دیوانا مەلایێ جزیری/ج

From Wikisource
Jump to navigation Jump to search
دیوانا مەلایێ جزیری  (1630)  by مەلایێ جزیری
قافییا ج

شمشادێ خەرام و سەروێ غەنناج[edit]

شمشادێ خەرام و سەروێ غەنناج جانان دبرت ب عشوە تاراج
من دی سەحەرێ د خوابێ مەستی بێ دەنگ تەزەرو و لالە دورراج
بشکفتی ژ غونچە نێرگزا مەست بوو فەرق ژ سەر قەدیفە دیباج
جەبهەت کەشفی ژ سوبحێ سادق نوورێ کو ڤەدا ژ سەر شەبێ داج
ئەلماسی نومانە شوبهی مسری دانین جەگەرێ مە دل کر ئاماج
نەسرین و بەنەفشە تەووزاندن ماوەر دڕەشاندە شووشەیێ عاج
جوهتێ حەبەشان «بطُرْفَةُ العَيْن» ئانی قەدەرەک ژ ئەسپەهان باج
سیما کو نوما نەما ل هش سیم سیماب ژ خەجالەت ما ژ ئخراج
مرئاتێ سکەندەری ل پێشە «بحر و لها الْعكوسُ أمواج»
دۆرا قەمەرێ ژ بەر شەفەق دا کو سپێدە ل فەرقێ سەر نها تاج
چەرخ و فەلەک و مەلەک دیارن «شمسُ و كواكبُ و أبراج»
زوهرە ب قرانێ قابێ قەوسەین «و النَجْمِ اذا هَوی بِمِدْراج»
دەنگێ مەلەکان زمێهنە زمزم ئەرواح ژ عشقێ تێنە معراج
دل بەحرە و سەد هەزاری مەوجن عارف چ خەبەر ژ بەحرێ مەوواج
بۆری و ب غەنجەکێ مەلا کوشت ئەو غونچەلەبا دەلال و غەنناج

دل ژ علاجێ کو بدەر کت مزاج[edit]

دل ژ علاجێ کو بدەر کت مزاج دێ ژ لەبێ نۆشێ عەتا بت علاج
ئایینەیێ جامێ جەهانبینێ جەم بادەیێ لەعلەینە د جاما زوجاج
ژ ئاڤێ حەیاتێ ب مە دا شەربەتەک زندە کرین ما ژ عەدوو ڕا نەشاج
بەندە کرم گەر چ شەبەهـ فیل بووم سیمبەرا ساعد و بازوو ژ عاج
ئەختەرێ ئقبال و مەهێ بورجێ بەخت مهر و سپهر و کەمەر و تەخت و تاج
کووسێ کو هنگاڤتی ب شاهی ل تەخت پادشەهان نەقدێ ڕەوان دا خەراج
خوسرەوێ شیرینێ ل دەربەندێ حوسن سیمبەران لازمە لێ موهر و باج
سککەیێ شعرێ مە ب ناڤێ تە هات لەو ب عەیارێ د جەهان دا ڕەواج
ئابێ ڕەوان من دییە شعرا مەلا «يُنْكَرُ لِلماء لِسوءِ الْمِزاج»

دیسا ژ نوو بێ حالە دل[edit]

دیسا ژ نوو بێ حالە دل، ساقی وەرین جاما زوجاج موشتاقی خەمرا ئالە دل، لێ خوەشی ئانی بت مزاج
ساقی کو دێ مەهوەش بتن، کاکول ژ شێڤا ڕەش بتن قەرقەف بلا ئاتەش بتن، ئەم دێ ب وێ دل کین علاج
دا ئەم ب وێ دل حەی بکین، پێ سینە داغ و کەی بکین سەد مەنزلان پێ گەی بکین، ئەو دێ د سەیرێ دت ڕەواج
بێ نوور و نارێ موحبەتێ، بێ نەقش و وەسفێ قودرەتێ ناچین مەقامێ وەسلەتێ، «نورُ لَنا وَالَّليْلُ داج»
ئەڤ نار و سیقالا دلە، دائم ل وێ قالا دلە نەورۆز و سەرسالا دلە، وەقتێ هلێتن ئەو سراج
حەتتا ب نوورا بادەیێ، ڕەنگین نەکی سەججادەیێ دووری ژ وێ شەهزادەیێ، دوڕدانەیا گەردەن ژ عاج
دوڕدانەیا گەردەن بلوور، ڕەیحان ل سەر وەردێن د جوور هەی هەی ب مەستی تێنە دوور، خالا ل نک فەرقێ ب تاج
مهرا تە پوڕ ئەبتەر کرین، خالان ژ بەر بسکان دەرین زولفا موسەلسەل عەنبەرین، چین چین ژ چینێ تێتە باج
تەنها نە کوردستان ددن، شیراز و یەنگ و وان ددن هەر یەک ل سەر چەهڤان ددن، ژ ئەسپەهان تێتن خەراج
چەهڤێن بەلەک قەوسێن هەلەک، چەرخ و فەلەک غالب مەلەک «فی حُبِها عُمری دَلَك، والحب يجری فی عَجاج»
شاهد هەزار ڕەنگ خەمملین، ڕەقس و سەما پێ کەمملین ئیرۆ مەلا ئەم سەد دلین، ساقی وەرین جاما زوجاج