تجھ بے وفا کی آہ کوئی چاہ کیا کرے

by مرزا جواں بخت جہاں دار

تجھ بے وفا کی آہ کوئی چاہ کیا کرے by مرزا جواں بخت جہاں دار

تجھ بے وفا کی آہ کوئی چاہ کیا کرے
دل تجھ کو دے کے تو ہی بتا آہ کیا کرے

جس دل جلے کی تجھ سے لگے شمع ساں لگن
سر سے وہ گزرے اور تو واللہ کیا کرے

زاری فغاں و نالہ سبھی بے اثر ہیں آہ
اس سنگ دل کے دل میں کوئی راہ کیا کرے

اس ماہ کوچہ گرد کے تئیں ڈھونڈھتا ہوا
ہر شب گلی گلی نہ پھرے آہ کیا کرے

یعقوب کی طرح تو بہت روئے دیکھیے
اے یوسف زمانہ تری چاہ کیا کرے

جاتے ہیں سوئے دیر رہ کعبہ چھوڑ کر
حق میں ہمارے دیکھیے اللہ کیا کرے

کوئی ڈھونڈھتا کتاں کے تئیں یارو پر ہے غم
ملتا کہیں نہیں دل آگاہ کیا کرے

کی دل نے دلبران جہاں کی بہت تلاش
کوئی دل ربا ملا ہے نہ دل خواہ کیا کرے

اس کوئے زلف میں اے جہاں دارؔ جا پھنسا
دل کس طرح سے گم نہ کرے راہ کیا کرے