| «الله» سەحەرگاها ئەزەل، یەلموومێ عشقێ شوعلە دا
|
نوورا جەمالا «لم يزل»، زاتی تەجەللایا خوە دا
|
| زاتی تەجەللا دا ل زات، بێ ئسم و ئاسار و سفات
|
سررا حورووفێن عالیات، خەف بوو د ستر و پەردە دا
|
| زاتەک موقەددەس بوو وجوود، جووشش نەدابوو بەحرێ جوود
|
وەسفێ ئزافات و قویوود، یەک ژێ تەجەللایی نەدا
|
| حوسن و جەمالێ خوەست ئەڤین، ڤێکرا د یەک زاتی جڤین
|
نوورا قەدیم بوو عشق و ڤین، وان پێکڤە ناز و عشوە دا
|
| عشقا ژ نوورا «لا يزال»، حوسن و جەمالا بێ مسال
|
ئیساندی یەلمووم و شەمال، دیسا خوە لێ پەروانە دا
|
| عشق و مەحەببەت هەر هەبوو، حەق عاشقێ زاتێ خوە بوو
|
موحتاجی حوسنەک دی نەبوو، نەقل و روایەت ژێ وە دا
|
| بورهانێ عەقل دوورکر قیاس، ئسمێ کەمالاتێ د خاس
|
ئەووەل ئیلاهی پێ بناس، ڤێ نوورێ ئەو پەرتەو ڤەدا
|
| ئەو نوورە دا بوو شەوق و تاڤ، عالەم خویا بوو هەم د ناڤ
|
بەرقێن خوە ئاڤێتن بەلاڤ، ڕەنگ ڕەنگە ئەو نوور بەرقە دا
|
| سوبحان ژ ڕەمزا خالقی، نوورا سپێدا سادقی
|
ئاڤێتە قەلبێ عاشقی، لەرزین و تا و جەزبە دا
|
| مەعنایێ عشقێ بێم: چییە؟ لەو من ب چەشمێ دل دییە
|
عەکسا جەمالەک سافییە، زاهر د مرئاتا مە دا
|
| حوسن و مەحەببەت زاتەکن، مەعشووق و عاشق لاتەکن
|
ل سوورەت و مرئاتەکن، هەر یەک د مەعنایا خوە دا
|
| گەر دلبەر و گەر عاشقن، عارف د ڤێدا سادقن
|
ئایینەیێ نوورا حەقن، جی جی د وان دا جەلوە دا
|
| عاشق ئەوە مەعشووق ئەوە، زاهر ئەوە موزهر ئەوە
|
رووح هەر ئەوە گەوهەر ئەوە، د هەر شاهدەک دا شوعلە دا
|
| د هەر شاهدەک دا دێم ژ دوڕ، پوڕ نازدار و ڕەمز و سوڕ
|
خەتتێ غوباری نوقتە پوڕ، کاتب ژ بالا نەسخە دا
|
| حەرفێن کشاندی کاتبی، نوورا د ڕووح و قالبی
|
یەک یەک ب ئسمێ واهبی، ئعراب و جەزم و نوقتەدا
|
| نوورن ژ سەر حەتتا قەدەم، نەققاشێ سەرمەشقێ قدەم
|
پێ زەییناند لەوحێ عەدەم، یەک یەک د وان دا چەشنە دا
|
| ئەو شەکل و سوورەت سەوورین، ئەسلن ل بالا زەیینین
|
نسبەت ب وان ئەم سایەیین، تەرتیبێ خەللاقی وە دا
|
| عالەم ب عالەم ئەو نەسەق، بوو ئایینە ئەسمانێ حەق
|
نوورا تەجەللایا تەتەق، عەکسێ جەمالەک سادە دا
|
| هەر هەیئەتا ڕووح لێ و جسم، شەکلێ کو لێ دانی تلسم
|
هەر یەک ژ یەک ڕا بوو ئسم، لەو حەرف حەرف ئەندازە دا
|
| ئەم تێک هووییاتین یەقین، ئسمین ژ مەسدەر موشتەقین
|
مەوهووم و لاشەی، موتلەقین، عەکسین د نێڤ ئایینەدا
|
| پەرتەو ژ عەینی نوورەکێ، تێن تێن تەجەللا توورەکێ
|
