| پەی ڕجا و لاڵە تەمامیی یاران
|
لاڵان بەدەرگای پادشای سوبحان
|
| واتن یا کەریم خالێق دانا
|
سوڵتان ئیبراهیم بەیۆ بەئەی جا
|
| بەو تەنتەنەی وێش دێو سوارەوە
|
بەو تاج تەڵا بەو تۆمارەوە
|
| شێر پڕ هونەر تێکدەری سپا
|
نازاران نەبان زەلیل نەی جا
|
| وات حەمید ئەتۆ چەنی نازاران
|
بشۆ بە ئەو کۆ قەرار بگیران
|
| هەر ئەو شەو حەمید نازاران بەردش
|
نەکۆی غار سەخت جا بە جا کەردش
|
| ماهـ زەڕئەفشان هەم نۆش ئافەرین
|
چەنی کەنیزان نیشتن بە غەمگین
|
| خان محەمەد واتش ئەی تیرئەندازان
|
ببۆن پاسبان شەکەرین ڕازان
|
| چەندێ سەنگ و خاک دەردەم کۆ کەردن
|
هجووم پەی ئەی کۆ نازاران بەردن
|
| وات حەمید مەلاح هەرتا گیان داری
|
جەنگ سەروماڵ ئەسیران کەری
|
| تا من ڕوو کەرووم نە سپای خوونخوار
|
ئەگەر خوداوەند وەنەم ببۆ یار
|
| یا ئارۆ سپا ماوەرووم نەبێخ
|
یا سەرم مەکەن بە ئەڵماس تێخ
|
| هەر وەقت کوژیام نەمەیدان کار
|
سەر نیام نەڕای شازادەی سالار
|
| هەر وەقت شازادە ئاما وە ئەی جا
|
قەسەمت مەدۆم بەزات ئەڵڵا
|
| بواچە خان محەمەد دیدەش نەرات بێ
|
ئینتیزار بەگەرد، خاشاک پات بێ
|
| ئێد وات هۆرێزا بە دڵەی بریان
|
هیمەت خواهی کەرد ئەو نەرووی گریان
|
| نازاران واتن خودات بۆ هامڕا
|
تۆمان دا بە دەست یەکتای بێ هەمتا
|
| جە کۆهات بەوار ڕوو کەرد نە سپا
|
واتش ئەی مەسعوود شووم ڕووسیا
|
| بەیۆن بە مەیدان یەکایەک تەنیا
|
تا سەرش نەقەلب بکەرووم جیا
|
| واتش ئیبراهیم فێرارش کەردەن
|
ئیسە تۆ ئامان ئەجەل ئاوەردەن
|
| شای نۆش ئافەرین ماهـ زەڕئەفشان
|
تۆ بدەر وە من وێت بوەر ڕەوان
|
| تۆ خەلعەت خاس ئەز من بستانە
|
ڕوو بەراگەی چین پەی وێت بنمانە
|
| بەرشی جە حەرفم بەتێغ ئابدار
|
جە کاسەی سەرت بەرماروو دەمار
|
| خان محەمەد واتش مەلعوون موردار
|
ئومێدم بەستەن بەدانای جەبار
|
| تارۆحم مەندەن هەم گیان شیرین
|
سەر مەنیۆم نەڕای شای نۆش ئافەرین
|
| ها وەختەن بەیۆ شازادەی سالار
|
سپای پەری و دێو «ماوەر» بەی دیار
|
| ئەتۆ بە وێنەی ئەلیاس پادشا
|
مەکێشووت بەدام شووم ڕووسیا
|
| مەسعوود ئێد شنەفت کێشا تیغ تێز
|
واتش خان محەمەد نییەن جای گورێز
|
| بەو تەور دا نە فەرق خان محەمەد بەقار
|
تیغ نەرووی تیغ مەلعوون موردار
|
| خان محەمەد شمشێر کێشا نەوەر دا
|
مەسعوود کە قەڵغان کێشا وە سەردا
|
| بەوتەور دا نە فەرق قوبەگای ئەسپەر
|
داش نە باهۆی ڕاست مەسعوود بەدگەوهەر
|
| نۆبەی مەسعوود بی دەست دا قەدارە
|
داش نە فەرق سەر خان بێچارە
|
| چوار ئەنگوشت نە فەرق خان محەمەد پەی کەرد
|
وەلحاسڵ تا تاق ئەبرۆش جیا کەرد
|
| مەسعوود وات سپای خان بی نێگوونسار
|
بشن نازاران باوەرین بەوار
|
| هێرش دان سپا دەردەم بەیەک بار
|
لوان نازاران باوەران بەخوار
|
| خان محەمەد چون شێر تەکان دا نەوجا
|
سەرش موحکەم بەست ڕوو کەرد نەسپا
|
| یاوا وە سپا خرۆشا بە قار
|
گورێزان تەمام سواران هەزار
|
| لوا پەی مەسعوود زەربێ دا وەنەش
|
بەو دەستوور سپا هجووم ئاوەردش
|
| ئاخر کە مەسعوود ڕەوان بی پەی کۆ
|
سپای تیرئەنداز تیرشانان بێ شۆ
|
| غوڵامان دەردەم تیر وستن بەوار
|
تیر وستن نە ڕووی مەلعوون موردار
|
| ماهـ زەڕئەفشان شای نۆش ئافەرین
|
دیدەشان پڕ بی نە سەیل ئەسرین
|
| چەنی کەنیزان کەردن موناجات
|
لاڵان نە دەرگای قازیولحاجات
|
| یا ڕەب بەحاجەت بەروی عەشقبازان
|
بەداغ سینەی جانگودازان
|
| بەیارەب یارەب شەب زیندەداران
|
بە ئومێد دڵ ئومێدەواران
|
| هێما کە دوعا تەمام نەوا نا
|
قادر قودرەت، قودرەت نمانا
|
| نیگا کەردشان هەم نەرووی ئاسمان
|
فەرهەنگ دێو چەنی شازادە ئامان
|
| شازادە نەدوور نیگای زەمین کەرد
|
خان محەمەد زامدار بە نەزەر ئاوەرد
|
| مەسعوود ڕوو کەردەن نەرووی قولەی کۆ
|
شای نۆش ئافەرین ها نەزاری و ڕۆ
|
| شازادە ئێد دی تاقەت پێش نەما
|
غوڕا بە هەیبەت ڕوو کەرد نەسپا
|
| بەوتەور نەعرە دا نەرووی قاروقین
|
کووهـ و دەرودەشت لەرزا تا زەمین
|
| شازادە بەوتەور کێشا تیغ تیز
|
وستش نە سپا شوور ڕەستاخیز
|
| ئەسپ و مەرد و زین مەوستش بە خاک
|
«ئەلحەزەر» خێزا نەگرۆی ئەفلاک
|
| شازادە مەسعوود نیگا کەرد نەدوور
|
دیش کە شازادە مەیۆ بەزەروور
|
| بە ناعیلاجی ئاما بە مەیدان
|
واتش شازادە بێ نامونیشان
|
| سپای مەغریبی گورێزان نەوجا
|
خاڵی کەردشان ڕووی عەرسەی سپا
|
| وەقتی کە مەسعوود ڕوو کەرد نە ئەوجا
|
واتش شازادە شووم بێ حەیا
|
| مەرشار دەمشق نەیادت شییەن
|
نەزانای مەغریب بی ساحێب نییەن
|
| مەبۆ حەق وێم بە وێم بستانووم
|
ڕۆحت بە دۆزەخ سەقەر بکیانووم
|
| شازادە بەو تەور خەشمش ئەسەر کەرد
|
نە جەبهەی جەوشەن مووش سەر بەرئاوەرد
|
| دەست دا بە شمشێر داش نە فەرق سەر
|
مەسعوود کە لوا ئەو نەزیر ئەسپەر
|
| وەقتێ داش نەسەر ئەسپەر شەق ئاوەرد
|
شمشێر نەفەرقش تا ناف ویەرد
|
| وەختێ مەسعوود کەفت نەخاک سیا
|
بەرز بی نە سپا بانگ واوەیلا
|
| سپا خرۆشا پەرێ شازادە
|
شای نۆش ئافەرین وێش کەرد ئامادە
|
| ماهـ زەڕئەفشان هەم ئاما بە خوار
|
ڕووکەردن نە فەوج هەزاران هەزار
|
| هەر سێشان بەو تەور حەملە ئاوەردن
