شیرین و خوسرەو/11
Jump to navigation
Jump to search
| ←10 | شیرین و خوسرەو (1735) by 11. کشیدن شاپور صورت را نوبت دوم |
12→ |
| چون جە شوڵەی نوور خورشید گوڵ ڕەنگ | درەخشان چون لاڵ جە سەرکاوان سەنگ |
| شاپوور نەقاش هەم کێشا بە دەو | تیمسال شیرین دڵڕۆبای خوسرەو |
| ئاوێزانش کەرد دیسان بە جەختێ | نە سەر شاخ سەوز بەرزە درەختێ |
| یاران شیرین بێدار بین جە خاو | نم داشان دەستەی زوڵفان بە گوڵاو |
| نیشتن بە سەد عەیش چون کەیان کەی | بە ڕەغبەت کەردن مەیل جام مەی |
| سەرمەست بین جە جام بادەی شیرازی | باز کەردن شروع بە چۆپی بازی |
| دڵ حەیران مبی جە ئەندازشان | شەکەر مبێزا ڕێزەی ڕازشان |
| تووتیی شەکەرڕێز شای شەکەر شێوە | شیرین شەش دانگ زوڵف لوول لێوە |
| جە گەردش عەین ئاهووی خوتەن بێز | دیش هەم ئەو سوورەت کریان سەراوێز |
| هەر وەخت بی جە باخ بەدەن بە بێ ناز | تاوس ڕۆحش بکەرۆ پەرواز |
| دیسان شیرین دی ئەو سوورەت بەندە | ئەو تەسویر شۆخ شیرین و ڕەندە |
| وات بە خاڵ خاسان یە چ فەندێوەن | یە چ سیحر سەخت سوورەت بەندێوەن |
| شەش دانگ شۆخی، زوڵف بۆ عەنبەرین | خێزا ئەو سوورەت بێ عەیب شیرین |
| نە دیدەی شیرین ساحێب تاج و تەخت | بە سەد حیلە و مەکر پەنهان کەرد بە جەخت |
| ئاما و عەرزش کەرد ئەو نەمام نۆ | واتش فیدات بام شای فریشتە خۆ |
| ئەو سوورەت بەندە دەسکار دێوەن | خرابەن، سیحرەن، ئنسان فرێوەن |
| هەرکەس بوینۆش مبۆ دێوانە | بەدتەر جە مەجنوون ڕیسوای زەمانە |
| شیرین ئێد شنەفت هەم گاڵ دا بە دەو | خەیمەی خوسرەوی بار کەردن بە شەو |
| چون ئاهووی میشکین پەروەردەی خوتەن | ڕووش کەرد نە سارای شیرین ئەرمەن |
| شەو چۆگە چەنی یاران دڵبەر | نۆشا بادەی مەی تا بە سوب سەحەر |