رشتۂ رسم محبت مت توڑ
Jump to navigation
Jump to search
رشتۂ رسم محبت مت توڑ
توڑ کر دل کو قیامت مت توڑ
کام ناکامی بھی اک کام سہی
توڑ امید کو ہمت مت توڑ
رات فرقت کی پڑی ہے اے دل
ایک ہی نالے میں طاقت مت توڑ
اس کی رحمت کو نہ بے کار سمجھ
مے و میخانے کی نیت مت توڑ
دیکھ اچھی نہیں یہ خر مستی
ساغر بادۂ فرصت مت توڑ
اے دل امید رہائی مت باندھ
اور آفت سر آفت مت توڑ
پوچھ مت لذت مے اے واعظ
جانور دام شریعت مت توڑ
صحن مسجد کو کیے جا پامال
قید آئین طریقت مت توڑ
مے کدہ دیکھ کے جنت کو نہ بھول
حرص سے بند قناعت مت توڑ
اس کا احسان اٹھانا ہے ہمیں
گردن اے بار ندامت مت توڑ
اے قلقؔ بت کدے میں باندھ احرام
ہم سے للہ رفاقت مت توڑ
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse