Янгамо (2006)/Ламбамо нартемкс/6
[63]
— 6 —
Чипаенть келей, сырнесэ валозь вакан ёнов молиця чамазо эль кирдеви мизолкстонть. Мезес кецнесь, мезень мельспаро стардызе — сонсь содась. Варма сульть костояк а маряви. Качамось кудонь трубатнестэ лиси видестэ-видестэ. Менель ёжонтень педясть — кавтолдыть, а содыть, кона ёнов сыргамс, — ашназа-сэнь пельнетне. Кудотнень икельга кальтне явавтнить удомаст ды арсить од чинть ютавтомадо. Кодамо сон карми, те чись?
— Шказо ушодомс, ават-цёрат! — виев, прок аволь атяньгак вайгельсэ рангстась Куляз атя, Элювань шабразо, одониянть прясто, конань аволь умок сонсь вачкакшнызеяк, ды теке басом, эвтемань апак сода, [64] ливчанясто ушодсь пултнэнь макснеме, кой-кува кайсеме кундсицятнень пильге алов.
— Уф! — эрьва пултонть сянгсо кундамсто аволь пек марямга, нурькинестэ оймень таргазь, мернесь якстере сакало Юртай. Сон сынст эреккестэ венстнесь-кайсесь кандтницятнень икелев.
— Иля вакно, седе эрязасто кедтнесэ яксевтть! — пеедькшнезь, пултнэнь кандтнемадо сеедьстэ лексезь, серьгедсь Юртайнень Олдай. — Каня а неят, якстере эвсь, — а кенерят мельганок?
— Эрде, эрде, начко пулот, ансяк кандтнеде, — эзь максо пря, пукшоскак эзинзе путо згилямонь валтнэнь «якстере эвсесь». А мезть кежиявтнемс, тетязо казинзе тензэ якстерть-тюжа чертнень-сакалтнэнь ды лапужа судонть. Ков молят...
Кузаень Мияна, омбоце ёндонь шабрань аваломанесь, седе ламо чатьмонсь. Керязонь Валдоня, Элювань уряжонзо тейтерь, Олдай ды Элюва сонсь вачкасть анокстазь таркас кандтнезь пултнэстэ «пандят». Эрь, пивсыця, пивсэк, чукак! Иля вансто виеть!
Пурнавсть аватне ве курынес. Оймень полавтомо. Ёвтама, кие мезе течи пансь, кинь чапаксозо беряньстэ кепететсь, кие зяро потявтсь скалстонзо, кинь мезезэ сэредсь, кинень якась...
— Мезе, ават, ушодтано? — пе путсь кулятненень Олдай ды кепедизе пивсэманзо — недезэ валаня, цивтёрды — покштязо зярдо-бути теекшнизе, кода а валакады зняро иень перть.
Сайнизь кедьёнксост лиятнеяк.
— Чангодть, Инешкипаз, лездак, Масторава, — мерсь Элюва ды васенцекс нолдызе пивсэманзо. Чук! — жойнезевсть каршонзо сырнень прятне. Мельганзо риштясь Олдай, мейле Мияна, меельцекс Валдоня. Лиссь мельцек-мельцек: чук-чук-чук-чук... Васня пивсэматне тёкиесть чуросто, мейле седе сеедьстэ, сеедьстэ, саевкс лувсо.
Ток-и-токи, ток-и-так... Ток-и-токи, ток-и-так... — васов, веленть пес марявсь пивсэматнень кенярксов дубордомась
Чуки-чуки-ка-ка, чуки-чуки-ка-ка... — марявсь аламнеде седе лиякс маласто, эстест пивсыцятненень.
— Ладинек! — шалтонть пачк кецнезь серьгедсь Валдоня, ашо, эчке чама мазый авась. Псиденть, мельспародонть чамазо палозь палы. Аволь эрьва марто, аволь свал сеске саеви риштямонь лувось. Лиясто пивсэмань цётмаркатне-кичатне эшксевить вейкест-вейкест эйс, [65] лиясто кальмавкшнитькак. Вант ды вант, илязо понго киненьгак пря ланга... Истят апароткак лиснить. Течи вана аватнень тевест ушодовсь, видеяк, киштезь.
— Лекстядо, ават, — сэтьме, аволь кажаня вайгельсэ пшкадсь Юртай. Аватне «оймавтызь» кичаст-пивсэмаст, шаштсть ве ёнов. Юртай шожда сянгинесэ кундась олгтнень сорновтнеме. Каштмолезь ютызе «пандянть», ютась омбоцеде. Текень тейсь лия «пандянть» мартояк — явсь товтнеде олгонть.
— Весе, ават! Эсень тевем тепя. Ней — тынь! Аламо кадовсть анак певерде, весть ютамга!
Юртай калаш-кулаш мольсь одониянть ваксс, кона, неявсь, алкиньгадсь. Куляз атя озадо аштесь пултнэнь лангсо вере. Ожо панарозо педязь педясь келей лавтовтнес, алга вейкетьстэ наразь шержей сакалонзо сравтовсть мештензэ келес, пондакш сельмечирькензэ алдо вановтозо сэтьме, ванькс. «Тронсонзо» озадо аштезь, сон мольсь кезэрень пингень Тюштя ёнов. Оймсесь. Учось Юртаень тевень прядоманзо.
Сась Виряз атяяк. Сон те шкас котьмась кардазсо, витнесь-петнесь утомтнень: козонь лазпине эрявсь чавомс, косо варинетнень сёвоньсэ ваднемс.
— Шумбратадо, цёрат! Ванан, тевенек кополсо ардыть, — гайгиця вайгельсэ, Куляз атянень кедьсэ чирьказь, пшкадсь сыцясь.
