انہوں نے کیا نہ کیا اور کیا نہیں کرتے
انہوں نے کیا نہ کیا اور کیا نہیں کرتے
ہزار کچھ ہو مگر اک وفا نہیں کرتے
برا ہوں میں جو کسی کی برائیوں میں نہیں
بھلے ہو تم جو کسی کا بھلا نہیں کرتے
وہ آئیں گے مری تقریب مرگ میں توبہ
کبھی جو رسم عیادت ادا نہیں کرتے
جہاں گئے یہی دیکھا کہ لوگ مرتے ہیں
یہی سنا کہ وہ وعدہ وفا نہیں کرتے
کسی کے کم ہیں کسی کے بہت مگر زاہد
گناہ کرنے کو کیا پارسا نہیں کرتے
جو ان حسینوں پہ مرتے ہیں جیتے جی مضطرؔ
وہ انتظار پیام قضا نہیں کرتے
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author.
Public domainPublic domainfalsefalse