ئەو سەر ددت یەک فوورەکێ، لەو چەندی لەب لەب قەترە دا
|
| ئەو شاهدێ زەررین ژ عەیب، هەر جەلوەیەک دایی ژ غەیب
|
ڤێ عالەمێ ئەو تێتە جەیب، دیسا ژ وێ ڕەونەق ڤەدا
|
| ڕەنگ ڕەنگێ حوسنا سوورەتان، نەقش و نگارێن دەسخەتان
|
بالا و بەژن و قامەتان، نازک لەبان پوڕ خەندە دا
|
| شێرین لەبێن قەد نەی شەکەر، سیمین بەرێن نازک بەشەر
|
زولفان ستار بوو ڕۆژ د بەر، بسکان ل مسکێ تەعنەدا
|
| گولدەستەیێن نوورین قەدەم، دەستان ژ ئەنگوشتان قەلەم
|
ئەو لالەیێ باغێ ئرەم، ماوەر ل زولفان ژالە دا
|
| هن ئەسمەرن هن دێم زەری، مەهـ پەیکەرن سوڕ موشتەری
|
ولدان و حوور و ئەو پەری، من دی د لبسێ جامە دا
|
| چەندی کو خەمل و ڕەونەقن، تەزیینێ حوسنا موتلەقن
|
تێک جلوەیێ نوورا حەقن، عشقا ئەزەل پێ شیوە دا
|
| حوسنا مونەززەهـ بێ نشان، وی لێ نڤیسی زەرکەشان
|
خال و خەتێن عەنبەرفەشان، هەر کەس ب وان دل یەغمە دا
|
| داروویێ حوسنا دلبەران، ب خەمل و لباس و زیوەران
|
بێتە شوهوودا بەسەران، بیناهییە د هەر دیدە دا
|
| بێتن د حوسنێ ڕەنگ ڕەنگ، ب نای و دەف و قانوون و چەنگ
|
ئەو عشقە ڤان تینت ب دەنگ، لەورا ب حوسنێ نەغمە دا
|
| سررا کەلامێ ئەقدەسی، دەم دەم د لبسێ ئەنفەسی
|
تێتن تەنەزوول بێ حەسی، نە ب گوفتوگۆ بوو قسسە دا
|
| وە دڤێ کو عوششاقن هەبن، دلدار و موشتاقن هەبن
|
وێ شەمسێ ئافاتن هەبن، دا کفش ببت د سپێدە دا
|
| دا کفش ببن کەوکەب ژ چەرخ، ڕابن هەزار مەعرووف ژ کەرخ
|
شبلی و سەعدی و ئالی فەرخ، عشقێ د وان کەشفا خوە دا
|
| دا حوسن و حوبب و مەزهەران، کفش کن ل هەر عەرد و دەران
|
عاشق بخوونن دەفتەران، دلبەر مەحەببەت نامە دا
|
| حوسن و جەمال و عشقەیە، ئارام د پەردەی دا نەیە
|
مەحبووب لەو حەتتا هەیە، نابت د پەردە و خەلوەدا
|
| مەحبووب و خووب و دلبەران، بگری ل وان هەفتێ دەران
|
دێ خوە ژ شوبباک و پەنجەران، زاهر بکن د هەر دیدە دا
|
| ئەو لالەیێ ژ گول تازە تەر، فەسلا بوهارێ بێتە سەر
|
جی جی ب هەڤرا تێنە دەر، خوەش خوەش د عەردێ خارە دا
|
| ڕەمزەک غەریبێ فاتری، پەیدا ببت نێڤ خاتری
|
قووەت تە نینن ڕاگری، خەف کی د نێڤ قەلبێ خوە دا
|
| مەفهووم کو بوو مەعلووم د دل، زیوەر بدێ تێ سەد عەمەل
|
بینت لباسەک پوڕ خەمل، هندی کو سەعی و جەهدا دا
|
| لەفز و عبارەت جامەیە، مەحبووب مەعنا ب خوەیه
|
لێ خەمل و حوسنەک زێدەیە، لەورا ب حوسنێ زیبە دا
|
| من ئەڤ مسال لەو بۆ تە بەست، زۆران ب زولفان دل ڤەبەست
|