|
سپای مەغریب شار تارومار کەردن
|
| خان محەمەد ئاواز شازادە شنەفت
|
چون شێر شکار فەریاد کەرد قوەت
|
| فەرهەنگ دێو بەوتەور دار شمشاد شانا
|
وە هەرکەس مەدا ئەرواح مەستانا
|
| شازادە فەرما بە فەرهەنگ دیو
|
وزۆ نە مەیدان وەلوەلە و غەریو
|
| سپای مەغریب شار فێراری کەردن
|
بەدەست فەرهەنگ گیان دەر نەوەردن
|
| ماباقیی سپا کە ئامان بەوار
|
وێشان وست نەخاک شازادەی سالار
|
| شازادەی سەروەر گوزەشتێ کەردش
|
فەرما بە فەرهەنگ دەس کۆتا کەردش
|
| جەو دەم خان محەمەد حازر بی نەوجا
|
سوجدە کەرد لوا دەست شا بۆسا
|
| شازادە خان محەمەد گرتش نە ئاغۆش
|
وێنەی دەستە گوڵ بۆ نیا نە بۆش
|
| واتش ئافەرین ئەی شێر سەروەر
|
خەلعەت داپەنەش نیم تاج نە زەڕ
|
| شای نۆش ئافەرین واتش کەئەی شا
|
خەبەر خورشید پێمان دەر نەجا
|
| شازادە ئەحواڵ تەمام بەیان کەرد
|
شای نۆش ئافەرین کێشا ئاهـ سەرد
|
| ئەو شەو ڕەفیقان ڕازان مەکەردن
|
سەر نەخاو شیرین ڕاحەت نەبەردن
|
| تا سوب ڕەوشەن بی سوڵتان بەخوڕەم
|
فەرما کە سەعید حازر کەن دەر دەم
|
| شازادە سەعید کە حازر کەردن
|
دەردەم وە پای تەخت شازادە بەردن
|
| واتش ئەی سەعید ئەتۆ چێش کەردی
|
ئەی فیتنە و فەساد تۆ بەرپا کەردی
|
| من شەڕ عەلقەم زەلغەم دێو کەردم
|
قەسر سولەیمان بەدەست ئاوەردەم
|
| تەلیسم زەنگوڵە شووم ناپەسەند
|
ئارایشم کوشت زەڕجام دێو بەند
|
| خاتوونە خانم من خەلاس کەردم
|
شای نۆش ئافەرین بەدەست ئاوەردم
|
| من شیم بەماوای جەزیرەی واق واق
|
زەنگیی ئادەمخوار یەکسەر کەردم پاک
|
| من شار فەرەنگ بەدەست ئاوەردم
|
خورشید عاڵەم من خەلاس کەردم
|
| بەسەد مەرارەت وەچەند دەردی سەر
|
شای نۆش ئافەرین ئاوەردم وە بەر
|
| تۆ تەماعت بی وە بی دەردیسەر
|
شای نۆش ئافەرین باوەری وە بەر
|
| «ئەو بووە حەرەم وە بێ دەردیسەر
|
من وێنەی مەجنوون دەشت گیرووم نەوەر»
|
| شازادە سەعید سەر وستش بەوار
|
جە خەجاڵەتی ناما بە گوفتار
|
| وات ئەی شازادە جە ڕای سەروەری
|
منیش چون غوڵام ئازادم کەری
|
| شازادە دەردەم ڕەحمش ئەسەر کەرد
|
شازادە سەعید ئازادش بکەرد
|
| ئەسپشان ئاوەرد بە زین زەڕکار
|
داشان بە سەعید دەردەم بی سوار
|
| شازادە سەعید هیمەت خواهی کەرد
|
لوابە ڕاوە ڕوو بە مەغریب شابەرد کەردن
|
| جەدمای چەند ڕۆژ فەرما کۆچ کەردن
|
ڕوو بە ڕاگەی شار مەغرێب شار کەردن
|
| بەسەد عیزو ناز داخڵ بین وە شار
|
ساکین بین جەتۆی قەسر زەڕین کار
|
| تا چەند ڕۆ نەوجا مێهمانی کەردن
|
شازادە جەودەم عەزم کۆچ کەردن
|
