Һағышлы ялҡын

← Юрый ғына

Һағышлы ялҡын (Шиғыр) автор Лилиә Һаҡмар

Хатың килде →

.Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (31-се бит) ISBN 5-295-03798-3

ҺАҒЫШЛЫ ЯЛҠЫН

Көн яп-яҡты, тик ҡояш юҡ,
Ямғыр яуа, ҡар яуа.
Һағыштарым даръяһында
Шатлыҡтарым бар ҙаһа?!
Барыһы ла бергә бөгөн
Тәбиғәт табынында:
Ҡайындар йәшел шәлдәрен
Әҙерҙәр ябынырға.
Йәй ҙә, ҡыш та, яҙ ҙа, көҙ ҙә
Урман ҡунаҡ-өйөндә –
Ҡарағай, ҡайындар бейей
Моңло ҡурай көйөнә.
Ел – ҡурайсы, ә сәскәләр –
Тамаша ҡылыусылар,
Был байрамға килеп еткән
Күпме ҡош-йыраусылар?!
Кемдер уфтана был көнгә –
Ҡояш та юҡ, һалҡын, тип.
Ә мин әйтәм: был – мөхәббәт,
Һағышлы ялҡын, тием.

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар