بلا ہی عشق لیکن ہر بشر قابل نہیں ہوتا
بلا ہی عشق لیکن ہر بشر قابل نہیں ہوتا
بہت پہلو ہیں ایسے بھی کہ جن میں دل نہیں ہوتا
نشان بے نشانی مٹ نہیں سکتا قیامت تک
یہ نقش حق جفائے دہر سے باطل نہیں ہوتا
جہاں میں ناامیدی کے سوا امید کیا معنی
سبھی کہتے ہیں لیکن دل مرا قائل نہیں ہوتا
تڑپنا کس کا دیکھو گے جو زندہ ہوں تو سب کچھ ہو
بلائے عشق کا مارا کبھی بسمل نہیں ہوتا
صدائیں دے رہا ہوں مدتوں سے اہل مرقد کو
سبھی سوتے ہیں لیکن یوں کوئی غافل نہیں ہوتا
سرشک غم کی حد شام و سحر میں مل نہیں سکتی
امنڈتے ہیں جو یہ دریا تو پھر ساحل نہیں ہوتا
دعا دے عشق کو اے ظلم تو بھی زیب پہلو ہے
وگرنہ کیسا ہی پیکاں ہو لیکن دل نہیں ہوتا
فراموشی ہے لیکن یاد رکھتا ہے ترے در کو
در اغیار پر ثاقبؔ کبھی سائل نہیں ہوتا
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse