شیرین و خوسرەو/16
Jump to navigation
Jump to search
| ←15 | شیرین و خوسرەو (1735) by 16. ناپیدا شدن شیرین و خبر آوردن جهت مهین بانو |
17→ |
| وەختێ ڕۆ جە عەکس شەو گێڵا جە ڕەنگ | یاران چون غونچەی گوڵ بە خاتر |
| تا یاوان بە قەسر بانووی جیهانگیر | چون تۆفان سەخت سەیل زەمهەریر |
| شین فراوان ڕەستاخێز کەردن | زاری پەی شیرین، پەی شەبدێز کەردن |
| بانووی مەریەم قەدر نادیرەی ئەییام | جەی شیرین و زاری تەمام بی سەرسام |
| ئاخر جە یاران زوڵف بۆ عەنبەرین | بە تاڵی شنەفت ئەحواڵ شیرین |
| هەردوو پەنجەی وێش دا وە جەمێندا | جام میناش مەڕد داس وە زەمیندا |
| بە ناخوون هۆرکەند چەنی نەوهاڵان | جە قورس جەمین فیرۆزەی خاڵان |
| بڕیشان جە بیخ گێسووی عەنبەرین | شی کەردن زوڵفان پەی شین شیرین |
| چون گوڵ عوریان بین نە جامەی گوڵ ڕەنگ | داشان بە سەردا بووڵ و پارە سەنگ |
| ئەو ڕۆ ڕەستاخێز پەی شیرین کریا | فرێ زوڵف و خاڵ بە غارەت دریا |
| بانوو پەی ئەو شۆخ عەنبەرچە دارا | بە جای نیم تەنەی زەڕبافت خارا |
| جە ئەندۆی دەروون خەستەی خاتر خار | پۆشا بە قامەت سەر کەللەی دەوار |
| مەگرەوا و موات ئەی نوور دیدەم | فەرزەند عەزیز دڵ پەسەندیدەم |
| یە پەی چێش وەی تەور ئەی زۆرە کەردی | پەی چێش ڕەنجابی ئەی تۆرەی کەردی |
| ئیسە وە بێ تۆ زامم ناسۆرەن | دنیا لێم تاڵەن، بینایم کۆرەن |
| ئەر من جە دەمای چون تۆ نەو خێزێ | شۆخ شیرین خاڵ زوڵف عەنبەر بێزێ |
| بپێکوون بە شاد تۆمار شاهی | غەرق بۆ دەوڵەتم تا گاهـ و ماهی |
| ئاخر واچە پێم گیانم فدێت بۆ | سەرم بە سەرگەرد ئەی ماوا و جێت بۆ |
| یە کام کافر بی بەی تەور جە ڕات بەرد | یەکێ بی ئازیز شێت و شەیدات کەرد |
| یە کام حەریف بی تۆش فریو نا | یانەی من جە داخ دووریت شێو نا |
| ئەو شەو بەی دەستوور تا بە شەبەق زەرد | ئەو پەرێ شیرین شین و زاری کەرد |
| چون جە شۆڵەی وێش خورشید ئەنوار | کەردش سەزەمین نارنجی و گوڵنار |
| خاس و عام شەهر تەمام بین خەمین | جەم بین نە پای تەخت بانووی جەم نگین |
| دەمێ شین کەردن بە جای شیریندا | بەو جای فەرەح بەخش بۆ عەنبەریندا |
| بانوو وات جە نەو ئەی شیرینم ڕۆ | پەریزادەی شۆخ عەنبەرینم ڕۆ |
| شاباز شەش دانگ ساحێب زەنگم ڕۆ | مەحبووب بێ عەیب شۆخ و شەنگم ڕۆ |
| نامەدەنیی کار، کەچیی بەختم ڕۆ | قەڵوەزەی زوخاو زام سەختم ڕۆ |
| دانەی قیمەتیی تاراج بەردەم ڕۆ | میوەی گوڵ باخچەی لێ نەوەردەم ڕۆ |
| لاوێز سەنگیی بێ سامانم ڕۆ | ڕۆڵەی نازەنین نەوجەوانم ڕۆ |
| لادێ بەی دەستوور ڕەستاخێز کەردش | یاوا وە پای عەرش هەناسەی سەردش |
| جەو دەما ئەو شۆخ ستەم ڕەسیدە | وات بە هەمدەمان دڵ پەسەندیدە |
| دیم بە خاو جەی وەر بە سەد داخ و دەرد | بازێ جە دەستم باد هۆرگرت و بەرد |
| چونکە من جەی خاو فرێ متەرسام | تەعبیرەش هەرگیز جە کەس نەپەرسام |
| ئیسە مەعلووم بی ئەو باد شەودێزەن | ئەو بازە شیرین ڕاز شەکەر ڕێزەن |
| جە پەی لواشان فائیدەش نیەن | ئەر خاسەن، ئەر کەست ها جە دەست شیەن |
| ئێد کە شنەفتن جە بانوو یاران | واراشان نە چەم ئەسرین چون باران |
| بە دیدەی نمناک خاتر پەرێشان | هۆرێزان لوان بە یانەی وێشان |