| چون عەکس توراب ئەو دنیای فەرتووت
|
ڕەوشەن کەرد خورشید چون دانە و یاقووت
|
| شۆڵەی ئافتاب وێنەی مەودای تێخ
|
سیلسیلەی گێسووی شەو بۆی جە بێخ
|
| بێدار بین جە خواب پۆل مەیخواران
|
کەمەر وە پێڵان عەنبەرچە داران
|
| کەردشان بە پا سەیوان گوڵ دۆز
|
نە سەرای بۆی میشک دەیر پەری سۆز
|
| سارا، کام سارا؟ چون ڕەوزەی بەهەشت
|
زێبندەی نیشات شایستەی گوڵ گەشت
|
| نەغمەی بوڵبوڵش نە پای چەتر گوڵ
|
مویەرد نە کەیوان چەرخ دوور مەنزڵ
|
| گوڵ باخچەی ڕەندش چون گوڵزار توور
|
نە پای کۆساران مدرەوشا جە دوور
|
| چەشمەش چون چەشمەی ڕەحیق کەوسەر
|
مبێزا شێوەی شیرینی و شەکەر
|
| نازداران جە شەوق ئەو زێبا مەقام
|
ئەو نیشاتگەی خاس خەجستە فەرجام
|
| گا ساز بزورگ شەهناز مژەندن
|
گا تەسنیف، گا شعر تەحسین موەندن
|
| مەشغووڵ بین بە سەرف بادەی شیرازی
|
پەی وێشان بە شاد مکەردن بازی
|
| باز شاپوور هەم نەخش شیرین کەرد ئاغاز
|
مەخفی جە یاران ساحێب غەمزە و ناز
|
| ئاوێزانش کەرد بە تووڵ نەیدا
|
تا پێش بۆ شیرین هەم شێت و شەیدا
|
| ناگا هەم شیرین شۆخ شیرین ڕەنگ
|
چەرخ دوو چەم چون چەم شۆخ پۆڵاد چەنگ
|
| دیش هەم ئەو سوورەت ئاڵای بۆ عەنبەر
|
مدرەوشا چون شەوق ستارەی سەحەر
|
| هۆرێزا بە جەخت هیچ نەکەرد ئەندێش
|
خەرامان چون سەوڵ ئاوەردش وە پێش
|
| جە سەوداش ئەو شۆخ ڕشتەی ئیلاهی
|
ڕەنگ گوڵناریش گێڵیا بە کاهی
|
| کارێ پێش ئاما شیرین ئەرمەن
|
وەخت بی گیانش بێزار بۆ جە تەن
|
| بە سەد دڵ عاشق گرفتارش بی
|
نە ساتێ ئارام، نە قەرارەش بی
|
| مبۆساش پەیوەست، مماڵا نە چەم
|
مگریا جە تاو چون شەرارەی شەم
|
| بێزار بی نە جام بادەی گوڵناری
|
بە خەدەنگ عەشق دەردش بی کاری
|
| حوسنش چون شوعلەی خورشید مبێزا
|
چون تەجەلی توور نوور لێش مخێزا
|
| دەرسات جە هیجران گێڵیا جە ڕەنگ
|
جە گفتوگۆ کەفت، زوبانش بی لەنگ
|
| قەترە بەست ئەسرین بە ڕوخسارشدا
|
بە قورس ڕوخسار پڕ ئەنوارشدا
|
| زومرەی خاڵ خاسان جەمین مایەی نوور
|
ساو کێشان جە لای شیرین بەی دەستوور
|
| واتشان یە کار سەرسەری نیەن
|
مەکر جادووی دێو یا پەری نیەن
|
| نیشتن نە دەورش زوڵف خیاتەی خاوان
|
ئەنای ئەو سوورەت کەردن فراوان
|
| واتشان نیەن ئەی کارە بازی
|
ئەگەر نەکەرمێ یە چارە سازی
|
| دوور بۆ شیرین شەش دانگ شایی
|
مکێشۆ ئاخر سەر بە ڕیسوایی
|
| با جا بگێڵمێ سارا و کۆ پەیوەست
|
بەڵگە ئەحواڵێ بگنۆمان جە دەست
|
| عاقبەت چەند کەس دڵسۆز جە یاران
|
گرتن گوزەرگای گشت ڕاویاران
|
| شایەد بزانان بە بێ کودوورەت
|
شەممەیێ جە شەرح بەیا ئەو سوورەت
|
| چەندێ کێشاشان ئەوان دەردسەر
|
نەدیشان هیچکەس «ديار البشر»
|
| بە ئەدەب سوجدەی پای تەختش بەردن
|
بە موقەڕەبان دەرگاش عەرز کەردن
|
| واتن هەی شیرین شۆخ لەب شەکەر
|
پەی کەشف ئەی نەخش دلارای دڵبەر
|
| فراوان گێڵام سارا و کۆ پەیوەست
|
هەرچەند کە کەردیم کەس نەکەفت ئەو دەست
|
| سەهی سەر و قامەت لێشان بی مەمنوون
|
واتش هەی یاران باڵا زەڕ ستوون
|
| ئارۆ بە شادیی ئەی سوورەت بەندە
|
ئەی فەرخوندە نەخش خاتر پەسەندە
|
| بنۆشیم بادەی ئەرغەوانی ڕەنگ
|
گۆش دەرێم وە ساز نەغمەی عوود و چەنگ
|
| بە «حسب الفرمان» جەناب شیرین
|
ساقیان شۆخ زوڵف بۆ عەنبەرین
|
| بە پێڵدا توڕەی میشکین کەردن پەخش
|
پڕ کەردن جە مەی پیاڵەی پڕ نەخش
|
| شەکەر لەب هەر جام مەی کە موەردش
|
سوجدەی ئەو سوورەت جارێ مکەردش
|
| خەم بی قامەتش چون نەخل نەوخیز
|
جە هجووم باد فەسڵ خەزان ڕێز
|
| ئاهش وێنەی دوود ناگیرەی سەقەر
|
ڕاگەی کەهکشان گەردن گەت نە وەر
|
| باخچەی ڕوخسارش بە زەردی کەرد مەیل
|
چون وەڵگ وەزان ڕشتەی نەو سوەیل
|
| ئاخر جەودما دەر ساعەت شاپوور
|
بە دەلیل عەقڵ دەریافت کەرد جە دوور
|
| زانا کە شیرین بڕیا قەرارەش
|
یاوا وە سەرحەد جنوونی کارش
|
| هورێزا وە پا فەرخوندە شاپوور
|
وێش بەو قەتاران منمانا جە دوور
|
| شیرین دیش شاپوور مەحفووز بی جە زەوق
|
فەرماش بە یاران قورس قەمەر شەوق
|
| ئەحواڵ ئەی نەقش ئاڵای زەر نیگار
|
بکەردی تەعجیل جەو شەخس ئیستیفار
|
| شایەد بزانۆ جە لاش بۆ عەیان
|
ڕەمزێ جەی سوورەت بکەرۆ بەیان
|
| جەمعێ پەرستار دانای پڕ شعوور
|
پەی کەشف ئەحواڵ شین وە لای شاپوور
|
| پەرێش سەرانسەر شیرینتەر جە قەند
|
کەردشان تەقریر شەرح سوورەت بەند
|
| شاپوور دا جواب ئەو خاس خەیاڵان
|
ئەو جەمین جامان وەنەوشە خاڵان
|
| وات یە دووڕێوەن سفتەنی نیەن
|
وەگەر هەن پەی کەس گوفتەنی نیەن
|
| شەخسێ هۆرێزا ئەی گوفتەی شاپوور
|
عەرز کەرد بە شیرین جەمین شوعلەی نوور
|
| شیرین ئێد شنەفت خێزا هەم بە وێش
|
گیسوو چون حەڵقەی کەمەند کەرد بە کێش
