Ғәйет ҡорбан. Шәйехзада Бабич

From Wikisource
Jump to navigation Jump to search

Ғәйет ҡорбан (шиғыр)
автор Шәйехзада Бабич
Сығанаҡ: Бабич Шәйехзада. Беҙ үҙебеҙ - башҡорттар: шиғырҙар, поэмалар, фельетондар, мәҡәләләр, хаттар, көндәлектәр. - Өфө: Китап, 1994. - 640 бит.


Ғәйет ҡорбан


Һөйөнөгөҙ, дуҫҡайҙарым! Байрам бөгөн, ҡорбан бөгөн;
Һәр мосолман ҡәлбенә байрам ҡошо ҡунған бөгөн.
Һайрай ул ҡош: "Алла әкбәр, Алла әкбәр!" - тип ҡуя,
"Һөй, мосолман, байрамыңды, Алла яҡлар!" - тип ҡуя.

- Һөй, һөйөн, йырлап ебәр, ырғыт бөтә зар-моңдарың,
Алла һаҡлар, һаҡлап уҙҙырһаң был байрам көндәрен.
Алла маҡтар, маҡтаһаң байрамды, бик йәмле тиһәң,
Алла әкбәр, Алла әкбәр, Лиләхмәд... тиһәң.

Кил, туғандар, бер туған күк берләшеп сайран итик,
Ҡайғы-хәсрәттәр таралһын, гөрләшеп байрам итик...
Кил, мосолман, бир ҡулыңды, бир, ҡыҫайым шат йән менән,
Ас иманлы йөҙкәйең, ҡотлап үбәйем байрам менән!..


1916