— Кополсо-аволь, сыргамс сыргасть, — каятотсь верде Куляз атянь эчке, прок васолдо пурьгинень урнома, вайгелезэ, — ансяк, пелян, илязо карма кольгеме менелесь, вельть уш веньперть ловажан чулксететсть.
Виряз варштась верев.
— Менелесь чатьмони. Туиндеряй — берянь. Теке марто, пиземне эряви. Сонтемензэ понкстнэ лавшомить, кадовтано розень кшивтеме.
— Те виде. Юртай, ютака, почаксыть аватнень олгост, — кармавтсь Куляз атя, верде алов ванозь, — варштак, паряк, явомскак шказо... — ды поладсь: — Те тон, шабра, видестэ ледстик: пиземевтеме тундось стакалгады. Лов алов видевкстнэнь савить вельтямс тундонсетнесэ. Тевтне, ловт, кавксть ламолгадыть. Видьметькак кармить эрявомо. Паро, кинь кадовить.
— Пекетнеяк урномо кармить! — серьгедсь Виряз ды кевкстсь: — Кодамо тев тень максат?
— Зярс а эряваткак. Чикуншка малава сак... Ужо, ужо! Кундака, атя-парочи, аламос аштезь понжавтомо. Ансяк вана варминезэ ёмась. Зярс сайть пивсэма ды... Велувс [66] пратадо ветененк? — прок менель ёжосто сравтневсть тингелангонь келес Куляз атянь валонзо.
— Снартсынек!..
«Ветецесь» сайсь кича ды стясь аватнень марто омбоце «пандянтень».
Тевесь седеяк лаказевсь. Виряз атя совась эшксемань лувонтень. Марявсь, веленек кунсолыть пивсэматнень вейкест-вейкест марто пелькстамонть. Ютасть весть, ютасть омбоцеде. Коське пултнэ чукавсть куроксто. Омбоцеде ютазь велявтсть уш олгокс. Виряз атя кадызе авань кужонзо. Сайсь сянго ды кундась Юртай марто явомо. Цёратне явизь олгтнень, айгизь пивсэзь товсюронть оровтс. Ушодсть понжавтомо. Юртай чувтонь коймсэ товтнень верев ёртни, лездыцязо налксемасо, тарадонь тенстьсэ, оровтонть «вадяши», панси олгонь шукштнэнь.
— Верев седе, верев! — пеедькшнесь Юртай лангсо Виряз. Тона ливезькадсь. Улевельгак паро варма, сюватнень сеске саевлинзе, пек верев кайсемс аволь эряво. Ней вана ламот валгить мекев оровтонтень. Псилгадат...
Аватне кандтнесть пултт, тейсть од «пандя».
— Варштадоя! — серьгедсь кие-бути.
Чивалгомась копачавсь тандавтниця, чоподасэнь пельсэ, кона келейгадозь уйсь веленть ёнов. Кувать апак учо копачизе чипаенть. Чополгадсь. Прок сундерькст састь. Менелесь лекстясь лов экше коштсо. Васолдо-васолдо каятотсь, зярс лавшосто, прок мельде-валдо, пурьгинень урнома.
Элюва арсекшнесь серьгедемс важодицянзо ярсамо. Ней теде арсемскак ульнесь а мезть.
Эрязкалезь кундасть «пандякс» «мадстнезь» пултнэнь стявтнеме — копоняс вачкамо. «Васняяк, — арсезевсь Куляз атя, — эряви ванстомс одониянть. Пачк илязо лоподе, мейле а костяви». Секскак серьгедизе Виряз атянь верев, ды кавонест, кавто атят, бажасть теемс сонзэ седе цёцянякс, седе пшти прякс, илязо соваво начкось потс.
— Юртай! Чийть седе курок ябунсянть мельга! — талнозь серьгедсь камажа пиле Виряз. — Латало, несак! Пивсэзенть, васняяк, ванстома...
«Куш чокшнес кирдевлизе эли кавтошка-колмошка част максоволь, — китордсь Элювань седеезэ. — Одониянть а копачасак, пивсэзенть куш кекшемс». Варштась ды неезденть седеяк капшазевсь кедьсэнзэ чувтонь коймесь — бажась седе курокке айгшемс товтнень оровтс.
[67] Ансяк нардавсть-пурнавсть товтне, прасть кснавонь покшолмасо эй кельме пиземень васенце байгтне. Экшендсь седеяк. Кирнявтнезевсть модас эшкевемстэ цярахманонь эргть. Пувазевсь аира вармине. Пивсыцятне ношкстасть кудов, латалов кекшеме. Куродынзе набой обуця пиземесь кардаз видьс аламнеде апак пачкоде. Тусь лосьсэ. Латонть алов путозь паресь ды очкось торнозевсть латосто чудиця ведтенть.
Элювань потсо потязь потясь мелявксось — пельстеезь тевденть ды пиземеде мейлень ёмавкстнэде. «Кеман, те лоподемадонть пургондамо а кармить: а одониясонть, а оровтсо», — оймавтызе оймензэ латалов эрязасто чиемстэ.
Пиземень кельме банядонть мейле кудонь лембесь раштась паро ёжот, пеедькшнемат, мизолкст. Кармасть коськеме лавтовга-кутьмерьга начко оршамопельтнеяк.
