دیوانی مەولەوی/پ
Jump to navigation
Jump to search
| ←پیتی ب | دیوانی مەولەوی (1866) by پیتی پ |
پیتی ت→ |
پەشێو وێنەی وێم نیشتەبێم خەجڵ[edit]
| پەشێو وێنەی وێم نیشتەبێم خەجڵ | دیم شادی دەس دا نە دەروازەی دڵ |
| واتم: نامانی هەرگیز های چێشەن؟ | لەب بەردەوە چێش نامەیێ پێشەن |
| نە تاریکیی خەت مەعناش مەجۆشا | چون ئاوی حەیات دڵ خاسخاس نۆشا |
| ئاخ، قووەی زەمین دەروونم کەم بی | بووڵەکەی سفتەم سەرەڕای خەم بی |
| وەرنە ئەو شەونم جە سەردا مەوەشت | مەشیا کەردایێش وە ڕەوزەی بەهەشت |
| فەرمابێت ئیسا جەمین جامی جەم | پاسەیچە نییەن تۆ دینت وە چەم |
| نرخی کاڵاکەش ئاڵاتەر بییەن | سەد گیان وە پووڵێ باڵاتەر نییەن |
| ئارێ تا پەی ئەو من ڕۆمەن چون شەو | شەوقەن پەی خەندەی سوبحی جەبهەی ئەو |
| تا وە ئەڕەی دەرد دڵەی من شانەن | زەریفتەر توڕڕەی ئەو دانە دانەن |
| تا من دووی سفتەی جەستەم فێشتەرەن | جەلای ئاوێنەی ئەو زیادتەرەن |
| تا سفتەی قامەت من وسمە وەشەن | ئەبرۆی ئەو وە ڕووی دڵ کەمان کەشەن |
| های چێشت واتەن، وە ڕەحمەت شاد بی | مەر زووتەر کەم بی، ئیسە زیاد بی؟ |
| ئەر جە زامی دڵ من نیگات مەکەرد | مەزانات ئەو زات ئەو وەسفی بێگەرد |
| ئەو ڕاز، ئەو ناز، ئەو قەوس، ئەو خەدەنگ | بییەن، هەن، مەبۆ، مەگێڵان جە ڕەنگ |
| حاڵش دەستە مل وە ئیستیقباڵەن | ئیستیقباڵ چەنی مازیش یەک حاڵەن |
| بارێ، دڵ وە خشت وێرانی ئاوان | حەقت وە دەسەن نەداری تاوان |
| دڵ تفڵ و ئازیز هەر ڕۆ نە شانێ | هەر لادێ تەرزێ، هەر سات نیشانێ |
| گا چون ستارەی تاریکەی سەحەر | گا قەمەر، گا خۆر مەیۆ وە نەزەر |
| گا وە بێستوون هەستیی بیناوە | حوسنش وە گوڵگوون وەش ئیستیغناوە |
| دەستی شیرینش ماوەرۆ وە یاد | فەرهادی نە تاق فەرقەکەی فەرهاد |
| گا چەرخی دیدەی سەد لەیلا فرۆش | کوورەی ناری ناز ماوەرۆ وە جۆش |
| تا بۆی حەرارەت مەوجی دەریای دەرد | مەجنوون وێنەی تەم بەرۆ هەردە و هەرد |
| خاڵۆ پەی جەلال ئەر کار سازیشەن | وادەی تەجەللای تیر ئەندازیشەن |
| بسم اللە ئەو تیر پەڕ تێدا بەستەش | ئێد نیشانەی تەن سەد جار شکستەش |
| چون ڕەنگ کەرۆ زام تازە زامانم | ئاو مزۆ ئەو دەم کۆنە زامانم |
| زامی تەن وە تیر بەڵاش زیاتەر | ڕای ئامۆشۆی دڵ وە لاش زیاتەر |
پای شادیم دیسان ماران گەستەوە[edit]
| پای شادیم دیسان ماران گەستەوە | نە پیاڵەی چەم ژار تۆ بەستەوە |
| سەنەم پەرەست نیم سەمەد ناسەنان | دووی کوورەی دەروون شیوەن ڕاسەنان |
| ساقی، مەی هەی داد، موغەننی، چەنگێ | نەیچی، های فەریاد، موتریب، ئاهەنگێ |
| گەرمیی مەی، نەوا و کزەی دەف و نەی | تێکەڵ بۆ چەنی زایەڵەی وەی وەی |
| واچدێ چ وادەی نشینگەی تەنگەن | یاران چەمەڕا برا درەنگەن |
| گردین تەدارەک بەغداشان جەمەن | وادەی زیارەت غەوسولئەعزەمەن |
| بێ تۆ بەو خشووع دەس وە دوعاوە | کێ گەردەن کەچ بۆ نەو بارەگاوە؟ |
| دەخیل جەماعەت بێ ئیمامەتەن | ئیمامەت ماتەم وە بێ قامەتەن |
| گۆشەی تای هیندی مەندیلی بێگەرد | مایل کەر ئەو لای سایی گەردەن زەرد |
| قیام دەر وە بەژن ئەو قەد و قامەت | قیامەت قام دەر پەرێ قدْ قامتْ |
| هامدەردان پەی بەزم شادی جەم بییەن | چ خەیرەن سەدای کاری خەیر نییەن |
| مەیلت چەنیمان یەکجاری سەردەن | یا دووربا زامان مار کار لێت کەردەن؟ |
| ڕۆ پەرێ ئەو مەیل ڕای خوداییت، ڕۆ! | ڕۆ پەی وەفا و شەرت ئاشناییت، ڕۆ! |
| ڕۆ پەی ئێشی سەخت مارگەستەی کاریت! | ڕۆ پەی دەردیسەر کەس نادیاریت! |
| ئەی تۆ کام نەدیت جە عەرووسی نۆ | تا عەرووسی خاک پەشتان بی وە تۆ |
| جەی خاری دندان ژار ئاوردەی مار | خاتر نازک وێت مەدەر ئازار |
| تۆ نەوگوڵی باغ موستەفەوی بی | گەنجی خەزانەی مورتەزەوی بی |
| گوڵ عادەتشەن بێ خار نمەبۆ | گەنج ڕەویەشەن بێ مار نمەبۆ |
| غەریبیت زیاد نە شەهادەت بی | شەهادەت هەم دەم وە سەیادەت بی |
| ئەی ڕەسوول ئارۆ شەوقش پەرواز دا | وە ناز و ئیعزاز کاری تۆ ساز دا |
| ڕجام هەن فەردا نەو گەردەلوولدا | بویەری نە ژێر سای ئەو ڕەسوولدا |
پزیسکەی چەخماخ کافیی کارمەن[edit]
| پزیسکەی چەخماخ کافیی کارمەن | چ وەخت و وادەی ئەی گوفتارمەن |
| دڵەی کۆس کەفتەم هەم تەم کەردەوە | پەردەی سەبووریش تەمام دڕدەوە |
| ناڵا و گرەوا و خولیاوە و خول وەرد | جەو بووڵی دەردا وێش سامان سا کەرد |
| ئیسە بووڵی دەرد کەرۆ وە سەردا | دەک سڵامەت بی چیت ئی خەبەر دا |
| دڵە پۆشابێ پەردەی سەبووری | سازابێ چەنی دەردەکەی دووری |
| پەردەی سەبووریم دڕیا، ڕۆڵە ڕۆ | ڕیشەی جەرگەکەم بڕیا، ڕۆڵە ڕۆ |
| وە ناکام هیجرەت کەردەم، ڕۆڵە ڕۆ | داخان گشت وە خاک بەردەم، ڕۆڵە ڕۆ |
| خان و مان خامۆش بێتۆ، ڕۆڵە ڕۆ | ئەتفالان مەدهۆش بێتۆ، ڕۆڵە ڕۆ |
| تەڵمیت سیا پۆش بێتۆ، ڕۆڵە ڕۆ | خاتوونان بێهۆش بێتۆ، ڕۆڵە ڕۆ |
| کام وەسفت خەیاڵ، کام شێوەت یاد کەم | پەی کام خەسڵەتت داد و فەریاد کەم! |
| پەی عەقیدە و دین موسڵمانیت، داد! | پەی شێوەی شیرین نەوجوانیت، داد! |
| پەی ئەو عەقڵ و فام هۆشیاریت، داد! | پەی خۆش نیگاری و خۆش ڕەفتاریت، داد! |
| فەریاد پەی ئیخلاس، ئاخ پەی ئایینت | پەی ئاغەی دنیا و پەی ئاغەی دینت |
| هەر کەس دیم، دیدەم، مەیلی تۆ پێش بی | کێ بی؟ کێ جە تۆ خاترش ڕێش بی؟ |
| فەڵەک جەرگش دەن وە مەودای چڵدا | کام خاتر ڕێشیش بی نە تۆی دڵدا |
| دەورش وەی تەورە، ئەی جەورە ئاوەرد | من حەسرەتمەند کەرد، تۆ بەو دەردە بەرد |
پۆی خەیاتەی فەرد بۆ عەنبەرینت[edit]
| پۆی خەیاتەی فەرد بۆ عەنبەرینت | دەسڕێسەکەی فیکر بیکری شیرینت |
| چون ئارەزووی وەسڵ نە تۆی مەحروومی | تەندەبێت وە تان فەردی مەعدوومی |
| چون شەبەندەڕۆژ سەد تەرزە ڕەنگ دا | تەوەن دان وە تاڵ دێبای فەرەنگدا |
| پەی دەفعی سەودای دەردی نەمامان | بەرگێ بی پەی دڵ، سەرتا وە دامان |
| دڵ ئەو بەرگ و بۆی جارانش نەبێ | ڕووی لوای مەجلیس یارانش نەبێ |
| پۆشتەت کەردەوە ئیحسانت یاوا | دەک هەی دەوڵەمەند یانەت هەر ئاوا |
| بێباکیم عیللەت دڵ سەردی نییەن | بێمەیلیم جە تەرک هامفەردی نییەن |
| بەڵام مەسئەلەی فتوای قەزای حەق | نە مەحکەمەی شەرع حاکمی موتڵەق |
| نەو عەرووسی سۆز وە دڵ پەروەردە | خەرجی گیان وە گیان وە کابین کەردە |
| وە هەر سێ تەڵاق بایینە کەردەن | یادی ڕجعەتش وە دڵ ناوەردەن |
| کەم بی شنۆی وەش ئاهی سوب دەمی | وشکاوش ئاما جۆی چەمەی چەمی |
| بێ سۆزی مەنزڵ دڵ کەرد وە یاتاخ | پەی ئاو و هەواش ئاو ئاهـ و ئەو داخ |
| وە بێ من تۆ وێت زیهنت پێ یاوان | خاست فەرماوان دانەت شکاوان: |
| بێبەدەڵەن عومر خاسش هەر پاسەن | باختش پەی مەعشووق بێبەدەڵ خاسەن |
پێشانیم هەوەس زانووش جازمەن[edit]
| پێشانیم هەوەس زانووش جازمەن | تەعزیمی جەناب پیری لازمەن |
| باڵا کەردەوە مەیل ئەو لای پەستی | وردیکڵانەن دەروازەی هەستی |
| مەعدوومی! کردەی بەدی هەزار تەرز | زانووی ئومێدت ناوەرۆ ئەو لەرز |
| ئەو کەس مزانوو سەتارەن ئارۆ | جەو بوزورگتەرەن شەو ئەو ڕۆت نارۆ |
| سفیدیت قەڵغان پەی ڕووی سیات بۆ | کەمانیت شەفیع تیری دیات بۆ |
| نمەبۆ پیری و تەن ناتەوانیت | وەی دوو فەردەوۆ ئاو دەس جوانیت: |
| عەزابم ئەر سەد جە حەد بەرشییەن | جە ڕووسیاییم گرانتەر نییەن |
| من کە خەجاڵەت خزمت ئاما پێم | جەهەننم سەد ساڵ دۆزەخ بۆ وە جێم |
| موتریب، بۆ وە داد دڵگیریمەوە | پیری ها ئاما وە پیریمەوە |
| نەوات وێرانەی دڵ کەرۆ ئاوا | چەنی بەستەی فەرد بێساران ماوا: |
| «ئینە گرد جە وە خت نادانیم بییەن | فەسڵی سەرمەستیی جوانیم بییەن» |
| «ئیسە ها جە گشت پەشیمانیم بەرد | وادەی پیریمەن جوانیم ویەرد» |
| «کۆچی دواییمەن، یاوانم نۆبە | نۆبەی تۆبەمەن، کەرەمدار، تۆبە!» |
پەژارەت شادیم جە بێخ ئاوەردەن[edit]
| پەژارەت شادیم جە بێخ ئاوەردەن | دووریت ڕیشەی دڵ خەیمەکەن کەردەن |
| فیراقت فەرقم وە تووتیا کەرد | جیاییت ئازام جە هەم جیا کەرد |
| وەسواسەت وەی تەور ئێش دان وە جەرگم | وە مەرگت قەسەم ڕازیم وە مەرگم |
| وێت بدەر ئینساف نەو نەمامی نۆ | مەردەن خاستەرەن یا خۆ دووریی تۆ؟ |
| مەردەن یەک ساتەن ئەڕواحەکەی وێم | دووریت هەر ساتێ سەد مەرگەن پەرێم |
| مەر جەستەی خەستەی من جە فۆلادەن | یەند دووریت وینۆ هێمان دڵ شادەن |
| دەک ڕەحمەت ئەو قەبر گشت وەفاداران | خوسوسەن ئەو کەس شای وەفاداران |
پەشێوی وە نەزم لوولووی ئەسریندا[edit]
| پەشێوی وە نەزم لوولووی ئەسریندا | پەروین دائیرەی خورشید تەزییندا |
| جای ناخوون وە خوون ئەو گۆنای بێگەرد | ئیشارەت وە مانگ مەینەتی دڵ کەرد |
| شیرینیی قامەت قیامەت نەوەرد | سەڵای فەرزی بەرگ ئازیەتی ئاوەرد |
| هەنی فتوای شەرع بادە نۆشان بۆ | حەڵاڵیی کاڵای ماتەم پۆشان بۆ |
| وەشەن ئەو باڵا چون بەو کاڵاوە | بازش ئەو کاڵا هەر بەو باڵاوە |
| حەیات جە زوڵمات جیا نمەبۆ | کاوە وە بێ بەرگ سیا نمەبۆ |
پەیغامی باڵای خەمبارەکەی تۆ[edit]
| پەیغامی باڵای خەمبارەکەی تۆ | خەمیایی حەڵقەی گۆشوارەکەی تۆ |
| چەند وە سەرگۆشی وە گۆشت ئاوەرد | چون بەدبەخت بیم تۆ گۆشت نەکەرد |
پەی کەسێ خاسەن هەوای سەیری باخ[edit]
| پەی کەسێ خاسەن هەوای سەیری باخ | ماسیوای مەعشووق نە بۆش ئاخ و داخ |
| من جفتی مەعشووق دەرد هەمڕازمەن | چون بازی سەرچڵ وادەی بازمەن |
پەنج بییەن وە شەش شەش ڕوو کەرد نە پەنج[edit]
| پەنج بییەن وە شەش، شەش ڕوو کەرد نە پەنج | حەریر نە مابەین بییەن گەوهەر سەنج |
پیری و فەقیری و کەسیفی هەر سێ[edit]
| پیری و فەقیری و کەسیفی، هەر سێ | نەبۆ وە هیجرانباری هیچ کەسێ |