| مەعلووم بۆ جە لای نازک خەیاڵان
|
سەر حیساب جە ڕەمز ویەردەی ساڵان
|
| ڕاقیم بە ڕەحشەی عەنبەربۆی قەڵەم
|
پەی مەرگ فەرهاد بەی تەور کەرد ڕەقەم
|
| سالار پڕ سام، سانیی ئەسکەندەر
|
خوسرەو جە بەزم، فەرەیدوون ئەفسەر
|
| پەرێ خاس و عام شیرین سوبح و عام
|
نە جوستوجۆ بی «دایم للدام»
|
| بینا بەی سوخەن شەخسێ سوخەن چین
|
عرز کەرد بە جەناب شای دارا نگین
|
| وات: ئەو ڕۆ شیرین شەهزادەی ئەرمەن
|
پەی سەیر سەنعەت فەرهاد کۆکەن
|
| پێکا نە شەو بەند دەستەی تاوس پەڕ
|
شی وە بێستوون چون ستوون زەڕ
|
| نۆشا بادەی ساف ڕەخشانتەر جە دوڕ
|
چەنی ئەو ئوستاد دڵ خەستەی سەنگ بۆ
|
| هەر جەو وەختەوە ئەو ئوستای سەرکەش
|
دەماخش بە دین شیرین بیەن وەش
|
| ها وەختەن بە زەرب قوڵنگەی سەنگی
|
بە تێشەی دەسکار ئوستات فەرەنگی
|
| بکەرۆ ڕێزە ئەو کۆی پۆڵا ڕەنگ
|
چون شیشەی گوڵدار شیرازی بە سەنگ
|
| یە خەیلێ عەیبەن شاهان جەم تەرز
|
ئەگەر بشنەوان جە هەر بووم و مەرز
|
| خوسرەو ئێد شنەفت شی نە جامەی قار
|
تەڵەب کەرد بە جەخت یاران هوشیار
|
| وات: چەنی کۆکەن نە بێستوونەن
|
چ تەور بکەرمێ، تەدبیرش چوونەن؟
|
| ماچان ها وەختەن بە نەیرووی نەبەرد
|
قوللەی بێستوون بکەرۆ بە گەرد
|
| جە باب شیرین شۆخ هام دەردەن
|
من چەنی فەرهاد یەک شەرتێم کەردەن
|
| عەیبەن پەی شاهان خودا پێ دادە
|
هۆرگێڵیان جە شەرت هەم قەرار دادە
|
| عەرز کەردەن یاران: هەر ئێدەن تەدبیر
|
شەخسێ شەیتان شکڵ، بە غایەت شەریر
|
| واچۆ پێش: شیرین بە سەد داخ و دەرد
|
گیان شیرین بە قابیز سپەرد
|
| تا شنەفتەن ئێد ئەر سەد گیان دارۆ
|
بە جارێ هەر سەد دەرلاد مسپارۆ
|
| وەختێ کە فەرهاد بەدکێش پڕ وەی
|
جە سەمت سانیی ئەجەڵ نۆشا مەی
|
| نە بەحر دەروون شا ئەی پەژارە
|
نە عەرسەی دەوران مب ئاوارە
|
| سا کە ئێد شنەفت ئەوب شای دەریا دڵ
|
بە «حسب التَدبير» یاران قابڵ
|
| تەڵەب کەرد شەخسێب فراوان بەد تەور
|
موحیلل ڕا چەفت، حەرەمزادەی دەور
|
| جە شوومیش شەیتان مەلعوون مگورێزا
|
جە حەرفیش ئاهیر فیتنە مخێزا
|
| وەش حاڵشان کەرد بە تەڵا و سیمش
|
بەو تەور کە واتن کەردن تەعلیمش
|
| ئەو شەخس شەریر ڕوو تەش و ڕەنگ و تاڵ
|
شی بە لای فەرهاد تەن خەستەی بەدهاڵ
|
| واتش: ئەرێ هەی نادان غافڵ
|
پەی چێش مویاری عومرت بە باتڵ
|
| پەی چێش مشکاوی ئەی جار و سەنگە
|
گاهێ بە تێشە و گا بە قوڵنگە؟
|
| فەرهاد وات: ئەی شەجسێ نەزان حاڵ دەرد
|
ئەبلەی هەرزەکار، سەگ ڕووی سوخەن سەرد
|
| یە پەرێ شەخسێ من مشکاووم سەنگ
|
نییەن نە دەروون دنیای بەد ئاهەنگ
|
| بە شیرینیی ئەو شێوە شیرینێ
|
شۆجی شا پەسەند زوڵف عەنبەرینێ
|
| موژەش چون خەدەنگ نە چۆی فاقە زەڕ
|
نیشتەن نە پەردەی جەرگم تا وە پەڕ
|
| خەیاڵش زەوقم بە غارەت بەردەن
|
دەوام هیچ نییەن سیوای جە مەردەن
|
| ئێد وات چون خەستەی خاتر تەنگ ناڵا
|
ناڵەش ئەئەر کەرد وە چەرخ باڵا
|
| وەختێ دیش ئەو فەرهاد کۆکەن
|
جە عەشق شیرین زامن جە ئەرمەن
|
| ئاهیر لێش کەفتەن ئەو وێنەی قەقنەس
|
نیم گیانش مەندەن چەنی نیم نەفەس
|
| کێشا ئاهـ سەرد، کەرد داد و بێ داد
|
وات: شیرین خۆ مەرد، نەشنەفتی فەرهاد؟
|
| وەی ڕۆ پەی ئەو شەخس شیرین غەمزە و ناز!
