سوڵتان ئیبراهیم و نۆشافەرین/55
Jump to navigation
Jump to search
| ←54 | سوڵتان ئیبراهیم و نۆشافەرین (1765) by 55. پێکدادانی خان محەمەد لەگەڵ لەشکری سەعید و مەسعوود |
56→ |
| شازادە مەسعوود ڕوو کەرد نە مەیدان | واتش ئیبراهیم بێ نام و نیشان |
| بەێو نە مەیدان نەبەرد بنمانیم | حەق شار دەمشق نەتۆ بستانیم |
| خان محەمەد واتش حەمید مەلاح | تۆ جانشین بەر بە سولح و سەلاح |
| سپا مونتەزیر کێ شۆ بە مەیدان | ناگا مەسعوود شا ئاما بەمەیدان |
| خان محەمەد واتش مەلعوون گومرا | کەم بکەر بێ جا شووم بێ حەیا |
| «بزرگش نخوانند ز اهل خرد | هر کە نام بزرگان بەزشتی برد» |
| تۆ چ حەد داری شازادەی سالار | تەڵەب بکەری نەرووی کارزار |
| خان محەمەد ئێد دی لەب دا بەلەبدا | شمشێر ئەڵماس هەم داش بە سەردا |
| مەسعوود کە قەڵغان کێشا بەسەردا | داش بە سەر قوبەی سەدر ئەسپەردا |
| شازادە مەسعوود دەست دا نە شمشێر | ناڵا و نرکنا بەور دەنگ دلێر |
| داش نەفەرق سەر سەدر سەهمناک | خان تیغ داش نەرا چون شێر بێ باک |
| هەم زەربەی هەنی کەردش نەرووی کار | مەسعوود نەرووی زین کەردش گرفتار |
| لەشکر ئێدش دی هجووم ئاوەردن | شازادە مەسعوود وە بەر بەر کەردن |
| هەم دیسان جە نەو سوار بی بە ئەسپ | ڕوو کەرد نەمەیدان چون ئازەرگوشەسپ |
| نەهەردوو تەرەف بی بە چەکاچەک | یەک تەبەق زەمین نیشت نەرووی فەلەک |
| گاگا خان محەمەد ڕوو بە غوڵامان | مەوات غوڵامان دەستم بەدامان |
| هەی ئامان یاران ئیمجار بگیرەن | جەنگ سەروماڵ مڵک و ئەسیرەن |
| ئێد وات و ڕووکەرد نە سپای خوونخوار | هێرش ئاوەردن چل هەزار سوار |
| ئەونە شەڕ کریا نەڕووی کارزار | سەرکەفت نەمەیدان وێنەی گەڵای دار |
| ئافتاب غرووب کەرد ئاسایش ژ ەندن | هەر کەس ڕوو بەرای خەیمە ئاوەردن |
| خان محەمەد یاوا بەناو غوڵامان | یەکسەر زەخمدار مەکەردن ئامان |
| فەرمان دا دەردەم لەشکر کەرد شومار | شش هەزار غوڵام ببین گرفتار |
| شای نۆش ئافەرین گرەوا بەزار | یەقەی مرواری دڕی تا بە وار |
| ماهـ زەڕئەفشان دەس کەرد بە گرین | خان محەمەد دیدەش پڕ بی نە ئەسرین |