Каванясть Пиргужт покшчинь каванямосо. Сывель ям, рестазь модарькат, ансяк салтозь куярнэть, чапамо ловсо, прякат... Путсть, содазь, суликаяк. Аватне ансяк турваст начтнизь. Олдайгак, лиятнень лангс ванозь, эли, паряк, мезде-лиядо, эзь правто цярканзо кепсеме. Весемень кис копорясть Юртай ды Куляз атя. Эзть визде. Кепсесть цяркаст пивсэмань ушодксонть, кудазортнэнь, пизементь кис... Кепсесть зняро — Юртай лиссь стуворонть экшстэ тей-тов чиремкшнезь. Куляз атя — крежа кандо. Сонзэ а сявордсак. Симезденть ансяк вайгелезэ седеяк урнозевсь, секень вант, кенкшесь вийдензэ панжови.
— Валскес, валскес, — вейкест-вейкест мельга ёвтызь ильтямо валост ды габор-губор лиссть кудостонть. Мельгаст куроксто сыргасть аватнеяк. Сынст ютксо истя эрси чуросто.
Юртай, Ураень видьмесь, кинь апак кочксе, видьстэ пиземень ведьганть эскелязь, кирдсь ёнкс кудов. Мольсь ды эстензэ марямга мотордсь мезе понгсь: «А! Симан, симан, теке лишме. Мекс лишме? Мекс а скал? Эли реве? Лишме... Симан зняро, зяро понги. Э-эх, баяга пря! Мекс истя зняро каят? А? Ёвтык. Арсят весе чапамонть пачкат нолдамс? Превтеме айма! А нолдави! Чапик судопрязот: а нолдави! Мекс эно а кадсак? Кадык ды весе. Кармат лиятнень кондямокс — «паро ломанекс», «превеекс». У-уф! Паро эрямось! Мезекс монень неть «паротне»? Мон истякояк вадрян. Кадык копорян. Мейле мезе? Монь тевесь. Вай, мекс мон, алкукскак, тонадынь чапамонтень? Тетям эзь симне, авадон кортамскак а мезть. Сисем патянгак а содыть, [68] мезе те истямось. Тон жо, сисем тейтерде мейле муевкс, оно мезе теят. Эх, мамагай, мамагай! А Олдай авинесь а берянь. Потензэ налксезь налксить. Мезе, бути чиявтомс? А? Иля арсеяк, баяга пря! Каня лиси истямонь экшс? Кадык эно, мерян, лиси. Мейле мезе? Валске жо мекев туи. Кинень, кодамо аванень эряват удый катерьзанот марто?!
Эх, яблочко!
Куды катисся...
Кадык а лиси. Мейле мезе? Ськамон седеяк вадря. Кияк а сёвны. Ды мекс ськамон? Чапамось каня а ялга?
Эх, ябло-о-очко!..
Ха-ха-ха! Весе вадря, Ураень Юртай, иля лырно, кецнек, морак, киштть.
Адядо, ялгат, розь паксяв,
Розь паксяв, розь паксяв...»
...Лездамо сакшныцятне срадсть. Кудось општ мерсь. Каштмолеманть колызе Элюва.
— Мон теть исяк мезе меринь? — ушодсь човсеме « квартирантонзо ».
— Содан, — музгордезь ёвтызе валонть тона.
— Мекс эзимик кунсоло? Мекс свал каршо? Содат, мезе лиси товсюронть марто?
— Содан. Модась пильгенек ало а лыказеви. Лиси чись, костясы, ды поладык пивсэмат. Вана мезе лиси, — валтнэнь кевензасто ёвтазь, каштансто мерсь Виряз атя стувор пес озамсто.
— А манейгадындеряй?! Неят, таго копачизе? — машнетезь невтсь кедьсэнзэ вальманть пелев Элюва. — Неят, мезе теи?
— Карминдеряйть лодорсо прамо кевть менельстэ, — нарьгазь ладсо, ингелькс валсо полавтызе Элювань кортамонзо Виряз, — сестэ мезе?
— Саты теть ремедемс! Азёка пенчтнень-вакантнэнь шлить. Аштек! Вана сувтементь васня понгавтык тарказонзо. Арась, азё васня пенчтнень шлить.
— Азё тонсь шлить, — «озавтызе» Виряз тарказонзо валонь полавтницянть, — те тонь тевесь!
— Вантака, вантака лангозонзо! Тон мезе, ярсамот кадсак? Сестэ валске жо а карман пидеме-панеме. Тонсь мелявтт! — кежиявтнезь, юв-яв лиссь удалце кудов.
[69] Виряз чатьмонезь пурнынзе покш ваканс ярсамодо мейле кадовкстнэнь, кедьгетнень, саизе вальмалангсто газетанзо ды озыксэль ловномо.
Кодак неизе Элюва конёв лопанть, чамазо кежтнеде якстерьгадсь. «Кие, кодамо идемевсь арсизе-теизе сонзэ, газетанть?!»
— Вант вана лангозонзо! Анок поремс конёвонть. Ваны, ваны эйзэнзэ. Мезе неи — сонсь а соды. Теке тевтькак кудосонть кодаткак арасть, — сялгонесь, мекев-васов яказь, газетань «порицянть». Каясь покш ваканонтень лембе ведь. Виряз кадызе ловноманзо ды арась нинзэ ваксс. Кавонест болдордсть, шлясть кедьгетнень.
Эзь кенере Виряз путнеме таркаваст шлязь-нардазь пенчтнень-вакантнэнь, Элюва токизе лавтовс ды мерсь:
— Кадыть, адя тингелангов.
— Кадык сорксты аламнеде. Допрок, маряви, эзь лоткаяк.
— Варштака тон, а? Мезе а мерят — каршо. Кода тонь марто улемс, превс а саеви.
— Тон неят, мезе ушосонть? — казямо ладсо гайгезевсь Вирязонь вайгелезэ.
— Неян. Тонеть ансяк тувтал муемс. Ансяк мезеяк а теемс! — кежтнеде аванть сэнь сельмензэ полгарьгадсть, пешкедсть апаро сяткодо. Сон ахолдась кедьсэнзэ ды юрк совась икеле кудос.
— Идемак, Инешкипаз, чангодть, — прасть Вирязонь кургсто энялдомань валтнэ. Прядынзе «авань тевензэ», озась вальманть малас ды педявтызе вановтонзо сёрмав лопантень. Ансяк «вансь» эйзэнзэ аволь кувать. Эрявсь алкукскак варштамс, мезе кадсь мельганзо видевкстнэнь туртов истя эрявикс пиземесь.
Ладсизе-менчизе ловномапеленть, путызе вальмалангс, стясь ды апак каштордо лиссь ушов. «Кода эрямосонть весе човорявозь. Ве кудосонть эрси свадьба, шабрасо — лайшить-калмить. Веенст — вастовсть, омбонст — явовсть. Ды истя эрьва косо, эрьва марто. Чопода — валдо, раужо — ашо, сельведть — мизолкст, чевте — калгодо. Течинь пиземеськак... Кодат сёвномат-пеняцямот лиссть! Кецнемс эряволь, зярдо сон кандсь зняро парочи! Арась, истя илязо уле, эряви ацирьгалемс... Ушодовсь таштамковось. Аволь улеяк те пиземесь вете-кото чить, кадовлинек сы иестэ розень кшивтеме. Кажось те а вишкине. Эряви таргошкань ютазь варштамс, — велясть Вирязонь прясо арсематне тингелангов яннэванть молемстэ, — начтызе, неяви, куш ков, мик вецана рудаз теевсь. Ютаськак [70] чопоньпелев, пачк лопавтьсы, парсте сотави. Паро, паро, атя! Ансяк вана... мезекс весе те монень?..»
Покш зыян, кода арсеськак, менелень казнесь эзь тее. Куляз атя содась, кода улемс, — оровтонть сэрейгавтызе колмо-ниле пултсо. Путынзе сынст кода эряви, сравтызе лангаст ябунсянть, ды теевсь ватола лато. Превей, кол атясь! А стяко веленек ловить сонзэ истямокс ды натой лемдизь та-кодамо Сократокс.
Штавтызе Виряз оровтонть. Начксь ансяк келькшка. «Саемс састынька те келькшкенть, сравтнемс коськеме. Лиятанть, апак арсе, сусекс. Товсюрось коське, кирдть эйсэнзэ куш пинге. Лырномс а мезть».
Кузсь аравтозь кузтемаванть пелевидьга вишкалгадозь одониянть пряс. Токшесь, велявтнесь-ваннось пултнэнь. «Начксть, мезеяк а мерят. Тагояк — аволь пачк. Верьга пултнэ ансяк. Сельведть ёмсевтемс а мезень кис. Ванды, улиндеряй чись маней, летьке пултнэнь озавтнесынек башка-башка. Коськить. Пельчишка сави котьмамс, ков молят. А мезть майсевемс. Допрок жо эзть лоподе, пиземесь ульнесь коволонь...»
Валгсь Виряз скирданть прясто ды шкань апак таргсе кундась арсезенть топавтомо.
...Ушонть самай вадря шказо: а пси — а экше, а кизэ — а сёксь. Ожось токинзе чувтнэнь ансяк эль редямга, ансяк тия-тува артовсть килейтнень пиже черест нусманя ёжонь сыргозстиця тюссонть. Лов алов видевкстнэ ванькс, чинь каршо кувтолдыця пижесэст кецневтить сельмть ды ойме. Варштат лангозост, зярдо пельтнень экшстэ лисиця чипаесь паласынзе валдосонзо, сельведеть а кирдевить. Истямо мазычи!
Пиргужонь икелев лоткась тарантас. Эйстэнзэ валгсь аволь сэрей, келей лавтов сыре ломань. Сельмс каятотсь прясонзо «купецень» ашо картузось ды истят жо ашо сакалонзо. Сюлмизе лишмензэ панст ведьмеде кенкш палманентень. Ютыксэль совамо, эзь кенере. Чикор-чикор панжовсь кардазонь келей кенкшесь, ды сыцясь вастовсь азораванть марто.
— Иван Паксютыч, тонь истя кона ёндо вармась кандынзеть?! — аламнеде абунгадозь ды гайги вайгельсэ вастызе Элюва васолдонь, чуросто сакшныця инженть — умоктояк умонь содавиксэнзэ.
— Кода истя, кона ёндо? Эли стувтык базарсо кортамонок? Мерекшнынь, кадык атят мусамам, кортасынек. Учинь, учинь... Ней ардан Сурвелев. Арсян, сован ютамсто, варштан.
— Ужока, — каясь трокс вал вастыцясь, — те мень [71] тевде истя кортамо ушодынек куринка ютксо? Адя курокке, тосо уш... Стувтык меельце сакшномат? Адя, адя...
Элюва икеле, аволь сэрей крежа инжесь мельганзо, ютасть сынь кардазонь келес панжадо кенкшканть ды совасть кудос.
— Атя, инже вастт! — кенярксто жойниця вайгельсэ серьгедсь Вирязнэнь низэ. Тона кодась карть, киякссонть икелензэ ленге кирькст, ленгть, лаксевкст. — Сонсь Иван Паксютыч варштась тенек.
— Шумбрачи, азор! — пештизе кудопотмонть эчке, теке покш торамонь зэрть, вайгельсэнзэ инжесь ды венстизе куяв, нурькине сур кедьлапанзо.
