روضة الصفا/03

by میرزا عەبدولقادری پاوەیی

←02

روضة الصفا  (1900)  by میرزا عەبدولقادری پاوەیی 03. در بیان اوصاف بهشت و اهل بهشتی و چگونگی آن

04→

جە شەش دانگ نوور موستەفای سەروەر	یەک دانگ جیا کەرد دانای دادگەر
کەردش وە بەهەشت وە قەسر و قسوور	وە ڕێزوان پاک جای غێلمان و حوور
گیاش زەعفەران، خاکش شەکەرەن	سەنگش مرواری، دانە و گەوهەرەن
گوڵەن، گوڵزارەن، ڕەوحەن، ڕەیحانەن	لەعلەن، یاقووتەن، دوڕەن، مەرجانەن
نەخلەن، ڕوممانەن، مێوەی سەد ڕەنگەن	زەیتوونەن، توففاح، تازە و قەشەنگەن
نوقڵەن، نەباتەن، شەکر و شیرینەن	عوودەن، کافوورەن، عەتر و عەبیرەن
فەسڵش دایم وەخت نەو وەهارانەن	سەوزە و هەواش فەرش بەزم یارانەن
شەرابش تەهوور بادەی موفەسەڵ	شیرینیش شەربەت پالوودەی عەسەڵ
حەوزش کەوسەرەن، ئاوش سەلسەبیل	باغش جەننەتەن، ئوستاش جبرەئیل
قەسرش خشتێ زەڕ، خشتێ هەم سیمەن	بادش عەتر عوود، باغچەش نەعیمەن
مەلبوسش فاخر، دیبای قەشەنگەن	حیللەی ئەلوانەن، سەد هەزار ڕەنگەن
کەبابش لەزیز، تەعمش وەش تامەن	زەرفش گشت جەوهەر ئاینەی جامەن
حەق لەزایزات ئامادە کەردەن	وە «لحم الطير»ێ سەوگەندش وەردەن
پەی ئەهل جەننەت پاک بێ تاوان	«تشتهي الانفس» حەق وێش فەرماوان
نەفس پەی هەر ئەشیا ئێشتێها کەرۆ	فەورەن خدمەتکار پەرێت ماوەرۆ
ئارەزووی هەر چی باوەری نە دڵ	وە پای وێش مەیۆ پەی تۆ وە مەنزڵ
موختەسەر هەر کەس خوڎا پێ دادەن	ئیمانش کامڵ، کارش ئامادەن
بێ شک «جنت المأوا» جاش مەبۆ	دایم پای شەجەر تەکیەگاش مەبۆ