جان کر کہتا ہے ہم سے اپنے جانے کی خبر
جان کر کہتا ہے ہم سے اپنے جانے کی خبر
جی ڈوبا دیتی ہے میرا یہ بہانے کی خبر
اس چمن میں کون ہے دل سوز اپنا تجھ سوا
رکھیو ٹک اے برق میرے آشیانے کی خبر
پوچھتا نیں اپنے کوچے میں تو میرا حال ہائے
لے تھی لیلیٰ دشت میں اپنے دوانے کی خبر
ہیں قفس میں جب سے ہم اس سنگ دل صیاد کے
اشک ہی لیتا ہے میرا آب و دانے کی خبر
ہم نہ جانیں کس طرف کعبہ ہے اور کیدھر ہے دیر
ایک رہتی ہے یہی اس در پہ جانے کی خبر
ہر گل داغ جنوں پر اور ہے کچھ آب و رنگ
پھیر ہے گلشن میں گویا گل کے آنے کی خبر
آج سینے میں مرے دل ہے نپٹ ہی بے قرار
دے ہے حسرتؔ غیر کے گھر اس کے جانے کی خبر
|
This work was published before January 1, 1929, and is in the public domain worldwide because the author died at least 100 years ago. |