Ҡайҙа һин, Салауат?
“Таш диуар артында,
Уйҙарым Урал тау
Үрҙәрен артыла…”
Ҡайҙа һин, Салауат?
“Һөйәгем аҡ ташта
Сал диңгеҙ төбөндә,
Ә йәнем, ә йәнем
Әйләнде диңгеҙгә,
Тамсыҡай һут булып
Ҡайтырға илемә…
Дауылда тулҡындым,
Әйләндем болотҡа…
Мин ҡайттым!
Онотма!
Илеңде, ереңде
Ҡоротма, ҡоротма!
Булырмын яныңда,
Урманда, болонда…
Туғайҙа юшаған
Тай-тулаҡ, ҡолонда,
Уралым буйында…”
Ҡайҙа һин, Салауат!
“Хаҡым юҡ үлергә!
Мәңгегә йәшәргә
Ҡайттым бит илемә.
Йәшәрмен!
Ҡоротма, һулытма
Еремде,
Телемде
Һин генә! Һин генә…”