«Вайгелезэ дюм Куляз атянь», — арсезевсь Виряз. Сорновтынзе стямсто кумажанзо ланга сравтозь нуластонть лаксевкстнэнь, путызе эземс цёкансюронзо, ушодозь каренть ды мельтеме, та-кода нузялгадозь венстизе кедензэ. Седеензэ токизе кулелямонь псись, вановтонзо икельга кивчк ютасть седе икелень самстонзо мерьказь таркась, чамдозь пия бутылкатне. «Кода илязо уле, апак кундазесь — а ор», — сась превзэнзэ меельцекс.
— Азёдо икеле кудос. Монстемень седе ве пельвалс пратадо, — ильтинзе Элюва цёратнень ды эрязкалезь кундась анокстамо-ёрамо стувор; пидемадо-рестамодо эзь арсеяк, ломанесь капши, сатыть валскень пидевкстнэ-паневкстнэяк.
Виряз атя, мельганзо Паксютыч ютасть икелев ды озасть викшнезь коцтсо ацазь, пазаватнень ало стуворонть кавто ёнга.
— О-о-о, — кувакасто, оймень таргазь, прок паркстась Паксютыч, — тедеде Пазось ванызе меленек, сюротне вадрясто макссть. Тынь зяро саиде десятинастонть?
— Кода теть меремс...
— Монь эрьвась, — эзь максо Вирязнэнь прядомс валонзо Паксютыч, — макссь кавксоньгемень пондодо ламо, истямо менть умок арасель. Умо-ок!
— Те виде. Ансяк...
— Мезе «ансяк»?
— Ламонть марто сеедьстэ сюлмсеви питнесь. Мезесь ней седе питней: товсюрось, розесь, пинемесь?
— Питнесь, мерят? Ды сон, теть мерян, эрьва кода менчеви. Кадык сюрот тундос — ве питне, ускик ковгак — лия.
— Те виде. Питнесь полавтневи.
— Полавтневи, ды кода! — вайгелень кепедезь ёвтызе инжесь меельце валонть. — Тынь аравтнинк таркава пурназенть?
Совась азоравась. Кедьсэнзэ нуласо тапардазь чакш.
— Арсян, велькссэ пидезь истят модарькат эзиде варчне, — гулдордыця вайгельсэ яволявтсь совицясь ды путызе пакшонть кортницятнень икелев. — Атя, лездака адя аламнеде.
Нить-полат совавтсть кши, пенчть-вакант, ашава чапамо ловсо. Виряз атя кундась кшинь печксеме. Элюва капшазь лиссь ды велявтсь мекев ченькс бутылка марто.
— Те а тев, сазорнэм. Мон совинь тевде кортамо. Те а тев, а тев, — вить кедьсэнзэ сакалонзо велькссэ ахолязь, ёвтызе мелензэ инжесь, — шкам овсе арась.
— Тонь арась, минек, арсят, ули? Тесэ мон прявтось, иля тонавто! Сиянь пенчкеде зыян а лиси, — керизе капшицянть азоравась ды кайсесь совавтозденть пяркава. — Ёвтак, атя, зярыя валт.
Виряз аволь ламо кортыцятнеде. Кепедизе цярканзо ды мерсь: «Эрьванень эрямосонть свал улезэ вадря».
Валтнэнь начко чочко ланга чапокс путнинзе: нурькинестэ, чуросто ды, марявсь, аламнеде казямосто. Кодат мельть эвтсть превсэнзэ ёвтазь валтнэде башка, содась ансяк сонсь. Паряк, седеезэ лиякс кортась: «Киньгак эрямосонзо илязо лисе истя, кода монь».
Глинк! — каятотсь суликань ванькс гайть цяркатнень эшкемстэ.
— Совинь кортамо сюронь рамамодо-миемадо. Монь питнем рамамонь... — ды ёвтызе, зяро анок максомс товсюронь ды лия сюронь пондонть кис.
— Истя а туи, Паксютыч, те, ловт, стякодо. Тон, койсэнь, монь ломанькскак а ловат, — пря эзь максо, згилязь ды аламнеде покордазь ладсо Элюва бажась «озавтомс» рамсицянть. — Мон сестэ кадса сюром тундос.
— Те, Паксютыч, видеяк, манчема, — саизе Элювань ёнксонть полазо ды пештинзе цяркатнень, куш ульнестькак эль чамдозь.
— Вадря. Кадык ули тынк ладсо. Ветешка проценттэ кепедьса, — псистэ ёвтызе мелензэ Паксютыч, икельдензэ пешксе цярканть айгезь.
— Те зяро лиси? — талакадозь кевкстсь азоравась ды тетькинзе сельмензэ Вирязонь чамас ванозь.
— Те карми пондонть питнезэ... — арсезевсь Виряз ды ёвтызе.
— Вантака, мезе теи! Арась, паро ломань, зняродо [73] миемс а арсянгак. Тон мезе, бажат минек вачодо кадомс? Пельпондояк те питнеденть а максан, аволь пондо.
Кортамось сертявсь.
Седе сеедьстэ ды марявиксстэ яксезевсть пенчтне. Виряз путызе пенчензэ. Кайсиксэль цяркатнева. Эзь саво. Кияк эзь копордаяк.
— Ярсадо, ярсадо, ялгат-инжеть, — вельмевтизе Элюва кортамонть чаво валсо — пенчтне содасть тевест кармавтомавтомояк.
