دن رین دل مخمور وے
دن رین دل مخمور وے
ہر آن ذوق سرور وے
واہ فقر دے دستور وے
واہ بے خودی دا پُور وے
تھیا محو عقل شعور وے
گیا فرق غیب حضور وے
تھئی واہمہ مقہور وے
تھیا نفس محض صبور وے
تھئی قلب عبد شکور وے
جذبوں بھری معمور وے
واہ کیتا عشق ظہور وے
تھیا غیر کُل مستور وے
ظلمت ڈسے سبھ نور وے
ہر جا تجلی طور وے
تھی مست جام طہور وے
آکھوں لغات طیور وے
جیں سمجھیا ایہہ مذکور وے
بے شک تھیا منصور وے
سٹ سوہنا یار غرور وے
بٹھ ظلم قہر کلور وے
کر لطف مہر ضرور وے
ہے یار سخت غیور وے
رہ اپنے آپ توں دُور وے
تھی قرب وچ مسرور وے
|
This work was published before January 1, 1929, and is in the public domain worldwide because the author died at least 100 years ago. |