بھول کر بھی ادھر نہیں آتا

by قربان علی سالک بیگ

بھول کر بھی ادھر نہیں آتا by قربان علی سالک بیگ

بھول کر بھی ادھر نہیں آتا
وہ کبھی راہ پر نہیں آتا

کس کا جلوہ نظر سے گزرا ہے
کہ مجھے کچھ نظر نہیں آتا

چرخ گردش سے تھک گیا شب ہجر
دن نکلتا نظر نہیں آتا

بہہ گیا دل تو غم نہیں اے چشم
کام میں کیا جگر نہیں آتا

ہوں شب وصل اس قدر بے خود
بیم مرگ سحر نہیں آتا

کس گلی میں چلا ہوں مرنے کو
شوق میں کچھ نظر نہیں آتا

تیرا کوچہ اگر بہشت نہیں
جا کے کیوں نامہ بر نہیں آتا

پھیر دینی چھری تو آتی ہے
لطف صیاد اگر نہیں آتا

نو گرفتاری مصیبت دیکھ
ہم کو نالہ بھی کر نہیں آتا

دل کو کیا جانے کیا ہوا سالکؔ
چین کیوں رات بھر نہیں آتا