— А тон, Элюва-сазоркам, а полат, эзимизь кевксте: Паксютыч, ёвтык, мекс арсят сюронок нельгеме? — бигирьмекс цярнозевсь Паксютычень вайгелезэ, вальма суликатнеяк цийнезевсть.
— Мекс, алкукскак?
— Мекс? — мельга-мельцек пшкадсть «сюронь нельгицянтень» азортнэ.
— Ули, ялгат-оят, тувтал. Покш тувтал. Сакшнось монень ломань. Кемевикс. Ёвтась тень: сюпавтнень пансемадо конёв лиссь. Монь — дух а кавтолдан — амзордасамизь васенцекс. Тынсь чарькодтядо... Истя арсян: рамамс пельпитнеде зярыя сюро, ялатеке кармить саемензэ стякодо, миемс сонзэ — ды седе курок — аламнеде седе питнейстэ ды ношкстамс неть таркатнестэ ков сельмень неить. Тынк эйсак, пелян, пачкоди вырновтнемась. Ней онкстынк: миемс-арась.
Теевсь општ. Зэрниця вайгелесь полавтовсь сёксень куяв карвотнень бизнэмасост.
— Арась, — керязь керизе каштмолеманть Элювань човине вайгелезэ, — кадык чеерть сэвсызь, зняродо а максса!
— Пелян, ильведькс теят, коткудавне-авине, — терявтызе оймавтомс Виряз эриця ялганзо, — тевтне, газетатнень коряс, тенень кеверить, мезде корты Паксютыч.
— Виде, виде, — кемекстызе Паксютыч — «эрзянь боярось», кода ламот мерить тензэ.
— Арась! — явизе коштонть кедьлапасонзо Элюва. — Зняродо фунткак а миян, кадык сайсызь, истямо питнеде товнеяк а максан.
— Ацирьгалемась — берянь неже, превс берянь путыця. Оймак, — мерсь Виряз ды путызе вить кедензэ Элювань лавтов лангс.
— Сестэ а мезть кортамскак! — чачк лазызе кортамонь лувонть Паксютыч. Путызе пенчензэ, нардызе кедькоморсо кургонзо ды эрязасто стясь таркастонзо. — Ава марто пелькстамось — сувтемесэ ведень амолямо. Шкам, Элюва сазорнэм, арась. Капшан. Вастомазонок [74] эно! «Аволь умонь валдынем, аволь умонь кеняркскем...» — поладынзе валонзо эсензэ пачка.
Атясь лиссь стуворонть экшстэ, венстизе маралянь аттто ёжопонав кедензэ Вирязнэнь ды велявтсь кенкшенть ёнов. Азортнэ тапор-тупор капшазевсть ильтямонзо.
— Сон уш овсе урмазкадсь, — ульнесть Элювань васень валонзо кудос совамсто, — стякодо, ловт, вешсь иень перть таштазь сюпавчинек. Мезе мартонзо теевсь?!
— Мезеяк эзь тееве, соды, мезе теемс, — витизе Виряз нинзэ-ялганзо эсь мельганзо кенкшенть пекстамсто.
— Те кода истя, кода максомс стякодо сюрот?.. — кирвазсь Элюва. — Шлить-пурныть кедьгетнень!
— Истя вана! Мезе сон ёвтась, газетатнесэяк текеде сёрмадыть... Тов, тов тевтне ёнкс кирдить.
Виряз совась икеле кудос урядонь тееме, Элюва — мельганзо.
— Те тон мезде? — кевкстизе авась талнозь.
— Седе, мезде кортась тонь умонь ялгат — сюпавтнень пансемадост.
— Мейле мезе?
— Мезеяк арась, — сэтьместэ, теке кортамось мольсь кудоютконь эрьва чинь тевтнеде, ёвтынзе валонзо Виряз атя, — пачкодить... миненек, тонь эйсак.
— Миненек... Ды мон кодамо сюпаван? Кавто лишменек! — сялгавтынзе сельмензэ вакссонзо аштицянть эйс, лоткась стуворонть урядамодояк.
— Ды скалот, — поладызе Виряз, — кавто.
— Вантака! Каня аламо кинь велесэнть кавто лишметь ды кавто скалт? Мезе ней, соканть эсеть пулос поводемс? — эзь оймаво Элюва.
— Эсь велеть содасак. Монень маряви, истятнэде, кинь кавтонь-кавтонь лишмест-скалост, аволь уш пек ламо.
— Вантака, мезде арсить... Ды зярдо те апарось ушодови? — Элюва тевензэяк стувтызе, аштесь атянзо вакссо ды яла кевкстнесь.
— А содан...
— А мезть кунсоломс Паксютычень, кенгели, арси седе ламо ярмакт нарвамс. Секс, теке цыган, ардтни велетнева. Тонь газетатнеяк текень содыть — кенгелемс. Кинь превс мезе пры — сёрмадыть. Пазоськак а соды, мезе ванды карми, аволь тонь...
...Чоподас, кода свал, атят-бабат котьмасть пиресэ, кудоюртсо. Элюва скалтнэнь-реветнень новолемс лоцавтнесь-муськсь. Мейле ракшатнень марто савсь аволь [75] аламо ботамс: симдемс, потявтомс, педямс, кайсемс, шлямс-нардамс... Виряз атя васняяк тейсь уряд аунясо. Штемева вачказь олгтнень каинзе-кепсинзе скирдас. Лиссь эйбаро. Ве таркас пурнынзе ды мейле кандтнинзе ауняс сюватнень. Товсюронсетне маштовить андомс. Телесь кувака. Почт ды лав марто човорязь весе сэвевить.
Сундерьгадома малава ютась кардазс, сайсь койме ды лиссь вальмалов. Чоподань самс топавтсь «прявтонзо» кармавтоманть: одс теемс кудонть икельга пирявкскенть. Чувнось варят, кандтнесь тумонь анокстазь палманнеть, пайметь-ологат, кев покольть. Пезнавтнинзе палманнетнень. Сялгизе коймензэ, сайсь мушкор, эскть ды «педявтнинзе» таркаваст судодозь-лаксезь ологатнень. Чопотетсь. Чавномс пайметнес цицинатнень эзь кенере.
Ярсасть толонь вельмевтезь.
Мадемадо икеле Виряз сайсь мель керсемс ды ватксемс карень кодамс зярыя ленгть. Теске жо, удалце кудосо, кундась каштом икельксэнь тевезэнзэ кудазоравась. Вейкесь эйстэст калдорды пивтемпарьсэ, ой пивти, омбоцесь — котьми ленгень кирькстнэнь марто.
— Мон уш аволь васенцеде ледстнян, — колызе чатьмонеманть ленгень лазныцясь.
Теевсь општ.
— Те мезде истя, содавлия? — пачкодсь каштом икельде. Пивтемпаресь энгамсь.
— Самай секеде. Кодаяк эряволь пе путомс кавтов эрямонтень. Кие мон тонеть? Мирде? Аволь. Кие тон монень? Тонгак аволь ни. Те кодамо эрямо: ве пильгесь тосо, омбоцесь тесэ? Латось вейке, минсь вана...
— А мезть теде ушолемскак! Мон уш умок мелем ёвтыя: конёвсо тешкстазь мирденень лисемадо а арсян, вельсоветэв а молян, кудозон сёрмадстомот а карман. Зяроксть теть мернинь?! Кие соды, мезе кази вандынь чись. Тагояк мерян: вечкеви мартон эрямс — эряк, арась — китне панжозь. Киньгак а кирдян. Монень газетас ваныцят а эрявить.
— Мельсэнь неть валтнэ. Ансяк кода улемс седе тов? Мон а мерян — кемевлить эрьванень. Седеяк — чинь-кавтонь ютазь. Минь жо мартот эрятано кавксоце ие! Ды а кемемс... Те каня эрямо, зняро аштемс эземень кавто чиресэ?
— Кеман, ансяк... — эзизе поладо валонзо Элюва.
— Мезе «ансяк»?
— Вай, ды мезть а эрсить эрямосонть! — прок тандадомадо сорнозевсь аванть човине, теке тейтерень, [76] вайгелезэ. — Течи солавты, ванды, вант, кшникс кельмевтьсы... Кемть азё!
— Лисни, а кемат. Кудот-чить, таштазь сюпавчить кис седееть ризны-мелявты. Сынь тонеть эрявить, аволь ломань, аволь мон. Пелят. Виде, улевельгак тень ниленьгемень. Эли куш ведьгемень. Ней жо монь иетне сизьгемень малава чарыть, — чамдсь Виряз атя аволь ве иень перть кандтневиця ризксэнзэ. — Виде, арсян сюпавчиде-эрьмеде — колмо аршинэнь кувалмосо мода панксто. Лия монень мезеяк а эряви. Мезекс? Мартон тов саемс?
— Содан. Ансяк течи истя, ванды... — эзь арсеяк потамо эсь мельдензэ Элюва.
— Ванды... А содан. Тонгак а содат. Течинседенть содан — ковгак а маштови. Косо эрян, мезень кис, кодамо тесэ таркам — а содан. Разди седеем теяк: кие мон те кудосонть? Мирде а мирде, ялга а ялга. Сонсь идемевсеськак а соды! Эрян ят велесэ, перькан ят ломанть, монгак сыненст та-косто кандовкс, монгак ят. Кудос сован — таго те ёжось тапардасамам. Содан: конёвсо-печатьсэ седей мелявксон, майсеман а тенсевить. Ансяк...
— Виде, — поладызе Элюва атянзо меленть, — тевесь аволь печатьсэ, печаттемеяк эрить, эрить ломанькс.
— Кить? — лепштизе Виряз кевкстемасо «печаттеме эрицянть», варштась сельмезэнзэ. — Кить, ёвтык! Ламо истятнэде?
— Ды вана!
— Самай «вана»! Мекс-бути тона мирдеть марто венчазелить церьковасо. Монгак истя жо. Ней вельсовет тень вети. Весе, весе мастортнэсэ истя теевить тевтне. Секскак... а мезть ёжовгалемс: «печаттеме» эрить ансяк аванькс ойметне, — токизе Элювань Сэредькс таркас атязо.
— Вантакая, мезть сон ремеди! Те мейсэ истя монь аванькс оймем, мейсэ киткавчим? Мейле мезе, улиндеряй истямо ёнкс обуцясон? Мезень берянесь? — Элюва лиссь каштом икельде. Оезэ пивтевсь, ванькс коське нуласо нардтнесь кедензэ, сельмсэнзэ цивтёрдсть толнэть.
— Берянесь, содазь, арась. Кедьсэть важодян уш зяроце ие. Беряньстэ-вадрясто — цёрань тевтнень ветян...
— Мейле мезе? — эзь максо Элюва прядомс мелензэ ленгтнесэ котьмиця Вирязнэнь. — Каня вачодо кирдян эйсэть, кши кочом теть а венстнян?!
— Сюконян. Теке кадовськак.
