روضة الصفا/04
Jump to navigation
Jump to search
| ←03 | روضة الصفا (1900) by 04. در بیان دوزخ و اهل دوزخی |
05→ |
| پادشای قەههار دارای بێ ئەندێش | دووزەخ دروست کەرد جە ڕووی قەهر وێش |
| هەفت تەبەق تەمام وە دووکەڵ ڕەش کەرد | یەک جە بان یەک گشت پەڕ ئاتەش کەرد |
| هەزار ساڵ وە جۆش دەمناشان وە دەم | تا کە قرمز بی وە بێ زیاڎ و کەم |
| دیسان هەزار ساڵ دەمناشان زەروور | تا گێڵیا ڕەنگش سفید چوون کافوور |
| پەی پەی دەمناشان ئەیزەن هەزار ساڵ | تا کە سیا بی چوون سیا زوخاڵ |
| نار جەهەننەم ئێستە سیاهەن | خەلافش نیەن خوڎا گەواهەن |
| یەک پرد سەختێ سێراتش نامەن | ئەر پەرسی چێشەن تەرح ئەو کامەن؟ |
| زەبان جە خۆفش دایم هەر لاڵەن | ئەر پەرسی درازیش، سێ هەزار ساڵەن |
| هەزارش نەشیب، هەزار فەرازەن | باقی هەر هەیبەت چەفت و ناسازەن |
| نە ڕای دەلیلەن، نە یاگەی ئەرجوو | بڕەندەن چوون تێغ، باریکەن چوون موو |
| یانێ جە ئەزەڵ هەر سێ تەل بیەن | جە مووی سەر و ڕیش، سینە خاشیەن |
| مونتەزێر مدران پەی گوناهکاران | پەی گرۆی موشرێک ئەهل بەدکاران |
| ها نە جای زەحمەت خۆف و خەتەر دا | کێشیان وە بان نار سەقەر دا |
| هەر کەسێ حەزرەت ڕەهنمای ڕاش بۆ | جە ڕۆی قیامەت شەفاعەت خواش بۆ |
| ئیمان کامڵ بۆ جە «يوم العدم» | بڵێسەی دووزەخ نەوینۆ وە چەم |
| هەر کەس ناوەرۆ شادەت وە باڵش | جە دنیا و عوقبا وێرانەن ماڵش |
| جارێ با دووزەخ خار و خجڵ بۆ | مالک هەر پەی کار خەیرش ماتڵ بۆ |
| قودرەت هەر قودرەت بێ هەمتای وێشەن | تا کە بزانین ئێرادەش چێشەن |
| جای «قَالُوا بَلَىٰ» ئەعلا مەقامەن | هەر کەس نەزانان بزانۆ کامەن |