داغ دل اپنا جب دکھاتا ہوں

From Wikisource
Jump to navigation Jump to search
داغ دل اپنا جب دکھاتا ہوں
by تاباں عبد الحی

داغ دل اپنا جب دکھاتا ہوں
رشک سے شمع کو جلاتا ہوں

وہ مرا شوخ ہے نپٹ چنچل
بھاگ جاتا ہے جب بلاتا ہوں

اس پری رو کو دیکھتا ہوں جب
ہو کے دیوانہ سدھ بھلاتا ہوں

مجھ کو دیتا ہے گالیاں اٹھ کر
نیند سے جب اسے جگاتا ہوں

جب مجھے گھیرتا ہے غم تاباںؔ
ساغر مے کو بھر پلاتا ہوں


This work was published before January 1, 1929, and is in the public domain worldwide because the author died at least 100 years ago.