اے مصور جو مری تصویر کھینچ

From Wikisource
Jump to navigation Jump to search
اے مصور جو مری تصویر کھینچ
by جلالؔ لکھنوی

اے مصور جو مری تصویر کھینچ
حسرت آگیں غمزدہ دلگیر کھینچ

جذب بھی کچھ اے تصور چاہئے
خود کھنچے جس شوخ کی تصویر کھینچ

اے محبت داغ دل مرجھا نہ جائیں
عطر ان پھولوں کا بے تاخیر کھینچ

آ بتوں میں دیکھ زاہد شان حق
دیر میں چل نعرۂ تکبیر کھینچ

ایک ساغر پی کے بوڑھا ہو جوان
وہ شراب اے مے کدہ کے پیر کھینچ

دل نہ اس بت کا دکھے کہتا ہے عشق
کھینچ جو نالہ وہ بے تاثیر کھینچ

دل ادھر بیتاب ہے ترکش ادھر
کھینچتا ہوں آہ میں تو تیر کھینچ

کچھ تو کام آ ہجر میں او اضطراب
شوخیٔ محبوب کی تصویر کھینچ

قیس سے دشت جنوں میں کہہ جلالؔ
آگے آگے چل مرے زنجیر کھینچ


This work was published before January 1, 1929, and is in the public domain worldwide because the author died at least 100 years ago.