خوگر لذت ہوں میں کس شوخ کی تعزیر کا
خوگر لذت ہوں میں کس شوخ کی تعزیر کا
دل کو حسرت ہے کہ پہلو ڈھونڈئیے تقصیر کا
تھا مرا ہنگامۂ وحشت ازل سے پیشتر
عرش کی زنجیر ٹکڑا ہے مری زنجیر کا
مر گیا زنداں میں جب میں وحشیٔ آتش نفس
بجھ گیا شعلہ چراغ خانۂ زنجیر کا
سخت جانی سے دل مضطر جو تڑپا وقت قتل
بن گیا سنگ فساں قاتل تری شمشیر کا
ہو کے بسمل آرزوئے گفتگو قاتل سے ہے
ہر دہان زخم نقشہ ہے لب تقریر کا
اتنی ہے مشق تصور انتظار قتل میں
مردمک ہے آنکھ میں جوہر تری شمشیر کا
جان کر ٹھنڈی ہوا وہ چین سے سوتے تو ہیں
دم بھروں کیوں کر نہ آہ سرد بے تاثیر کا
ہوتا ہے انسان پیدا واسطے فریاد کے
یہ اشارہ ہے سریر خامۂ تحریر کا
روح آ جاتی ہے تن میں تیغ عریاں دیکھ کر
مرغ جاں بلبل ہے باغ جوہر شمشیر کا
آج تک آواز آتی ہے دہان گور سے
ہے یہ مدفن کشتۂ تیغ لب تقریر کا
اور دونا غم اٹھایا کی مٹانے کی جو فکر
داغ حسرت ہو گیا لکھا مری تقدیر کا
رفتہ رفتہ یوں گھلایا قید میں غم نے نظرؔ
طوق گردن پاؤں میں حلقہ بنا زنجیر کا
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse