تھا نجم بخت تیرہ مقابل تمام رات
تھا نجم بخت تیرہ مقابل تمام رات
آنکھوں تلے پھرا مرے قاتل تمام رات
ہاروت ساں ذقن میں رہا دل تمام رات
گزری میانۂ چہ بابل تمام رات
کس گل نے گل کیا تھا مری شمع گور کو
تھا قبر پر ہجوم عنادل تمام رات
دھبہ لگے نہ رنگ سفید و سیاہ میں
ہے گو تمام دن کے مقابل تمام رات
روشن تھی صبح تک مرے مدفن پہ شمع طور
رویا کھڑے کھڑے مرا قاتل تمام رات
اے رشک مہر و مہ ترے منہ پر نثار ہے
سورج تمام دن مہ کامل تمام رات
جاتی تھی یاد گیسو و رخ میں فلک پہ آہ
مہتاب تھا اسیر سلاسل تمام رات
کرتے ہیں گل جو چاک گریباں تمام دن
سنتے ہیں نالہ ہائے عنادل تمام رات
کہتا تھا عرشؔ سچ میں سمجھتا تھا جھوٹ یار
کرتا رہا ہے حق کو وہ باطل تمام رات
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse