شیرین و خوسرەو/49
Jump to navigation
Jump to search
| ←48 | شیرین و خوسرەو (1735) by 49. رسیدن خبر فوت شدن بهرام چوبین به خسرو |
50→ |
| موستەوفیی دیوان دەفتەرخانەی عەشق | پەرێ بزورگان بەی تەور دا سەرمەشق |
| ڕوێ کە بلوور سوبح سیمابی | بی بە شوڵەی خۆر خیتمی و عەننابی |
| گەردوون شورووع کەرد بە دڵنەوازی | هۆرگێڵا دیسان جە نەیرەنگسازی |
| زەمانە ئەیمەن جە غوغا و فەریاد | سەرزەمین ساکن جە زوڵم بێداد |
| بە فاڵ فەڕروخ، بە پیرایەی نەو | خوسرەو جەو دەمدا وێنەی کەیخوسرەو |
| یاقووت قوببەی خەرگاش چون خورشید | مدرەخشا نە فەرق بەرجیس و ناهید |
| جە پای پێشگای شاهیش قەدرێ دوور | مدرابێ قەیسەر، شای هیند و فەغفوور |
| کیشوەر خودایان گەردوون ئیقتیدار | هەر یەک نە جایێ گرتەبێن قەرار |
| خاسەی غوڵامان دانەی دوڕ نە گۆش | گرانبەهای هیند، دێبای سمۆر پۆش |
| قۆچاخان بەور تاج و کەمەر لاڵ | چون ئەنجوم نە دەور بەدر مای زوڵاڵ |
| مدرابێن نە دەور ئەو شای دەریا کەف | پەی فەرمانبەری و بەندەگی سەف سەف |
| کەسێ جەو یاران بە ڕۆ تا بە شەو | جە سام سەنگیی پادشاهیی ئەو |
| بێ ڕوخسەت حەرفێ نە ڕووی ئەنجومەن | نماوەرد نە زەبت سیلسیلەی سوخەن |
| نیشتەبێ خوسرەو بە دەماخ بەرز | منۆشا بادەی ئەرغەوانی تەرز |
| زومرەی ئەهل بەزم چون نەقش دیوار | بێ داوا و بێ دەنگ، خامۆش جە گوفتار |
| ناگا جەو دەمدا پەرێی «فتح الباب» | پەیدا بی پەیکێ نادیرەی نایاب |
| بۆسا پای سەریر شای دارا نگین | وات تۆ سڵامەت بەهرام چۆبین |
| بە جای تەخت عاج جە شوومیی بەختش | تەختەی چۆبین بی ئیمشەو بە تەختش |
| جەی خەبەر خوسرەو شای کەمەر لاڵان | غەرق بی نە گێجاو بەحر خەیاڵان |
| وات هەی پیرە چەرخ چەواشەی چەپگەرد | کێت نە چای ئەڵحەد سەرنیگوون نەکەرد |
| نمەز بە کێت دا ڕوتبەی سەروەری | نە یانەت نەوەست ئاخر چەمەری |
| بدیە ئەی نامەرد مەردوم فرێوەن | خائین بەد تەور خانەدان شێوەن |
| منەت مبەردش نە ڕووی سەرزەمین | بە چۆبەک زەنی بەهرام چۆبین |
| دەمێ بازووش کەرد بە دەوڵەت قەوی | نیا نە فەرقش تاج خوسرەوی |
| ئاخر کەردش حەک نامەی حەیاتش | تاج سەڵتەنەت وست بە میراتش |
| ئیسە ئەو چۆبین شێر ئەفگەن بە ناز | چۆپان ئاسات کەرد نە دنیا پەرواز |
| هەرکەس فامدارەن عەقڵ و فام پێشەن | پێش نەبۆ بادی، وادەی چەرخ چێشەن؟ |
| ئەر شان، ئەر خوندکار فەڕڕوخ تەبارەن | جاش هەر قەبر تەنگ زوڵمات تارەن |
| تا ئێسە بەگرام چۆبین پڕ زات | وێنەی ئەسکەندەر نە ڕووی سەربیسات |
| دەعوای تاج و تەخت جیهانداریش بی | تەمەننای مەنسەب شەهریاریش بی |
| ئیسە سایەی سەنگ ئەڵحەد ماواشەن | چەنی کرم و مار جەنگ و داواشەن |
| کۆن ئەو بەرق تێغ سوپای بێ ڕامش | ملەرزا نە بەحر نەهەنگ جە سامش |
| کۆن ئەو زات و زۆر تەهەمتەن تەورش | کۆن ئەو دانای خاس نادیرەی دەورش |
| کەسێ نەواچۆ گەردوون نامەرد | هەرچەنی بەهرام بێ مۆلەتیش کەرد |
| دەها چەند هەزار شاهان جەم تەخت | کەیخوسرەو سەویر، بەرارندەی تەخت |
| پەست کەرد نە زەمین بەرز پایەشان | سای سەنگ ئەڵحەد بی بەسایەشان |
| جە عەرسەی ئەی دەور پڕ جە دەردسەر | نەبی جە بەهرام نمەک شناستەر |
| نیهایەت بە حەرف بەعزێ ناپەسەند | تەماع کەرد نە موڵک ئێمەی دەردمەند |
| نەفاماش غوڵام چەنی خواجەی وێش | خەیلێ بەدیومنەن ببۆ بەدئەندێش |
| چون جە حەدد وێش ئەو پا ویارا | سا بی سامانش جە خاک سارا |
| ئینسان ئەو خاسەن کەچ شوعوور نەبۆ | بە زۆر بازووی وێش مەغروور نەبۆ |
| پا نەنیۆ وە بەر ئەو جە حەدد ویش | نەوا چون بەهرام چۆبین بەیۆ پێش |
| هەرکەس جە غوروور تورک و تازی کەرد | چەنی بزورگان پەنجەبازی کەرد |
| بە زۆر بازووی شێران جەنگی | بە نەیرووی نەبەرد سوپای سام سەنگی |
| ئاخر جون بەهرام چۆبین بەدکێش | شکست فاحیش موێنۆ بە وێش |
| هەرکەس جە ئەزەڵ ساحێب کەماڵەن | سەرچەشمەی سەراو زەینش زوڵاڵەن |
| ئەر مدان پەنەش شاهیی ئەسکەندەر | پا جە حەدد وێش نمەنیۆ وە بەر |