رسوا ہوئے بغیر نہ ناز بتاں اٹھا

From Wikisource
Jump to navigation Jump to search
رسوا ہوئے بغیر نہ ناز بتاں اٹھا
by اسماعیل میرٹھی

رسوا ہوئے بغیر نہ ناز بتاں اٹھا
جب ہو گئے سبک تو یہ بار گراں اٹھا

معنی میں کر تلاش معاش دماغ و دل
حیواں صفت نہ لذت کام و دہاں اٹھا

گر خندہ یاد آئے تو سینہ کو چاک کر
گر غمزہ یاد آئے تو زخم سناں اٹھا

یا آنکھ اٹھا کے چشم فسوں ساز کو نہ دیکھ
یا عمر بھر مصائب دور زماں اٹھا

اس انجمن میں جائیے اب کس امید پر
ہم بیٹھنے نہ پائے کہ وہ بد گماں اٹھا

بے یاد دوست عمر گرامی نہ صرف کر
اس گنج شائگاں کو نہ یوں رائیگاں اٹھا

وصل و فراق وہم سہی دل لگی تو ہے
پھر ہم کہاں جو پردۂ راز نہاں اٹھا

پروانہ کی تپش نے خدا جانے کان میں
کیا کہہ دیا کہ شمع کے سر سے دھواں اٹھا


This work was published before January 1, 1929, and is in the public domain worldwide because the author died at least 100 years ago.