دیوانا مەلایێ جزیری/م

دیوانا مەلایێ جزیری (1630) by مەلایێ جزیری
قافییا م

شەربەتا لام و بێیان ئەز ب حەیاتێ نادم[edit]

شەربەتا لام و بێیان ئەز ب حەیاتێ نادم	بادەیا لەعلێ ب ئاڤا زولوماتێ نادم
حوور و ولدان و پەری جوملە جەما بن ئیرۆ	موویەکێ پێ ژ خەتێ وێ بوت ولاتێ نادم
گەر بدت دەستی تەوافا پێ و دەستان بگرم	وێ مەجالێ ب ووقووفا عەرەفاتێ نادم
ئەز و یار گەر شەڤەکێ هەردو هەم ئاغووش ببین	«ليلة القدر»ە مە ئەو شەڤ ب بەراتێ نادم
جانێ شیرین کو ژ یار ڕا ب خودان ئەز دکرم	نە ب یارێ خوە د وەقتێ سەکەراتێ نادم
نە ب قانوون کو ئشارەت ب شفایێ بکرت	ئەز هلاکا خوە د عشقێ ب نەجاتێ نادم
شەربەتا زەهرێ هەلاهل کو حەبیبێ مە بدت	ب گولاب و شەکەر و قەند و نەباتێ نادم
تەلبە کر وەسل ژ دلبەر م ب عنوانێ زەکات	گۆ: تو عەبدی و ب عەبدێ خوە زەکاتێ نادم!
دێ ب پەیکی بکرین مات رەقیبی دیسا	ب ڕوخ و فیل و فەرەس ئەز شەهـ و ماتێ نادم
د سەمایا سەحەرێ دەست ب کەس دی ئیرۆ	غەیری شیرین قەد و مەوزوون حەرەکاتێ نادم
هاتە دەستێ مە د رەقسێ و دگۆ: بل ژ مەلێ	دەست ب کەس دی د سەمایا کو مەلا تێ نادم!

عیدە و دا عالەمێ بانگێ سەفایێ خاس و عام	ماهێ نەو ئەبروو نوماندن چوو ژ بەر عەور و غەمام
خوەش ب دۆر جامێ ئشارەت کر هلالێ ساقییان	ماهتابێن زوهرەسیما چاردەهـ سالی تەمام
نامە تەی کر رووزەیێ عیدێ ڤەکر فەسلا مەیێ	لێ ب زمزم تێن ب ئاوازێ نەی و فنجان و جام
شاهدێن گول ڕەنگ ساقی بەلکی نەسرینن بەشەر	ئێ د لبسێ ئەرغەوانی نێرگزێن عەرعەر خەرام
یا رەب ئەو ڕووحن موجەسسەم یان مسالێ ڕووحن ئەو	لەو ب سەر جامان دبەخشن نازکێن شیرین کەلام
ئەو چ عالی گەوهەرن هاتن لباسێ جسم و جان	عشوەیێن وان شوبهی ئکسیرێ د قەلبانن مەقام
وەک مەلێ گاڤەک تنێ غائب ژ دیدارا تە بم	وەر ببم وێ ساعەتێ لێ بن ژ من دا سەد سەلام

دانەیێن عەنبەر ل نەسرینان ڕەشاندن خال خام	سووسنێن نازک ل سەر خالان چەڤاندن دال دام
ئەو پەری وەقتێ د سوندوس دا ژ قوندوس بن خویا	بەندە دێ شاهـ و گەدا بت خوسرەوێ شیرین کەلام
«ليلة القدر» و بەراتن زولف و جەبهەت سوبحێ عید	دێم وەکوو فەسلا بوهارێ لێ قیامەت قەدد و قام
هەر کەسێ جارەک دییە ئەو زندە ما حەتتا ئەبەد	وێ نەدیتی ئەو پەری ڕوو زندەگی لێ بت حەرام
هەر کەسێ جامێ ژ دەستێ وێ بنووشت، نووش بت	ئێ ژ دەستێ وێ نەنووشی زەهر بت لێ ئەو مودام
وان د رەقسێ دا کو دیم ئاوڕ پەیاپەی دانە من	بەرق و تیرێژان ل دل دا جەزبەیا عشقێ ڕەڤام
جەبهەت و دێمێ ژ قودرەت لێ نڤیسی حەرف حەرف	کاکولان تاتا ل سەر حەرفان کشاندی لام لام
عومرەکە دوور بووم ژ جانان کەتمە بەندا فورقەتێ	ناگەهان پەردە هلانی گۆ مەلایم «السلام»!