|
پەی ئەو لەب شەکەر شەکەر ڕێزەی ڕاز!
|
| وەی ڕۆ پەی ئەو چەرخ تۆڕ پۆڵا چەنگ!
|
پەی ئەو سپی باز، شۆخ تەڵا ڕەنگ!
|
| وەی ڕۆ پەی ئەو سەوڵ کڵاف سۆسەنی!
|
پەی ئەو شازادەی شۆخ ئەرمەنی!
|
| چەرخ بێ مروەت بێ وادە بەردش
|
خەریک نە سای سەنگ ئەڵحەدا کەردش
|
| مەحرووم بی نە تەخت قەسر زەڕ نیگار
|
نیاشان نە قەبر سیای سەنگ خار
|
| درێغ جە دمای ئەو سیم ئەندامە
|
ئەو زەریف ئەنداز، زوڵف خیاتە خامە
|
| جەی دنیای فانی شووم بەد ئاهەنگ
|
زەڕڕرێی نمەند سەنگ وە بان سەنگ
|
| «خانا» ئەو بەدگۆ جە زوبان لەنگ بۆ
|
جەرگش ڕێزەی ژار تاسەی فەرەنگ بۆ
|
| چون ئاماش نە دڵ، چۆن جورئەت کەردەن
|
واچۆ شەش دانگێ چون شیرین مەردەن؟!
|
| وەختێ کە واتش پەی شیرین درێخ
|
درێغ بووڕیات زوانش جە بێخ
|
| ئاخر ڤە ئەو شەخس شووم بەد نیهاد
|
تا شنەفت ئەی حەرف بێچارە فەرهاد
|
| پارە کەرد دەرسات سەرتاپا بەرگش
|
دوور باش چمان کەفت تیر نە ڕووی جەرگش
|
| جەو شاخ بڵند سەنگ بێستوون
|
بی بە گوڵۆڵە و ئاما سەر نیگوون
|
| کەفت وە پای شکاف تێشە تاش وێش
|
چێش ئاما وەسەر نمەز واچوو چێش
|
| کێشا بەو دەستوور ئاهێ نە دەروون
|
لەرزا جە هەیبەت نۆ تاق گەردوون
|
| وات: ئەرێ ئەی شەخس جە زوان لەنگ بای!
|
تەن خەستەی شمشێر تەرسای فەرەنگ بای!
|
| هەر دوو پات وە باد ئیستیسقا ڕەق بۆ
|
فەرقت چوج شامی وە شمشێر شەق بۆ
|
| مەودای میل سەرد نەدیدەت خار بۆ
|
سەرتاپات بە دەرد فەتار فەتار بۆ
|
| شەریر بی شەرم، شووم بەد ئالەت
|
تف بە ڕەنگ و ڕووت، جینست، بنەماڵەت
|
| هەرگیز نەنیشی وە بێ ئاهـ سەرد
|
چۆن ئامانت دڵ ماچی شیرین مەرد؟
|
| ئێد وات وخێزا بە غەزەب فەرهاد
|
هەڵمەتدا هۆرگرت قوڵنگەی فۆلاد
|
| بە یەک زەربەتێ فرقش شکاوا
|
ڕێزەش بە ئاسان هەفتەمین یاوا
|
| وەختێ کە فەرهاد بەرگەشتەی ڕووی دەور
|
واسیل کەرد ئەو شەخس بە دۆزەخ بە تەور
|
| ئەمجار وات: ئاخ ڕەنج لافا بەردەم ڕۆ!
