تاج
جان گلشن اور جانان بہار
جاوداں شمع شبستان بہار
افتخار روزگار بے ثبات
یادگار بزم ویران بہار
اک دماغ صنعت مرحوم ہند
اک چراغ زیر دامان بہار
عنبریں سبزے پہ مختار ارم
مرمریں افسر پہ سلطان بہار
واقعی تعبیر خواب حسن و عشق
آخری تصویر طوفان بہار
خامشی کا نغمۂ مواج ہے
تاج اب بھی رفعتوں کا تاج ہے
صبح جنت کی صباحت اس میں ہے
شام گلشن کی لطافت اس میں ہے
اس کے ہر لمحے میں اک تازہ بہار
اک نئی ہر وقت جنت اس میں ہے
مادیت اس کو چھو سکتی نہیں
روح کی گویا حکومت اس میں ہے
جلوہ کاری کم سے کم اتنی تو ہو
دیکھیے جب ایک ندرت اس میں ہے
حسن کی جو مایۂ ممتاز تھی
اب بھی پنہاں وہ امانت اس میں ہے
عشرت نظارہ کی معراج ہے
تاج اب بھی عظمتوں کا تاج ہے
تاج اک بجلی ہے لہراتی ہوئی
اک تجلی کیف میں ڈوبی ہوئی
یا جبین حور کی کوئی شکن
اک بیاض نور میں لپٹی ہوئی
بام و در سے گنبد و مینار سے
ہر طرف اک چاندنی پھیلی ہوئی
آہ یہ محفل ضیا و حسن کی
چاند تاروں سے مرتب کی ہوئی
اس کے ہر گوشے میں ذروں کی طرح
دولت کونین ہے بکھری ہوئی
ہے کہیں نیلم کہیں پکھراج ہے
تاج اب بھی صنعتوں کا تاج ہے
وسعت کون و مکاں کا آئنہ
جلوہ زار کہکشاں کا آئنہ
جس کو دنیا کھو کے روتی ہی رہی
اس متاع رائیگاں کا آئنہ
ایک بزم رفتہ کا ماتم گسار
اک نشان بے نشاں کا آئنہ
دل کشا تصویر صبح انجمن
داستان پاستاں کا آئنہ
عظمت ممتاز کی اک جلوہ گاہ
شوکت شاہ جہاں کا آئنہ
یادگار محفل تاراج ہے
تاج اب بھی حیرتوں کا تاج ہے
|
This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries). |