شیرین و خوسرەو/37

by خانای قوبادی

←36

شیرین و خوسرەو  (1735)  by خانای قوبادی 37. پاسخ دادن شیرین خسرو را

38→

تووتیی شەکەرڕێز، ڕاز وێنەی شەکەر	بەی تەور دا جەواب شای فەڕروخ ئەختەر
وات هەی کەیخوسرەو کەیان جەم جۆ	سەد شیرین چون من بە سەرگەردت بۆ
بە وێت مزانی بەور بەهمەن سام	بە کێش شاهان جەم قەدر جەم جام
موناسب نیەن هەر پەرستارێ	ببۆ بە هامڕاز یەک شەهریارێ
ڕاستەن کە زوڵفم بۆ عەبیرینەن	زەڕرێ جە لای تۆ زەڕەم شیرینەن
بەڵێ من چەندان نە ڕووی عەرسەی دەور	قابیل نیم کە شای بەهمەن تەرز و تەور
پەی وجوود من جە زەڕرە کەمتەر	بکێشۆ بەی تەور ئەوەند دەردسەر
من کێم کە چەنی خوسرەوێ چون تۆ	ببوون بە هامڕاز بە شەو تا بە ڕۆ
بە گیانت قەسەم شای دارا نگین	هەر تا کە زیندەم نە ڕووی سەرزەمین
من کەمتەر کەنیز پەرستار تۆم	من ئافتاوەدار، خزمەتکار تۆم
من سەقای مەدبەخ بۆعەبیر تۆم	جە شام یا شیراز هەر ئەسیر تۆم
من هەر جاڕووکێش کێشکخانەی تۆم	من ئاوپاش خاک ئاستانەی تۆم
من کامم خوسرەو، وجوودم چیشەن ؟	پەی چێش یەند پەی من خاترت ڕێشەن؟
قەزات لە گیانم شای دارا ئەفسەر	وەسەن، سا وەس وێت بدەر دەردسەر
ئەگەر شا مەیلش بە شیرەی قەندەن	ڕاستەن شیرەی قەند خاتر پەسەندەن
بەڵێ بە بێ وەخت دانای خیرەدمەند	نوقسانەن نۆشان شەهد شیرەی قەند
ئەر چەندێ هەنیچ شای دارا بەیداخ	بکەرۆ سەبرێ نەبۆ بێ دەماخ
جە شیرەی قەندم هەر شەو تا بە ڕۆ	بنۆشۆ شەربەت نۆش گیانش بۆ
وەرنە بە بێ وەخت شای زینەت ئارا	شیرینی بەی تەور نیەن گووارا
بەڵا مکەرووم ئیستیدعا ئیمشەو	بدەرۆم مۆڵەت شەهەنشا ئیمشەو
مەیل کەرۆ بە جام جورعەی مەی ئیمشەو	بویەرۆ بە لوتف جە تەقسیر ئیمشەو
مەیل کەرۆ بە جام جورعەی مەی ئیمشەو	گۆش دەرۆ بە نەخش ساز نەی ئیمشەو
نەکێشۆ سەودای وەسواسەم ئیمشەو	کەم تاقەت نەبۆ جە تاسەم ئیمشەو
شیرین جە خوسرەو بە زار ملاڵا	خوسرەو پەی شیرین چەن نە مناڵا
کافر مگرەوا بەو ڕەستاخێزە	بەو داوای شیرین، لاڵای پەروێزە
مەنزوور شیرین شازادەی پەری	ئێد بی جەی گشت پاس، جەی گشت داوەری
حیفز دانەی لاڵ جە ئەڵماس مکەرد	عەرز وێش جە فیعل قەبیح پاس مکەرد
پەی چێش؟ کە بانووی بەرارندەی تەخت	دابێش جەی وەرتەر سەد سەوگەند سەخت
مەبادا خوسرەو سفتەن جە داخش	تەسەڕڕوف کەرۆ گوڵ باغچەی باخش
مەعلووم بۆ جە لای یەک ڕەنگان عەشق	ئاشفتەی هیجران قەیس مەینەت مەشق
هەرچەند بە زوان ئەو شەمع پڕ نوور	جەواب خوسرەو مدا بەی دەستوور
بەڵێ دەروونش مگڕیا بە تاو	ماماش وە چەمدا ئەسرین چون سێڵاو
بەی تەور کە مدیش شا بە بێ دەماخ	پەیاپەی پەیوەست هەر مکێشا ئاخ
هەرچەند ئەو ئاهووی زوڵف و خاڵ میشکین	موست نە ئەبرۆش بە غەزەب سەد چین
جە لاڵای خوسرەو دەردش بی کاری	موارا بە چەم ئەسر مرواری
بە دەم بەی دەستوور بە لەنجە و لارە	جواب خوسرەو مدا بەی تارە
ئەمما جە سەودای ئەو دارای لاڵ پۆش	پووک وێش مگرت، جەرگش مدا جۆش
گریشمەش جە حەرف شا حاشا مکەرد	نیم نیگاش بە ناز تەماشا مکەرد
هەر لێش بە دوزدی غەمزەی غەزەب جۆش	مدا دەلالەت ئیشارەی ئەبرۆش
ئاخر کە بەرشی ئەو بووم پەڕەی گوڵ	بە ئەمر خوسرەو، ئەمما نەک بە دڵ
خوسرەو سا کە دیش حوققەی بازیی ئەو	هیچ نیەن نە ڕای چارەسازیی ئەو
کێشاش نە دەروون بەو تەور ئاهـ سەرد	هەروەخت بی گەردوون بکەرۆ بە گەرد