|
فەڵەک دانەی خاس تاراج کەردەم ڕۆ!
|
| شیرین شەش دانگ شای ئەرمەنیم ڕۆ!
|
کەچیی بەخت شووم، نامەدەنیم ڕۆ!
|
| جە پا کەفتەی سەیل، سەوڵ باخم ڕۆ!
|
شای تاج و تۆمار، بەرز دەماحم ڕۆ!
|
| سالار سوپای مەهوەشانم ڕۆ!
|
باش باڵا دەست چاو ڕەشانم ڕۆ!
|
| وەی وەی پەرێ وێم بێ ئەجەل مەردم!
|
بە بێ سوود بەرشی ڕەنجێ کە بەردم!
|
| ئیسە جە دمای ئەو سۆسەن خاڵە
|
ئەو ڕێزەی ڕاز قەند، شۆخ نەوهاڵە
|
| زیندەگی پووچەن، زقیچ بەتاڵەن
|
شیرینیی شەربەت دنیایچ خۆ تاڵەن
|
| ئێد وات و کێشا نە دڵ ئاهـ سەرد
|
سوجدەش بەرد نە خاک دەرلاد گیان سپەرد
|
| ئافەرین هەی چەرخ نەڕڕاد کەچ گەرد
|
فەرهادیچت ها خۆ سەرنیگوون کەرد
|
| بەڵێ کۆ وە پووش بێ پۆی کوهەن ساڵ
|
گوستاخیەن لێت مپەرسوو ئەحواڵ
|
| کێت نەکەرد وێنەی فەرهاد دێرین
|
جە عەشق ڕازان شیرین دەم شیرین؟
|
| ئاخر پێت نەچەشت تەڵخیی بادەی مەوت
|
نەکەردت نە دەور دنیا فەناو فەوت؟
|
| کام بی جە شەهان نە عەرسەی کیشوەر
|
زاڵم، بە شایان نەکەردت ئەو بەر؟
|
| کام جە مەحبووبان جە قاف تا بە قاف
|
نەوستت نە گۆڕ، بەدڕای بێ ئینساف؟
|
| مارێ نەپێچای نە گێسووشەو
|
بە دەستەی زوڵفان عەنبەر بۆ شەوە؟
|
| سا کێن چون فەرهاد، حەق دۆ شکستت
|
فەرهاد نییەن ڕوی نە دەستت؟
|
| دنیا نەکەری لێش بە ژار مار؟
|
نامەحرووم نەبی ئەو جە وەسڵ یار؟
|
| موینی هەرکەس بە سەد عیزز و ناز
|
خاستەر جە شاهان سکەندەر ئەنداز
|
| بە فەڕڕ و ئیقباڵ نادیاردیت کەرد
|
جە و دما مدیەی شەلاخ کاریت کەرد
|
| عەجەت شەرت و شۆن خاس تان و پۆتەن
|
نالەت بە دادەت! فرێ بەد خووتەن
|
| یاران هەر شەخسێ نە ڕووی سەرزەمین
|
بکەرۆ حیساب وێش نە ئەهل دین
|
| ئەو شاد بە دادەی چەرخ چەپگەرد بۆ
|
نەمەرد بۆ، نامەرد، سەدجار نامەرد بۆ!
|
| بە میسقەبەی فیکر ئەر موو شکاوی
|
مەناز بە دەوڵەت دادەی سەماوی
|
| پەی چێش؟ بێ شۆنەن هەی نەفم شێت
|
دەوڵەت ئەر مدۆ، مستانۆوە چێت
|
| چون بەی دەستوورەن چەرخ ستەمگەر
|
بە ڕەویەی دۆستیش هەرگیز شاد مەوەر
|
| پەی چێش؟ کە مارەن، دۆستی چەنی مار
|
هیچکەس نەکەردن نە ڕووی ڕۆزگار
|
| چونکە بەی تەورەن ئەی چەرخ بەدتەور
|
خۆش بە زات ئەو کەس نە ڕووی عەسەی دەور
|
| ئەر بوورەشان پێش هەر نەستانۆ ئەو
|
شاهیی هەفت ئیقلیم دنیا بە نیم جەو
|
| جە ئیستیغنای عەشق بکەرۆ داخش
|
نەزانۆ وجوود بەرز دەماخش
|
