سوڵتان ئیبراهیم و نۆشافەرین/48
Jump to navigation
Jump to search
| ←47 | سوڵتان ئیبراهیم و نۆشافەرین (1765) by 48. میوانیکردنی خورشید شازادە و یارانی و نۆش ئافەرین و خاتوونەی پەری |
49→ |
| سوب سەحەر خورشید بەرئاما نە جا | بێدار بی نە خاو شای حۆری لەقا |
| فەرما بەجەرگەی فێرقەی کەنیزان | نازک نەو هاڵان پۆل پۆل عەزیزان |
| ئیمشەو شازادە مەیۆ مێهمانی | تەرتیب بکەران باغ ڕزوانی |
| پڕ سەفا و زینەت بدەران جەلا | بنمانۆ نەرەنگ فێردەوس ئەعلا |
| مەداخڵ کەران بەرەیحان و گوڵ | ڕەونەق بدۆ شەوق بە ئارەزووی دڵ |
| شەراب لەعل فام شیشەی دوو ساڵە | ساقیی گوڵ عوزار بادە و پیاڵە |
| موترێب بەنەوای سۆز و سازەوە | ڕەقاسان وە ڕەقس خۆش ئاوازەوە |
| سەدای زیل و بەم ئاواز چل چەنگ | بگێرۆن بەدەست هەرکەس بەیەک ڕەنگ |
| ئەسباب بسازان با نەسەمای شام | مێهمانی کەران ساقی و بادە و جام |
| بەو تەور بسازان یاران بۆ خەجڵ | گرفتارش بۆ دڵێ نەسەد دڵ |
| فەرمانبەرداران شای شیرین کەلام | تا شام تەدارەک کەردن سەرئەنجام |
| خورشید عاڵەم شای شیرین لەقا | نیشتەبی بەناز دید و دڵ نەرا |
| دیدە ئینتیزار دیدار یاران | بەسەر وەعدەی وێش گرد تەشریف باران |
| جەو تەرەف غەمبار شازادەی دڵرێش | هۆرێزا پەی بەزم وەعدەی یاروێش |
| ماهـ زەڕئەفشان هەم نۆش ئافەرین | خاتوونەی پەری نازار شیرین |
| خان محەمەد چەنی حەمید مەلاح | وێشان دروست کەرد بەوەعدەی سەلاح |
| کووچە بە کووچە دایە بەردشان | داخڵ بەتۆی باغ دوڵبەر کەردشان |
| شای نازەنینان شۆخ شیرین خاڵ | هۆرێزا نەجا کەردش ئیستیقباڵ |
| یەک دەست عەمارەت جاڕوودەی دڵکەش | کول نەقاشی بەند چون شوعلەی ئاتەش |
| چناران بەرز سەر نەعەرش ماڵا | نەمامان شۆخ زەڕ ئەستوون باڵا |
| زەمزەمەی مورغان ناڵەی کەبووتەر | نیشتەن بەگەردوون ئەی چەرخ ئەخزەر |
| قومریان وە بانگ گوڵبانگ یاهۆ | بوڵبوڵان بەدەنگ ناڵین بێ شۆ |
| مورغان خۆشخوان بەڕووی شاخەوە | تاوس نە سەهەند سەبز باخەوە |
| شمشادان ساف نارنج و لیمۆ | ئەنار و ئەنجیر، ئەنگوور و ئەمرۆ |
| میوەی ڕەنگاورەنگ هەریەک نە دارێ | لایەقەن بە باغ گشت شەهریارێ |
| وەنەوشەی وەشبۆ ساوای سونبلان | بەرئامان چون لوول زوڵف نازاران |
| حەوزان زوڵاڵ چون ئاب کەوسەر | شیرین و شەوبۆ یەک نە یەک خاستەر |
| پەخش مەبۆ وە بان بەردان مەڕمەڕ | وێنەی دانەی دوڕ یاقووت و ئەحمەر |
| نە گۆشەی ئەو حەوز ساف مەڕمەڕی | تەختی ئاراستەن بەلقیسای پەری |
| پای تەختش گرتەن موبتەڵای ئاڵا | چەند دانە و گەوهەر نیان وە باڵا |
| دوڕ و جەواهێر یاقووت و مەرجان | پیرۆزە و سیمین، لەعل بەدەخشان |
| بەند کەردەن ئوستاد خاسەی دیاری | بنمانۆن نە دەور پەی یادگاری |
| ئەتڵەس و خارا فەرش وستەن وە بان | پەرێ جایگای خورشید تابان |
| نەدەوران تەخت تووتیی شەکەرڕاز | دەنگ مەدۆ وە هەم بوڵبوڵ چەنی قاز |
| تاوس و بۆرچین، سەرسەوز نەرووی ئاب | دڵ نە دەرووندا مەکەرد وە کەباب |
| ئەی ساز و ڕازە تەمامی تەمام | مەوجوودەن نەباغ سەوڵ نازئەندام |
| یاران کە دیشان ئەی قەسر و ئەی باغ | ڕەنگ ڕەنگ مەگڕیۆ بەوێنەی چراغ |
| تەواسان نەوجا ساتێ بین سەرسام | نەی قەسر و نەی باغ شۆخ جەمین جام |
| نەوقەسر، جامڕێز خورشید تابان | وێنەی لەنگ و لاڵ بێ دەنگ بێ زبان |
| خورشید عاڵەم نازار دوڵبەر | زانا نەمەندەن فامشان نەسەر |
| جەنەو تەوازوع ئیکرام کەردشان | یەک بە یەک وە بان تەخت ئاوەردشان |
| فەرما کەنیزان شەیدای شۆخ شەنگ | مەحبووب مەحبووبان نازار فەرەنگ |
| باوەران دانەی جەواهێر و زەڕ | لەعل بەدەخشان عەبیر و عەنبەر |
| نێسار باڵای نازەنینان کەرد | ڕەویەی تەعاروف چەنی یاران کەرد |
| دمای نەوازش شۆخ شیرین خۆ | فەرما ساقیان لەتیف دڵجۆ |
| ڕەقاسان بەلەنج موتربان بەناز | خۆشخوانان بەسۆز گوڵبانگ ئاواز |
| ساقی بە شیشەی بادە و جامەوە | موترێب بە غەمزەی خۆش خەرامەوە |
| ڕەقاسان بەرەقس زڕەی چەقانە | مەگێڵان بە شەوق بەشادمانە |
| مەشغووڵ بین هەرکەس بەکار وێشان | موترێب بە سازان ڕەقاسان کێشان |
| ساقیان سەیر بادەی مەی بەکەف | مدران بێ مەزاق سەرمەستان سەف |
| تا سفیدەی سوبح ئەی سازوراز بی | سەدای کەمانچەی بەربەت و ساز بی |
| خولاسە شیرین شای شەکەر گوفتار | بەزمێ بەی دەستوور ئاوەرد پەدیدار |
| هیچ کەس نەواچۆ وە ئەی شاهانە | نییەن نەشومار دەورو زەمانە |
| نە ڕووی سەماوات حەیران بی مەلەک | زڕەی ڕەقاس بی نە چوارەم فەلەک |
| نۆشانۆش جام، کزەی سۆز ساز | گوڵبانگ نۆش باد، زیڵەی نەوای ساز |
| ڕەعنا مەهوەشان سەرمەست بادە | سەرخوەش بین یەکسەر شاهـ و شازادە |
| جە مەزەی گرمەی مەست بادەنۆش | بەرشی جەلاشان یەکسەر عەقڵ و هۆش |
| گشت ئامان بە ڕەقس نەشۆخیی دەماغ | مەبەردن نەدڵ زەهر چەنی داغ |
| ڕەقس کەردن زەمین بەلەرزە ئاوەرد | حۆری جە گوڵزار ئیرەم خەجڵ کەرد |
| شازادە و یاران گشت حەیران بین پێش | جە ڕەقس ڕەقاس موترێب دڵکێش |
| گشت حەیرانش بین بە جانفشانی | بەدڵ مەکەردن ئافەرین خوانی |
| جە ساز و سوحبەت ماهـ قەسەب پۆش | حەیران بین یەکسەر بە دڵ بین بێ هۆش |
| سا وەقتێ یاران یەکسەر بین بێ هۆش | بەفرسەت زانا نازار لاڵ پۆش |
| دوو دەست نەگەردەن شازادە ئاوەرد | وێش پشتان بە تووڵ سەرو باڵاش کەرد |
| دەست کەرد نەگەردەن بۆ نیا نەبۆش | ئاوەرد بە نەزدیک گوڵ باغچەی لیمۆش |
| وێنەی دڵسۆزان گرتش نە ئاغۆش | فشاراش نەرووی سینەی عەنبەربۆش |
| شازادە کە دیش خورشید عاڵەم | وێنەی لام و ئەلف پێچیان وە هەم |
| هەروو شین نەخاو تا ڕەوشەنیی ڕۆز | شازادە چەنی ماهـ دڵئەفرۆز |
| سەحەر بەفەرمان بینای لایەزاڵ | بەرئاما نەبورج شەمس زەڕین باڵ |
| هەردوو هۆرێزان نەخاو شیرین | پۆشان وەباڵا جامەی عەنبەرین |
| خورشید عاڵەم جەلای جەماڵ دا | قەترەی گوڵ گوڵاو کەرد بە ڕوخساردا |
| شستوشوو کەردش ڕوخسار گوڵزار | ڕەونەق دا شێوەی شۆخ شیرین وار |
| خاتوونەی پەری هەم نۆش ئافەرین | ماهـ زەڕئەفشان گیسوو عەنبەرین |
| ئەوان هەم نەخاو مەستی بین بێدار | شستوشوو کەردن گوڵباغچەی ڕوخسار |
| شازادە واتش خاتوونەی نازدار | بەرشین نە ئەیوان شۆخ خاتردار |
| بشین بە مەنزڵ بنیشین بەشاد | بێ غەم و هیجران بەخاتر گوشاد |
| خورشید دوڵبەر بە ئیخلاس خاس | جەیاران کەردش خەیلێ ئیلتیماس |
| وەعدە بۆ هەر شەو جە نەو شازادە | بەیوون بە سەروەخت ئەی جام و بادە |
| شازادە ڕازش قەبووڵ کەرد بەدڵ | خورشید هۆرێزا لوا بە مەنزڵ |
| کەردن بە عادەت گشت شەو جە مەنزڵ | مەشین بە مەجلیس خورشید چون گوڵ |
| تا ئاخر شیرین نازدار فەرەنگ | نیشت وە بان تەخت نەقاش گوڵڕەنگ |
| مەشغووڵ بی بەکار پادشاهیی وێش | ئەهل فەرەنگ شار شاد بین وە پێش |
| گشت ڕۆ شازادە مەشی بەسەلام | وەبارەگای شۆخ شای شیرین کەلام |
| شەو مەشی وەبەزم نازار دڵسۆز | جە مەی خوردەن بین تا نەزدیک ڕۆز |
| خولاسەی کەلام تا وەعدەی هەفت ما | یە کردارش بی شای حۆری لەقا |
| عەیش کەرد بە عەین بە دەماخ دڵ | مەشغووڵ عەیش و نۆش تا هەفت ماهـ کامڵ |