شیرین و خوسرەو/48

From Wikisource
Jump to navigation Jump to search
شیرین و خوسرەو  (1735)  by خانای قوبادی
48. نشستن شیرین بر تخت شاهی و رفتن به مدائن بعد از یک سال
چون بانوو بە موڵک عەدەم بی ڕاهی شیرین نیشت بە شاد بە تەخت شاهی
ویلایەت مەعموور بە عەدڵ و داد کەرد بەندیان جە بەند تەمام ئازاد کەرد
عەجەزەی مەساکین موسەڵمان تا گەروو جە فەڕر سایەش ئەیمەن بین جە جەور
جە گەرمیی ئافتاو عەدڵ و ئینسافش جە بەرق شمشێر خارا شکافش
گورگ و مێش جە عەدڵ ئەو جەمین چون شەم سیغەی ئیخوانی وەندشان بە هەم
بە شاهیش مەردوم بەو تەور بین خورسەند بە عەدڵ و دادش موەردن سەوگەند
سەنگ دڵەی سەخت زاڵمان شووم نەرم بی جە قورس ئوستورلاب مۆم
زەراعەت جە نوور ئەو زوڵف بۆ عەنبەر یەک بە سەد مکەرد، بەڵکە زیاتەر
ئافەرین شیرین، عەدڵ و داد شیرین سەرکێش ڕەندان زوڵف بۆ عەبیرین
چەنی سایەو سام شاهان پەسەندت ڕەویەی بزورگی و ئەتوار ڕەندت
بەلێ جە «خانا»ی عەتارید خامە مونشیی وەسف زوڵف عەنبەر شەمامە
بە سەمع شەریف بنشەو حیکایەت ئەر قەسدش خێزەن والیی ویلایەت
بە جای گوڵ زەمین ماوەرۆ گەوهەر سەنگ مبۆ بە لاڵ، خاکش بە عەنبەر
ئەر والی بێ عەدڵ، شەرارەت پیشەن بەد جینس، بەدکار، دوور جە ئەندێشەن
وڵگەی مەملەکەت کەی مەعموور مبۆ ئەیمەنی و ڕاحەت جە خەڵق دوور مبۆ
«القصه» شیرین بە وەسف شاهی بە ئەلقاب وەسف حیشمەت پەناهی
جە دووری خوسرەو گران بی دەردش مویەرد جە گەردوون هەناسەی سەردش
مۆزا چون شەمع دایم جە عەشقش هەر سەودای خەیاڵ ئەو بی سەرمەشقش
جە نەرگس ئەو شۆخ باڵا زەڕ ستوون مکەرد تەختەی تەخت شاهیی وێش گوڵگون
زەوق تاج و تەخت مەحفووز یاقووت جە داخ خوسرەو لێش بی ژەقنەمووت
ئاخر کە شەخسێ ئاوەردش خەبەر پەروێز لاڵ پۆش پاکیزە گەوهەر
بە دەست قەیسەر شاهەنشای جەم کێش باز نیشتەن وە تەخت پادشاهیی وێش
مەریەم کە ئیجاز عیسا مبێزۆ شەکەر جە ڕێزەی ڕازش مڕێزۆ
ئەو شای جەم نگین چون دانەی گەوهەر ئاوەردەن بە عەقد ئەو دارا ئەفسەر
مەریەم پەرێ وێش ئەو کەیخوسرەو بەخت بە عیسا مەریەم دان سەوگەند سەخت
نە عەرسەی دەوران تا زیندەن خوسرەو بەرنەشۆ جە ئەمر هومایوون ئەو
شیرین ئید شنەفت دەروونش ئێشا بێ دەماخیی سەخت جە خوسرەو کێشا
جەی باسە نەمەند زەڕڕێ تاقەت پێش ئاشفتەتەر بی ئەو جە زوڵف وێش
بەڵێ لاعیلاج ئەو جە داخ و دەرد یا یەک ساڵ تەمام پادشاهی کەرد
جە دمای یەک ساڵ توغیان کەرد دەردش سەودا چون دووی توند تەماکۆ بەردش
ئەیر هیجران خوسرەو لاڵ پۆش مەغز تاقەتش هەم ئاوەرد بە جۆش
ئەوسا کە گۆ سەند دڵەی کۆس کەفتەش قرچەی سەختیی وەست نە جەرگ سفتەش
چارش هەر ئێد بی بە دەوان دەو بشۆ وە پای تەخت خوسرەویی خوسرەو
سپەرد بە شەخسێ ئەو شای مەینەت کێش گەنج و تاج و تەخت پادشاهیی وێش
خێزا بە جەختێ باڵا زەڕ ستوون نیشت چون دەستەی گوڵ نە پشت گوڵگوون
شاپوور نەقشبەند نادیرەی نایاب هۆرکێشا بە جەڵد چون شاتر جۆراب
چەنی چەند کەنیز تاج و کەمەر زەڕ سوار بی بە ڕەخش پەڕەندەی بێ پەڕ
شەکەر لەب فەرماش کەردش سوپاهی چەند گەنج و گەوهەر ئەسباب شاهی
تەمام بە گەنجوور سەرکار سپەردش خەرامان لوا بە تەعجیل بەردش
قەترە دا چەند ڕۆ سەوڵ بێ ئەندێش تا یاوا بە قەسر قەدیم یاگەی وێش
شەخسێ چون نەسیم بە دەوان دەو یاونا بە سەمع شەریف خوسرەو
شیرین شەم شەوق زوڵف بۆ عەبیرین قەسر وێش کەردن هەم جە نوو شیرین
جە شادی فەرقش بە فەرقدا یاوا شکۆفەی سۆسەن شادیش شکاوا
بەڵا ئەو جەم قەدر فەرخوندە ئەختەر جە خۆف مەریەم کناچەی قەیسەر
چونکە ئەو دابێش جەی وەرتەر سەوگەند نامەرد نەیاراش هیچ بگنۆش نەوەند
ئەمما جە هیجران ئەو سیمین عوزرا بە شەو تا بە ڕۆ پێج مدا چون مار
نیهایەت شیرین شەکەر ڕاز ڕەند گا بە پەیغامێ مکەردش خورسەند