بستر نرم پر وہ سوتا ہے

by میر مظفر حسین ضمیر

بستر نرم پر وہ سوتا ہے by میر مظفر حسین ضمیر

بستر نرم پر وہ سوتا ہے
یاں پس خیمہ کوئی روتا ہے

دھیان مژگان آب دار کا آہ
دل میں اک نیشتر چبھوتا ہے

وصل اس کا نہ پائے گا اے دل
کیوں عبث اپنی جان کھوتا ہے

قطرۂ اشک کا اثر دیکھو
کہ کدورت دلوں کی دھوتا ہے

جسے کہتے ہیں یاں سمندر سب
میرے اشکوں کا ایک سوتا ہے

تو تو غرق محیط عشق ہوا
ہاں دلا مجھ کو کیوں ڈبوتا ہے

ہو شب وصل طالب و مطلوب
کیا زمانے میں یوں بھی ہوتا ہے

شعر کہتا ہے اس طرح کے ضمیرؔ
جیسے موتی کوئی پروتا ہے