هەر چ تە دی سوورەت پەرەست، دوڕێ یەتیم بێ فەیدە دا
|
| پیس و خەراب و زشت و عار، ما ئەو ب خەملێ تێنە کار
|
ئێ د قەیدێ لبسێ نەدیە یار، حوببێ ب خوە داڤێ نە دا
|
| چارێ هلین یارێ ببین، نە پەردەیا تاری ببین
|
سەد جاری ئەو کاری ببین، گول وێ دنێڤا بوغچە دا
|
| ئەو بوو مورادا کردگار، لەو کر ئرادە و ئختیار
|
ڤێ بوغچەیێ هەر لێ بوهار، گوڵ گەش د باغێ غونچەدا
|
| بایێ ئەڤینێ کو لڤی، هاتن ل سەر زولفان چڤی
|
هەر دەم هەزار دل داکەڤی، خالان د دامێ دانە دا
|
| بەحرا وجوودێ جووش هات، نوورەک تەنەززول بوو ژ زات
|
هاتن تەعەییون هەر سفات، ئەشیا زوهوور علمییە دا
|
| ئەشیا د علمی بوون زوهوور، ئسمان ژ فەیزا ئسمێ نوور
|
تەقویم بەستن بێ قوسوور، حوکمێ سفاتێ سەبعە دا
|
| ڤێ عالەمێ تەقویم بەست، هەر ئسمەکی فعلا خوە خوەست
|
حوکمێ تەسەرروف دا ب دەست، هەر وێ د مولکێ قەبزە دا
|
| ئەعراز و عەین و جەوهەران، واحد ژ ئەسلێ مەسدەران
|
تەئسیر بەخشێ مەزهەران، سەد ڕەنگی، حەرفان سیغە دا
|
| فەیزا حورووفێن عالیات، بەحسا سوتوورێن سافلات
|
ئایات و وەسفێن موحکەمات، تەرتیبێ عوشر و سوورە دا
|
| کاتب نڤیسین ئەو حورووف، هەر تالبەک پێ بوو ووقووف
|
هاتن ژ دل سەد ئاهـ و ئووف، سەر خەت ل لەوحێ سادە دا
|
| ئەو دەسخەتێ کاتب سەمەد، واحد ل سەر لەوحا ئەحەد
|
نەقشەک ڕەشاندی بێ عەدەد، جەعدا جەمالێ شانە دا
|
| ئەسما د کامل ڕاس کرن، جە جە قوائیل ڕاس کردن
|
بالا فەواعل ڕاس کرن، ژێ عللەتەک سوورییە دا
|
| ئەسما موقابل بوونە زەوج، لێ جوملە ژێ بوون فەوج فەوج
|
بەحرا ووجودێ هاتە مەوج، مەوجان د بەحرێ لوججە دا
|
| جووشش کو دا دەریایێ جوود، د ئایینەیا ئسمێ وەدوود
|
جارەک تەجەللا بوو ووجود، نوورەک ژ نوورێ ژێ ڤەدا
|
| فوورەک ژ نوورێ وی ڤەکر، گەنجا زوهوورێ پێ ڤەکر
|
کەنزا خوە قوفل و مفتە کر، هێژ وێ د قوفل و مفتە دا
|
| حوسنەک مونەززەهـ سەووراند، نوورا حەبیب ژێ ئافراند
|
عالەم د کونهێ حەییراند، «روح القدس» جان نەفخە دا
|
| عەرشێ جهات لێ بوو حەیات، ئەو شاهدێ قودسی سفات
|
ژێ بوو تەعەییون نوورێ زات، سەیوانێ شەوقێ هالە دا
|
| عشقا ژ حوسنێ سەووری، غارەت کرن حوور و پەری
|
هەرچی د کونهێ فەککری، ئەو ما د عەجز و حیرە دا
|
| ئەو سوورەتێ مرئاتێ حوسن، ژێ بوو زوهوور ئایاتێ حوسن
|
لێ بوو تەجەللا زاتێ حوسن، ڤێ حوسنێ ئەو سەرچەشمە دا
|
| سەرچەشمەیا حوسنێ ئەوە، خورشید و عالەم پەرتەوە
|
گەهـ بەدرە گەهـ ماهێ نەوە، وەر موشتەری یان زوهرە دا
|
| ولدان و حوورن گەر پەری، شیرین و مەحبووبێن بەری
|
جوملە ژ حوسنا خاوەری، نوورێ دوان یەک زەررە دا
|
| نارێ ژ نوورا ئەحمەدی، سررا سفاتێ سەرمەدی
|
د ئایینەیا زاتێ خوە دی، کەشفا کەمالاتێ خوە دا
|
| ئەو بوو قەلەم ئەو بوو عەقل، لەو بێ حەدیسێ دا نەقل
|
دەریایێ علمی کر شوغول، تەفسیلێ علمی جوملە دا
|
| ئەو بوو د جوملە رابتە، میزان و ئسمێ باستە
|
فەیزا حەق ئەو بوو واستە، چەشمێ ووجوودێ سورمە دا
|
| یەک بوو ئەلیف وێ نوقتە کر، چەندی شەکل لێ زێدە کر
|
هەردەم پەیاپەی سفرە کر، بالا ب بالا روتبە دا
|
| واحد ژ نوورا وێ دوڕێ، پەیمانەئێ جاما سوڕێ
|
مەی خستی ئانی بەر فڕێ، هەم جام و هەم پەیمانە دا
|
| غەیب و مسالن هەر دو سلک، پەیوەستە ئانی میمێ مولک
|
ئەو کاتبێ ئەلماسی کلک، ژ وی خامەیی ئەڤ ڕەشحە دا
|
| نوورا تەجەللا هاتە عەرش، ئەسما حەمی لێ بوونە نەقش
|
شەوقا د وان چوو تا ب فەرش، ئسمان ب زاتی سەجدە دا
|
| کاتب قەلەم دیسا گەڕاند، ئسمەک ژ ئسمان سەووراند
|
کورسی ژ نوورێ ئافراند، جەنناتێ خولد و سدرە دا
|
| سەر چەشمەیا ڤێ دۆزەخێ، بەحرا جەمالێ دا ڕەخێ
|
فەیزەک ژ نوورا بەرزەخێ، داگرت و گەهـ گەهـ فوورە دا
|
| ئەو بەرزەخا ڕەنگ ئایینە، هنگی کو ئەشیا دایینە
|
وان تێ شەمال ئیسایینە، ژێ سوورەتەک عەکسییە دا
|
| وەسف و کەمالاتێن سوبووح، حەرفێن کتابا عەقل و ڕووح
|
ئسمەک دڤێ لێ بن وزووح، لەو لەوح و کلک و خامە دا
|
| ئەو نوسخەیا عالی ئسم، لەوحەک دڤێ ژێڕا جسم
|
دا حەرف لێ بن مورتەسم، حەرفان شەکل نوورییە دا
|
| لەفزێ کو مەعنایەک دڤێ، تەرکیبێ ئملایەک دڤێ
|
سوورەت هەیوولایەک دڤێ، ڕووحان د نەفسێ جوسسە دا
|
| ما تێنە دیتن حوسن و سوڕ، بێ بەژن و بالایێن ژ دوڕ
|
کاتب ژ وان حەرفێن د پوڕ، نوونەک خەیالی بەسمە دا
|
| دوڕدانەیێن خاوەر مسال، ئایینەیێن تێدا شەمال
|
نوورەک مونەززەهـ ئەو جەمال، مەی کر د نێڤا شووشە دا
|
| ڕووحانیێن قودسی مسال، تێنە لباسێ خەتت و خال
|
ساقی مەیا گولگوون و ئال، تینت د فنجانا مە دا
|
| مەی کو د جامێ بێتە نووش، بێ دەنگ و سەوت هەر تێتە گووش
|
ژێ تێتە دل هەردەم سورووش، لەو نەڤ شەراب ئالوودە دا
|
| ئەڤ ڕەنگ تەجەللا کر سوبووح، ساقی ژ شەهکاسا فوتووح
|
مەی ڕێهتە جاما عەقل و ڕووح، ڕۆژ بوو د قەوسێ قوببە دا
|
| ڕۆژ بوو د نێڤا نەینکێ، کاتب ژ حەرفێ عەینکێ
|
نێڤ گۆشەیا قەوسەینکێ، توغرا ب ئسمەک تازە دا
|
| تەی کر د نێڤ توغرایێ ئسم، تەکسیر ژ حەرفان کر تلسم
|
حوسنا موقەددەس بوو دو قسم، حوکمێ تەجەللایێ وە دا
|
| یەک عەقل و ڕووحێ ئەعزەمە، مسباح و نوورا عالەمە
|
حەوواء و نەقشێ ئادەمە، بێ موددە هەم بێ ماددە دا
|
| ئێ دی کو نەفسا کوللییە، حوسنەک مونەززەهـ عالییە
|
ئەو ژی ب ڕووح ڕا ئەسلییە، وان هەر د هەڤ دا سایە دا
|
| ئایینەیێ زاتێ یەکن، لەو دلبەر و لاتێ یەکن
|
ڤێکرا د مرئاتێ یەکن، هەمتا د ناز و عشوە دا
|
| ئەو تێن ب جەمعێ فرع و ئەسل، مائل دبن ڤێکرا ب وەسل
|
نابن ژ یەک فەرق و فەسل، حوکمێ وسالێ لێ وە دا
|
| ڤێکرا کو بوون وەسل و جەمع، بارین ژ مابەینێ لەمع
|
ئیسا ژ ئەرواحان شەمع، شەمعا نوفووسان شوعلە دا
|
| ئیسا ژ ئەرواحان قەبەس، پوڕ شوعلەتێن نوورین قەفەس
|
نەفسان ب عشقێ دا نەفەس، قەلبان ب حوببێ لەهجە دا
|
| ئەو لاتێ حوسن و عەینێ نوور، سوورەت ب سوورەت تێن زوهوور
|
ئنس و پەری ولدان و حوور، جی جی د وان دا جلوە دا
|
| هەر یەک ژ فەیزا ئسمەکێ، تێن سوورەتا تللسمەکێ
|
لەو مەعنەیا هەر جسمەکێ، پەرتەو ژ نوورێ لێ ڤەدا
|
| دا سڕڕێ تەولیدێ ببێم، نە ژ وەهم و تەقلیدێ ببێم
|
مەعنا ژ تەوحیدێ ببێم، دل ڤێ ئەدائێ شەهدە دا
|
| مەعشووق و عاشق هەر دو لات، مەجزووبێ یەک دێ بن سفات
|
حینا کو بوو یەک ئلتفات، بەعزەک سفاتان حسسە دا
|
| «...ضع» حەرفێ بوو تلسم، لەو هات تەعەییون شەخسێ ئسم
|
سەر وا لباسێ ڕووح و جسم، شەکلێ ئەحادی سفرە دا
|
| های و هوویا سوببووحییان، ڕەقس و سەمایا قودسییان
|
تەشبیهی جووشا سووفییان، فەریاد و زکر و لەرزە دا
|
| وەستانە شاهد سەف سەفن، باتن د غەیبێ خەف خەفن
|
تەشبیهی بەرقا خاتفن، لامع د چەرخێ تسعە دا
|
| سڕڕا د جاما بادەیێ، یار هاتە نیڤا حەلقەیێ
|
مەدهووش و مەستێ وێ مەیێ، شووشا گولاڤ ئاشوفتە دا
|
| ڕەمزا د جاما شەربەتێ، خەف تێتە نێڤا سوحبەتێ
|
هەر چی کو فنجانێ دەتێ، وی جان ب نەزر و سەدقە دا
|
| شەمعا وسالێ هەر گەشە، شەوقا شەمالێ ئاتەشە
|
مەی تێتە جامێ بێ غەشە، ساقی عەجەب ئەڤ بادە دا
|
| ساقی عەجەب ئەڤ بادە ڕێت، عاشق ژ مەعشووق ئەڤ دڤێت
|
فنجان ب فنجان دا و مێت، کاما دلێ بێ چارە دا
|
| ئەشیا ل پەی هەڤ وەللدین، یەک یەک ژ وەسلێ بەددین
|
هەم مەسدەرین هەم مەوردین، ڤێ قولزەمێ ئەو ڕەشحە دا
|
| ئەڤ ڕەشحە دا وێ قولزەمێ، مەی هاتە تاسا عالەمێ
|
جاما جەهانبین دا جەمێ، ب ئەسکەندەری ئایینە دا
|
| عەکسا ژ حوسنا مەیفرۆش، ئاڤێتە فنجانێن ب پووش
|
ناگەهـ د جامان هاتە جووش، فووری د نێڤا کووزە دا
|
| ساقی ژ ڕەنگێ بولبولە، ئاڤێتە چەرخێ غولغولە
|
ڕووحان ل دۆرێ سلسلە، گۆڤەند و ڕەقس و حەلقە دا
|
| مەحبووب خوە نیشاندا سەفێ، جارەک د جاما قەرقەفێ
|
هاتن ب ئاوازێ دەفێ، تەنبوور و چەنگێ نەغمە دا
|
| عەینی تەبیعەت جوزء و کول، بشکفت د وی باغی دو گول
|
عشقێ گەڕاندی جامێ مول، حوسنێ د وان دا پەنجە دا
|
| بەرزەخ ب بەرزەخ بوونە ڕاست، نینن د نێڤ دا کێم و کاست
|
مەنزل ب مەنزل هەر گوهاست، دورجێ لوئالی حوققە دا
|
| ئاڤێتە دوڕدانا خوە دوڕ، ئیساند ژ مسباحا خوە سوڕ
|
دۆلابێ نەجمێ نەحس و کوڕ، مهرا ستێرا سەعدە دا
|
| چەوگانێ بایێ لامەکان، فولکا فەلەک قائم سەکان
|
تەشبیهی گۆ دا بەر شەکان، هەر بێ سوکوون و سەکنە دا
|
| ئەو کاملێ بێ عەیب و نەقس، نەهـ چەرخ ب هەر یەک نەوع و شەخس
|
وی یەک ب یەک ئانینە ڕەقس، تێ سەبعەیێ سەییارە دا
|
| هەر نەهـ د ڤێ چەرخ و لەزێ، چەرخن ل دۆرا مەرکەزێ
|
بەحرا دو عالەم لێ کەزێ، تێ ئەڤ حەباب سەرگەشتە دا
|
| بەحرا دو عالەم لێ زەبەد، مەوج و حەبابن هن جەمەد
|
پەیوەستە تێتن جەزر و مەد، سەیوان ل سەحرایێ ڤەدا
|
| ئەو خەیڤەتا کەوکەب مسال، گەهـ بەدر و مەهـ لێ گەهـ هلال
|
سێزدە دوازدە ماهـ و سال، چەرخن د سەیرا تسعە دا
|
| من دل ژ فەهمێ قاسرە، ژ وێ سوورەتێ چارپا کرە
|
پێ کر تەمام ئەو دائرە، نەقشەک ژ وێ تەروەندە دا
|
| یەک یەک ژ تەقویما قەدیم، لێ بوو نەسەق حوکمێ حەکیم
|
ئاڤێتە وی لەوحێ ڕەقیم، ئەو عالەما سوفلییە دا
|
| هنگی کو خەتت و نوقتەنە، ئەوزاع و ئەشکال تێ هەنە
|
هەر یەک ب مقدارێ خوەنە، ئەسلا تەسەوور ڕێ نە دا
|
| مقدار و شەکلێ هەندەسی، کێم زێدە یەک پێ ناحەسی
|
تەسویر دکر ئەقلیدەسی، حەتتا د سەتحێ سوفلە دا
|
| مەسرەف د ناڤ ڤان مەشعەلان، قەتعا مەسافا مەرحەلان
|
سررا بورووج و مەنزلان، ڕەسما سولووکێ جاددە دا
|
| ئەو یەک ب یەک خالی نەهن، بێ حکمەتەک عالی نەهن
|
گەر ڤان سوڕەک حالی نەهن، ڕەقسەک چڕا مەستانە دا؟
|
| مەستانە گۆڤەندێ دکن، ڕەقسێ ل دۆر فەندێ دکن
|
قەستا شەکەرخەندێ دکن، لەعلان ژ گەوهەر خەندە دا
|
| تێ بایێ چەرخ و لەولەبان، تەدویر و سەیرا کەوکەبان
|
شەعسانییا ڕووز و شەبان، دۆلابێ هەر ژێ تێ سەدا
|
| سوورەت ب سوورەت لێ کشاند، لەوحێ هەیوولا نەققشاند
|
زیرئاب ژ نوورێ لێ ڕەشاند، تەقویم و شەکل و خانە دا
|
| کاتب د چەرخێ جەدوەلێ، خوەش نەقش ئاڤێتێ وەلێ
|
کر حاشییا هەفت هەیکەلێ، نێڤ کوللیاتێ خەمسە دا
|
| دانین د پەرگاران ئەسل، بەستن موقابل دەهـ فەسل
|
ڤێکڕا دەوائر بوون وەسل، بەرزەخ ب بەرزەخ حسسە دا