— Тонь кортамга лиси, урьвакстнить ды мирденень лиснить кши... кочомонь кис?! Вай, тирякай, — Виряз понгавтызе лазнозь-лаксезь ленгензэ стенас чавозь эскентень, сорновтынзе кумажастонзо шукштнэнь, велявтсь нидензэ ды педявтызе вановтонзо чоподасо копачазь вальмантень, — мон ськамон. Мон, Элюва, кияк арась, весе велявтсть эйстэнь — эйкакшон, нуцькан, кеж кирдить лангозон кавто патян, сазором. Тон теде содат, ансяк содыкскак а тейнят, тонеть ялатеке. Арсят ансяк эсеть тевде. Эседеть.
— Ней мезе, арсят — тердтян вельсоветэв? Иля арсеяк. Мольтяно тов — мезеяк полавтови? — седе сэтьместэ, апак покшкавтне, ялатеке кельме вайгельсэ пшкадсь Элюва.
— Шожда ёмавтомс — стака муемс. Печатесь кадозь кудозон а велявтсамам, чачома велем ёнов кинтькак а невтьсы. Ялатеке урьвакстомадо конёвонть марто седе кемевлинь: ормалгадындерян, лоткиндеряйть якамодо пильгень, а ёртсамак. Ней? Эль мезе а истя, сеске: азё тов, косто сыть. Зяроксть тень марсия?! Парочияк ули иердемасот: кенкштне икелень пизэзэнь панжадот, мезеяк, кодамояк конёв а кирди туемс тонь эйстэ. Вейсэнь эйкакшт а сюлмить.
— Лисни, стяко пезэрдят лангозон. А мезть кашкавтнемс советка-кува, пурныть кармот-курмот ды кшу-кпгу... Кенкштне, кода тонсь мерить, панжадот, — мерсь Элюва а мезень теемадо стуворонть юв-яв нардтнемстэ.
— Берянесь вадрявтомо умок куловоль, — прядызе Виряз кортамонзо вейсэнь чартьчисэ. Велявтсь вальмастонть, саизе ужосто нартемксэнь тенстенть ды тенсинзе мельганзо шукштнэнь. «Шказо чиремемскак», — сась мелезэнзэ ды теке марто панжизе икельце кудов кенкшенть. Кайсесь ды — ювк велькс потс.
Шилдорк совась Элюва.
— Тон мезе теят? Мекс мезекскак а путат эйсэнь? Зяроксть теть меринь кайсемс удало кудосо? Таго стувтык? Тон урядамо-муськеме а кармат, секс истя тейняткак.
Стямс мелезэ велькс потс эцицянть арасель. Ды мезеяк а теят, сави. «Сырькаенть» валонзо видеть. Штавтызе вельксэнть, автордынзе эземс каязь понксонзо-панаронзо ды, теке сулей, ёндолк ютась тона кудос.
«Видестэ редязь, — ледсь мелезэнзэ одс мадемстэ, — [78] тантей лангс тантейть полавтнемс — а мезть шка ёмавтнемс. Вейкеть сынь, кувака пулотне, ве понань».
— Мелеть, сиякай, топавтыя, мезе седе тов? — згилязь пшкадсь таркастонзо Элюванень, конань неявсь вельксэнть алдо ансяк судозо.
— Саты теть сялгонемс! Чись каня теть эзь сато? — чошнозь мерсь авась ды велявтсь вить боканзо лангс.
Кудопотмось пешкедсь каштмолемадо, кона таргавсь а кувать. Тона пельде, косто-бути каштом алдо, каятотсь цирькунонь цирнема. Мельганзо, лия ёндо, лия таркасто, рангстась омбоце.
«Сыньгак, маряви, вейкест-вейкест марто туцкаемас пачколить. Ломантнень ладсо. Кода мон ды вишка Элюва... Инешкипаз, аванок-шкиницянок! Лездадо чарькодемс, мекс эрятано сёвнозь-кежень кирдезь, мекс шлебердтяно пежетень чеядавкссо, мекс ютавттано моданть-масторонть лангсо пингенек певтеме кенгелезь? Тонь пельде максозь шкастонть комсь-колоньгемень иеть удотано. Сынст эрямостонть ёртыть. Кадовить — ниленьгемень-ведьгемень. Ды сынсткак печтятано кечкерезь, вейкенек-вейкенек дондяезь. Те кода истя? Мекс Теть, Инешкипаз, кодаяк уряд а тееви эсеть кудосо? Мекс истят акирдевикст эйдеть?» — истя Инешкипазонть кевкстнезь, сэтьминестэ кортазь, чопавтсь Виряз Онавань отьмантень.
Валске ёнов содавтызе он.
Кодат сынь ансяк а эрсить, онтнэ!
...Икелень нинзэ марто аштить озадо лей чпресэ. Леесь сеске теевсь иневедекс. Вармаськадсь. Кумбава сиземань апак сода ушодсь пансеме комболксонзо мода чирентень. Сынь сэрейть. Ялатеке экшелицятне кодаяк а лисевить ведьстэнть, вельть вечкеви мартост налксемс. Болдорды мазя таркасонть вете иесэ Лиянынеяк. «Ваи, ваи!» — каятотсь цёрань вайгель. Варштасть нить-полат — аймельгадсть: ведьстэнть лиси цёра, кедьсэнзэ Лияныне. Вирязонь чочизе кирьгадо кодамо-бути вий, бажи рангстамс — а рангстави, стямс — а стяви. Цёрась теевсь авакс, прок низэ, кирди кедьсэнзэ эйденть ды мизолдозь ваны тейтернензэ лангс. «Ведьпрясь салакшнызе!» — серьгедсь верьга вайгельть...
Виряз сыргозсь.
Панжинзе сельмензэ, варштась вальматнес. Чоподат. Ашолгадомо а арсияк.
«Те истя мезе мартон? