شیرین و خوسرەو/36

From Wikisource
Jump to navigation Jump to search
شیرین و خوسرەو  (1735)  by خانای قوبادی
36. مقالات خسرو با شیرین در خیمه و طلب وصال نمودن و جواب شیرین
گوڵچین گوڵزار ئەی باخچەی ڕەنگین بەی تەور بەست دەستەی ڕێحان میشکین
شەوێ جە شەوان وەشبۆی وەهاری هەواش مدا بۆی میشک تاتاری
قورس مانگ جە چەرخ سەوز پڕ ئەختەر مدرەوشا خاستەر جە شەمس خاوەر
ئەی شەو خەرگای خاس خوسرەو بە تاقی مبەخشا زینەت بەهەشت باقی
جە عەکس ڕوخسار ساقیی سیم ئەندام جە ڕەشحەی شەراب ساقیی زەڕرین جام
جە سەودای شیرین وەنەوشە خاڵان جە لەنجەی ڕەندان نازک نەوهاڵان
غونچەی خاتران چون گوڵ مشکاوا دڵ ئەر سەنگ مبی چون قەند متاوا
سەمەن بۆ سەوڵان دانەی دوڕ نە گۆش عەنبەرین زوڵفان دێبای زەڕبافت پۆش
چون زوهرەی ڕەققاس چەنی چەنگ و دەف نیشتەبێن نە دەور خەرگەی شا بە سەف
شەمایل چەنی شەمامە نەسیم مکەردن تەفسیر مەنتووقەی قەدیم
چون هەر شەو شاناز شادی مژەندن تەسنیفات شیعر شیرین موەندن
سا وەختێ جە جام بادە بین سەرمەست جە ڕەقس و جە ساز کۆتا کەردن دەست
جە هوجووم جام بە بێ پەروایێ مەستانە کەفتن هەر یەک نە جایێ
ئاخر ئەو خەرگەی شۆخ عەبیرین هەر مەند بە وجوود خوسرەو و شیرین
خوسرەو جەو دەمدا جە سەودای شیرین جە عەشق شێوەی ئەو زوڵف عەنبەرین
زەڕڕە جە دڵدا ئارامش نەمەند چون چاشنەی بارووت مواتت گڕ سەند
ئارەزووی باڵاش جە سەر بەرد فامش جە تاقەت بی تاق، بڕیا ئارامش
بێ پەروا خێزا ئەو شای جەم شکوو گرت دەستەی زوڵفش بە سەد ئارەزوو
چون دەستەی نەرگس جە نەو شکاوا بۆ نیا نە بۆش هەرتا کە تاوا
وات ئۆخەی شیرین بڕیا ئاواتم هەنی تا زیندەم گیان بە فیداتم
بەڵێ فیدات بام لەیل لەب شەکەر بۆ جە دەرحەقم نامەردی مەکەر
خۆ لێت مەعلوومەن من جە نەوەی کێم سا چێش بی پەی تۆ بەی تەور ئاما پێم
ئەر ساحێب شەرتی شیرین وێڵ تۆم بەی تەور موینی ئارا گێل تۆم
شێت و شەیدای عەشق شۆخی و ڕەندیی تۆم وێنەی موقەسسیر شاهان بەندیی تۆم
بێ دەماخ جە زام قەوس ئەبرۆی تۆم غارەت بوردەی خاڵ شۆخ شەڕ جۆی تۆم
چون بەی تەور سفتەی داخ عەشق تۆم مەینەتیی دڵ ڕێش مەینەی مەشق تۆم
سا بیم بە نەزرت زوڵفان عەنبەربۆ ئیمشەو کەس نیەن غەیر جە من و تۆ
با پەشتانت بوون یەک ساتێ ئیمشەو پێم دەر جە گەنجت زەکاتێ ئیمشەو
چون جە سەودای تۆ تۆ غەم بە گۆم ئیمشەو مەگەر جە لای وێت ڕەنجەڕۆم ئیمشەو
جەرگم جە داخت کەبابەن ئیمشەو دەردم دەواکەر ئەوابەن ئیمشەو
بە سەرگەردت بام سەوڵ سیم ئەندام پەی بەژن باڵات عومرم بی تەمام