حسینوں پر کسی کا جب دل ناشاد آتا ہے
حسینوں پر کسی کا جب دل ناشاد آتا ہے
ہمیں اپنی جوانی کا زمانہ یاد آتا ہے
ستانے جب کوئی ہم کو ستم ایجاد آتا ہے
خدا بخشے دل مرحوم کیا کیا یاد آتا ہے
مبارک تجھ کو اے شوق شہادت وقت آ پہنچا
عجب انداز سے خنجر بکف جلاد آتا ہے
قیامت سے سوا دھومیں مچی ہیں اس کے آنے کی
سوئے محشر کسی کا کشتۂ بیداد آتا ہے
نہ اب وہ حسن باقی ہے نہ اب وہ عشق باقی ہے
تمہیں اپنا ہمیں اپنا زمانہ یاد آتا ہے
نہیں تھمتے کسی کی آنکھ سے آنسو نہیں تھمتے
تری محفل میں جب ذکر دل ناشاد آتا ہے
تماشا ہے ترے کوچے میں آنے جانے والوں کا
کوئی ناشاد جاتا ہے کوئی ناشاد آتا ہے
وہ زنجیر جنوں ہے جس میں کڑیاں ہیں محبت کی
مجھے حکم اسیری بھی بلا میعاد آتا ہے
نشیمن میں قفس میں فرق بس اتنا ہے اے صفدرؔ
ادھر صیاد جاتا ہے ادھر صیاد آتا ہے
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse