بتوں کا ذکر کرو واعظ خدا کو کس نے دیکھا ہے
بتوں کا ذکر کرو واعظ خدا کو کس نے دیکھا ہے
شرار سنگ موسیٰ کے لیے برق تجلیٰ ہے
یہ ہندوستان ہے یاں پربتوں کا روز میلا ہے
خدا جانے وہ بت اے مہرؔ دیبی ہے کہ درگا ہے
یہ ہندوستان ہے یاں پربتوں کا روز میلا ہے
کوئی کالی بھوانی کوئی دیبی کوئی درگا ہے
بتان ہند میں نام خدا کب کوئی تجھ سا ہے
تری زلفیں ہیں کالی اے صنم تو آپ درگا ہے
دل نالاں تمہارے حلقۂ گیسو میں کہتا ہے
میں ہندوستان میں ہوں کافروں نے مجھ کو گھیرا ہے
یہ کس کافر کی خاطر مہرؔ چکر میں تو رہتا ہے
یہ کس کے واسطے گردش فلک کے چرخ پوجا ہے
سیہ رومال گوری گوری گردن میں لپیٹا ہے
گلے ملوا دیا شام سحر کو کیا تماشا ہے
گلا وہ گورا گورا اس پہ اک رومال کالا ہے
وہی عالم مری آنکھوں میں اب دن رات پھرتا ہے
تصور اس صنم کا ہے ہمیں کعبہ سے کیا مطلب
چراغ اپنا ہے داغ دل ہے جو مندر میں جلتا ہے
کیا ہے خوں مرے دل کا بلدان اس کو کہتے ہیں
غم فرقت وہ کافر ہے کہ درگا پاٹھ کرتا ہے
جدا ہے نعمت دنیا سے لذت بوسۂ لب کی
وہ جوگی ہو گیا جس نے یہ موہن بھوگ چکھا ہے
شرارت سے شرارت ہے بتو للہ باز آؤ
جلاتے ہو جو میرے دل کو تم کیا یہ بھی لنکا ہے
حلال اس نے کیا خون مسلماں وائے بے دردی
ترا دست حنائی کافر اب یہ رنگ لایا ہے
ہمیشہ ہے یہ نالاں اس صنم کی یاد میں یا رب
جسے ہم دل سمجھتے تھے وہ ناقوس کلیسا ہے
بڑا اندھیر ہے کیوں کر نہ ہو دل کو پریشانی
سراسر پیچ کرتی ہے بلا زلف چلیپا ہے
عجب عالم نظر آیا ترے کوچہ میں او قاتل
کہیں کوئی سسکتا ہے کہیں کوئی تڑپتا ہے
کہاں وہ قد کہاں یہ کندہاے نا تراشیدہ
نہ سرو ایسا ہے نے شمشاد ایسا ہے نہ طوبیٰ ہے
بتا جائز ہے کس مذہب میں خون بے گنہ ظالم
تو ہندو ہے مسلماں ہے یہودی ہے کہ ترسا ہے
سنے مردہ تو جی اٹھے بدن میں روح پھر آئے
گلے میں اے صنم نام خدا کیا تان پلٹا ہے
خدا عالم ہے مضمون خیالی ہیں تصور میں
نہ مجھ کو کچھ تعلق ہے نہ میری اس کو پروا ہے
خدا جانے کیا کس بت نے کافر اک مسلماں کو
جنیو ہے گلے میں مہرؔ کے ماتھے پہ ٹیکا ہے
کیا کافر نے کافر مہرؔ سے مرد مسلماں کو
جنیو رشتۂ تسبیح داغ سجدہ ٹیکا ہے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse