Һинең күңел

Һинең күңел (Шиғыр)
автор Лилиә Һаҡмар

Ижад итеү ваҡыты: 07.01.1997. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (77-се бит) ISBN 5-295-03798-3

Һинең күңел

Йәйғор ине күгең.
Күңелеңә
Һыя ала ине йыһан да,
Бәхет йондоҙарын бүләк иттең
Күктәремә һөйөү тулғанда.
Шик - ул ишек.
Эйе, ҡара тишек,
Үтеп ингән һайын киңәйә.
Яҡтылыҡ юҡ.
Нурға ынтылғандар
Ниңә, тигән һорау бирәләр.
Өндәшмәнең.
Ҡара эслеләрҙән
Ҡараңғылыҡ ҡына юлланың,
Яңыңдағы һөйөү фәрештәһен
Ябраилға тиңләп уйланың.

Күңелеңдең күге – ҡара болот.
Күк күкрәне.
Йәшен уйнаны.
Һәр бер уғы һөйөү күкрәгендә...
Мин ғәйепһеҙ, тиеп уйланың.
Уйнаның.

Болоттарың тетелеп тә бөттө,
Тик йәйғороң ниңә ҡалҡманы?
Һөйөү-Ҡояшың бит
Йыһан менән
Бергә күңелеңде ташланы.
Йәйғор ине күгең...
Хәҙер унда
Үҙеңә лә ҡыҫан урының.
Һиндә инем,
Инде Ай, Ҡояшлы
Йыһан атлы илдә булырмын.