سدا نال اساڈڑے وس وے
سدا نال اساڈڑے وس وے
دل توں کنوں بے وس وے
زلف زنجیر تیڈا پر سوہنا
مفت گیوسے پھس وے
دلڑی رانی، سگھڑ سیانی
کھس گِھدو کِھل ہس وے
فوج حُسن دی حملہ کیتا
علم عقل گیا نس وے
مہر محبت غیر تیڈے دی
مُول نہ رہی ہک خس وے
برہوں بحر دی روز چڑھاوے
ویلاں لہریں نس وے
تپ تپ سڑ سڑ خوب گِھدوسے
عشق تتے دی چس وے
آکر وچ میدان وفا دے
کون پووے ہُن نس وے
کر کر شوخیاں سخت ستایو
بس میاں، ہُن بس وے
جوگی دی دل رنگپور باجھوں
سٹی ہور ہوس وے
|
This work was published before January 1, 1929, and is in the public domain worldwide because the author died at least 100 years ago. |