ان کی آرائش سے میرے کام بن جائیں گے کیا
ان کی آرائش سے میرے کام بن جائیں گے کیا
دل کی گتھی شانہ ہائے زلف سلجھائیں گے کیا
وصل کے وعدے سے خوش ہو کر نہ مر جائیں گے کیا
نامہ بر ہنستا ہوا آتا ہے خود آئیں گے کیا
قیدیٔ غم تربتوں میں اور ان کو یہ خیال
کاٹنے میں اک شب فرقت کے مر جائیں گے کیا
کام اپنا کر چکے اہل وفا شک ہے تو ہو
سر نہیں باقی شہیدوں کے قسم کھائیں گے کیا
عرض مطلب کے لئے اے دل زباں کھلتی نہیں
کچھ اشارے میں کروں گا وہ سمجھ جائیں گے کیا
ہاتھ ادھر اٹھتا نہیں ہے تار ادھر باقی نہیں
دیں گے وہ کیا اور ہم دامن کو پھیلائیں گے کیا
قصۂ فرہاد و مجنوں کیوں سناتے ہو ہمیں
جب پریشانی سے مطلب ہے تو گھبرائیں کیا
مہمان کوئے جاناں ہو کے دل بیتاب ہے
میں تو سمجھاتا نہیں وہ بھی نہ سمجھائیں گے کیا
مست رہتے ہیں ہمیشہ مے فروشان جمال
ہم تو مانگیں گے کوئی ساغر وہ فرمائیں گے کیا
کیوں نہ چپ بیٹھوں قفس میں دور ہی فصل بہار
آہ و زاری سے مری موسم بدل جائیں گے کیا
تنکے تنکے کا خدا حافظ چلے ہم باغ سے
الوداع اے آشیاں اب جا کے پھر آئیں گے کیا
دل کی بیماری کا عقدہ کھولنا دشوار ہے
جو نہیں سمجھے وہ ثاقبؔ مجھ کو سمجھائیں گے کیا
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse