اس طرح زیست بسر کی کوئی پرساں نہ ہوا

From Wikisource
Jump to navigation Jump to search
اس طرح زیست بسر کی کوئی پرساں نہ ہوا
by امداد علی بحر

اس طرح زیست بسر کی کوئی پرساں نہ ہوا
یوں میں دنیا سے اٹھا داغ عزیزاں نہ ہوا

مستقل وضع رہی کچھ غم دوراں نہ ہوا
آندھیوں میں بھی غبار اپنا پریشاں نہ ہوا

وضع پر حرف نہ آئی دیا وحشت میں بھی
لفظ و معنی کی طرح میں کبھی عریاں نہ ہوا

وار کیا کیا نہ سہے تیغ حوادث کی مگر
ایسے بشاش رہے زخم بھی گریاں نہ ہوا

بجھ گیا دل کا کنول داغ سے جلتے جلتے
گل کسی شب یہ چراغ شب ہجراں نہ ہوا

سامنا ایسے بلاؤں کا رہا دنیا میں
ملک الموت بھی آئے تو ہراساں نہ ہوا

ایڑیاں میں نے یہ رگڑیں کہ گڑھے ڈال دیے
گورکن کا بھی میں شرمندۂ احساں نہ ہوا

مثل نے نالہ کشی میں مری گزری گزرے
دل میں ناسور تو یہ ہے کوئی پرساں نہ ہوا

ابرو جاتی اگر بے اثر آنسو بہتے
شکر انگشت نما پنجۂ مژگاں نہ ہوا

الفت ابروئے صنم کی ہوئی پتھر کی لکیر
محو دل سے خط قسمت کسی عنواں نہ ہوا

منحرف کیوں رخ محبوب سے ہے اے واعظ
تو مسلمان ہوا قائل قرآں نہ ہوا

دل سے نا چیز زمانے میں کوئی چیز نہیں
مول کیا مفت بھی جس کا کوئی خواہاں نہ ہوا

ہم بھی تو دیکھتے کس طرح نکلتے گر کر
چاہ یوسف یہ ترا چاہ زنخداں نہ ہوا

کپڑے پھاڑے سے بھی نکلے نہ حرارت دل کی
رشتۂ شمع کوئی تار گریباں نہ ہوا

نالہ کرنے کو بھی منہ چاہئے القیس حزیں
کوئی زنگولۂ جمازہ حدی خواں نہ ہوا

سفلہ و دوں نہ کبھی رونق محفل ہوں گے
جگنو دن سے کبھی عالم میں چراغاں نہ ہوا

اے جنوں نکلے نہ اک داغ سے حسرت دل کی
داغ مجھ کو ہے کہ طاؤس گلستاں نہ ہوا

ہائے شنگرف ہے لکھے کہ لب لعلیں ہے
بات یہ پوچھتے یاقوت رقم خاں نہ ہوا

کوئی لڑکا نہ دم قید ہوا دامن گیر
کوئی پتھر مجھے سنگ رہ زنداں نہ ہوا

اے جنوں کچھ نہ ملا آبلہ پائی کا مزا
گوکھرو پاؤں میں کیوں خار مغیلاں نہ ہوا

کیا فرومایہ بڑھے گا اسے ہمت کیا ہے
بحرؔ دریا کا کبھی چاہ میں طغیاں نہ ہوا


This work was published before January 1, 1929, and is in the public domain worldwide because the author died at least 100 years ago.