|
| جە شەققەی خرخاڵ، زڕەی پاوانەش
|
جە خشەی ساچاخ، شنۆی لەرزانش
|
| خرۆش کەفت نە دەشت دەیر پەری سۆز
|
نە ڕەوزەی گوڵان وەش بۆی دڵ فرۆز
|
| وێنەی سپی سەوڵ شۆخ خەرامان
|
شی وە لای شاپوور بێ سەر و سامان
|
| بازوو هەم جە تار بلوور ڕەخشان
|
مەیگوون لەب چون لەعل دانەی بەدەخشان
|
| بە شوعلەی شەهاب ئاهـ سەردەوە
|
نیقاب جە ڕووی قورس ڕوخسار دڕدەوە
|
| شەمع ڕوخسارش سا چون کوورەی نوور
|
ساتیع بی چون شەوق تەجەللای کۆی توور
|
| چەم چون چەرخ تەور تەواو چارە ڕەش
|
موژان چون خەدەنگ پەڕ دار تەرکەش
|
| بە شەوکەت شکۆی شەهریاریش بی
|
بە هەیبەت شێوەی جیهانداریش بی
|
| شاپوور دیش شیرین بەو ڕەنگ بە دروست
|
سوجدەش بەرد دەرلاد وێنە بت پەرەست
|
| ئاخر شەکەر لەب بە سەد غەمزە و ناز
|
واتش بە شاپوور دانای فسوون ساز
|
| چمان دیارەن نادیرەی دەوری
|
مەرد دانشمەند ئەرستوو تەوری
|
| عەرز کەرد بێ خیلاف جە کۆن مەقامت
|
ئەسڵت چ کەسن، تۆ چێشەن نامت
|
| ئەر ڕاست مواچی دانای بێ نەزیر
|
بێ شائیبەی کیزب، بە خودا و بە پیر
|
| جە گەنج و ئەسباب، جە خارا و ئەتڵەس
|
یەند پێت مبەخشۆ تا بواچی بەس
|
| چون ئەو نەیرەنگ ساز، سامیری بێزە
|
شنەفت ئەی هەواڵ جەو شەکەر ڕێزە
|
| خەیلێ بە ئەدەب شاپوور سوجدەش بەرد
|
مەدحش بە زوبان فەسیح ئەدا کەرد
|
| واتش ئەی شاباڵ شاهزادەی ئەرمەن
|
تووتیی خۆش تەقریر، تەبەرزەد شکەن
|
| ئەی بەندە مەردێ کار ئازموودەن
|
بە پای دانایی جیهان پەیموودەن
|
| تەییم کەرد جون باد سوبخێز سەحەر
|
خرابە و مەعموور عەرسەی هەفت کیشوەر
|
| جە هەر سەرزەمین جە مەهـ تا ماهی
|
ئاگام بە تەوفیق زات ئیلاهی
|
| شیرین ئێد شنەفت جەو دڵ پەسەندە
|
واتش ماچی چێش جەی سوورەت بەندە
|
| واتش هەی سوڵتان ئەقلیم خووبی
|
هەی خۆر ڕەخشان بورج مەحبووبی
|
| قسەی ئەی سوورەت دوور و درازەن
|
وێنەی زوڵف تۆ شیرین ئەندازەن
|
| هەروەختێ خەرگای شای سیمین عوزرا
|
خاڵی بی جە خەوف وجوود ئەغیار
|
| ئەڵبەت جە پای تەخت فەرخوندە سەریر
|
ڕەمزێ جەی سوورەت مکەروون تەقریر
|
| بە حەرف شاپوور نەقشبەند ئاڵا
|
شیرین شەم شەوق زەڕ ستوون باڵا
|
| عەقد و پەروین تەور یاران هام دەرد
|
چون«بنات النعش» پەڕاگندە کەرد
|
| دیش مەیدان خاڵی ئەو نادیرەی دەور
|
وستش نە مەیدان گۆی سوخەن بەی تەور
|