|
| چار عونسرن چار تەبعەتن، ڤێکڕا ب میزان ڤێک کەتن
|
ب هەڤڕا موخالف سیرەتن، لێ د سوورەتێ شەخسییە دا
|
| حەتتا ب میزان چار ئەسل، ب هەڤڕا نەبن جەمع و وەسل
|
جسمان ژ هەڤ نابن فەسل، بازوو ژ بازوو شەق نەدا
|
| چار ئوممەهاتن سێ بەنات، هەر بێ قەرارن بێ سەبات
|
پوڕ عشق و مەیلن ئلتفات، د ڤێ تازە دەیری کوهنە دا
|
| هن سوفلەوی بازی دکن، هن مەیلێ ئەڤرازی دکن
|
خوەش ڕەقس و شەهبازی دکن، سەرگەشتەنە د حالێ خوە دا
|
| هەر هەیئەت و هەر جسمەکێ، هەر فەرد و نەوع و قسمەکێ
|
ڕووح وێ ب دەستێ ئسمەکێ، هەر وێ د قەبز و پەنجە دا
|
| کوللاب ب دەستێ واهبە، یان ڕاکدە یان جازبە
|
یان خافزە یان ناسبە، یان رەفعە و یان جەزمە دا
|
| ئەو جەزمە دایی مەرکەزان، ئێ دل ژ بەر شەوقێ لەزان
|
حکمەت ب قانوونێ بزان، ئەهلێ دل ئەڤ ژێ گوفتە دا
|
| ڕەمزا د نەجم و هەیئەتێ، عەقلێ موجەررەد نارەتێ
|
بێ نوورێ علمێ وەحدەتێ، ئەو ما د شەکک و شوبهە دا
|
| فەییازێ علمێ «من لدن»، پەی پەی ژ بەحرا کان و کون
|
گەهـ گەهـ ب ئوستادێ سوخون، وی گەوهەرێ ناسوفتە دا
|
| فەیزا عولوومێ فەلسەفە، هاتی د نێڤ چەنگ و دەفە
|
من دی د جامێ دا خەفە، فنجان ب جان من جورعە دا
|
| هەر نەهـ فەلەک لێ کاخەکن، دوور و دراز وەک ئاخەکن
|
تێ دارن ئەو ژی شاخەکن، ڤێ تەرحێ ئنسان میوە دا
|
| ئنسان بەره عالەم درەخت، سولتان ژ خەلوەت هاتە تەخت
|
پێ زەیینین ئقبال و بەخت، دەولەت ژ بالا تالە دا
|
| سولتان ژ بالا هاتە خوار، لاهووت د ناسووتێ ڤەشار
|
پەیوەستە بوو نوقتە و مەدار، دەورا عورووجێ گەڕ وە دا
|
| دەورێ گەهاندن هەر تەرەف، مەحبووب ب فنجانا سەدەف
|
عاشق گەڕاندن سەف ب سەف، دوڕدانەیێ سەیوان ڤەدا
|
| ساقی کو دا من ئەو سولاف، فەیزا مەیا گولگوون و ساف
|
زائل کرن شوبهە و خلاف، علمەک ژ بەژنێ روقعە دا
|
| علمەک نەما دل پێ نەمووج، قەلبی د عشقێ کت عورووج
|
دێ تەی بکت چەرخ و بورووج، شەهپەڕ د دارا سدرە دا
|
| دۆلاب و چەرخێ نەهـ فەلەک، پێش دەستی کورسی بوون هەلەک
|
سەرگەشتە هاتن ئەو گەلەک، د وێ نوقتەیا مەوهوومە دا
|
| ئەحسەن ژ ڤی نەزمێ لەتیف، چەندی سڤک هاتی خەفیف
|
مەحبووب ب دەستێ خوەی شەریف، نەقدێ مە موهر و سککە دا
|
| ئەحسەن ژ ڤی وەسفێ رەفیع، ئەشکال و ئەوزاعێن بەدیع
|
تێتن ژ نوورێ وەک رەقیع، بێ عەیب و نەقس و ڕەخنە دا
|
| ئەحسەن ژ ڤی نەزمێ مەلا، ئەشکال و ئەوسافێن جەلا
|
لەو دل ب وان بوو موبتەلا، جەزبە و جەلالە د سینە دا
|