دەست ئاوەردن
عالی گونبەدێ ڕەنگین پەرێ ئەو تەعمیر کەرد خاستەر جە مشکۆی خوسرەو
دەفنش کەرد شیرین بەی تەرز و تەورش هەزرەتی گوڵان نیا نە دەورش
جەودما خێزا بە جەرگ بوریان شی بە قەسر وێش بە دیدەی گریان
ئاخر ئەی هەواڵ یاوا بە خوسرەو فەرهاد کۆکەن جەی دنیا کەچ ڕەو
بە تاراج بریا گەنج سەرمایەش سەی سەنگ ئەڵحەد بی بەسەر سایەش