Яр башында,
Күккә тартылып үҫкән
Япа–яңғыҙ имән төбөндә,
Рәшәткәле яңғыҙ ҡәбер тора,
Төрлө уйҙар һалып күңелгә.
Туҡтап үтә унда юлаусылар
Уҙған саҡта уның янынан.
Ҡыҙыл йондоҙ уның баш осонда
Сағылып тора ҡояш нурынан.
Һәр яҙ һайын ҡалҡыу ҡәбер өҫтө
Еҫле сәскәләргә төрөнә.
Ҡарт имән дә, ботаҡтарын эйеп,
Яһап тора уға күләгә.
Ниндәй ҡәбер былай ул бер үҙе,
Кем ул, унда ҡасан күмелгән
Һыу ҡыҙымы, әллә йәш егетме.
Әйтсе йылға!
Әйтсе ҡарт имән!
Телһеҙҙәр шул улар,
Эс серҙәрен,
Шаһит булғандарын һөйләргә,
Ҡәбер - иҫтәлек ул
Ер тетрәткән,
Меңдәр ғүмерен киҫкән көндөргә.
Мең туғыҙ йөҙ
Егерменсе йылдың
Ваҡ ямғырлы көҙгө төнө ине.
Ҡотороноп тын ауылды баҫты
Ҡоралланған аҡтар төркөмө.
Һыҡраттылар әсә, сабыйҙарҙы,
Күгән, йоҙаҡтарҙы ваттылар...
Таң мәле ине,
Батыр комсомолец
Тимерханды тотоп аттылар.
Ул йығылды.
Бөйөк намыҫ аша,
Киләсәккә текәп күҙҙәрен.
Ул йығылды ысын һөйөү менән!
”...Ленин !”- тип һуңғы һүҙҙәрен.
Анты ине был һүҙ,
Тибеше ине,
Көсө ине ҡайнар йөрәктең;
Йондоҙо ине,
Тыны ине был,
Даны ине ҡыйыу йәшлектең.
Ул йығылды .Ләкин уның эше
Йығылманы ергә, ауманы,
Берләштерҙе тарҡау ярлыларҙы,
Дошмандарҙы ҡыуҙы, фашланы.
Ул төҙөгән комсо ойошмаһы
Бер сатҡыһы ине дауылдың,
Мәктәп асты,
Комбед ойошторҙо,
Яҡтыртҡысы булды ауылдың.
Ул сыныҡты,
Йөрәктәргә алып
Байраҡтарҙың һүнмәҫ ялҡыны.
Тыуҙырҙы ул ҡасҡын, бандиттарҙың
Ояларын серек шайкаһын.
Яңғыҙ ҡәбер тора яр башында
Төрлө уйҙар һалып күңелгә,
Унда ята батыр комсомолец,
Шаһит булып дауыллы көндәргә.
Һәр яҙ һайын ҡалҡыу ҡәбер өҫтө
Еҫле сәсәкәләргә төрөнә.
Ҡарт имән дә, япраҡтарын эйеп
Яһап тора уға күләгә.
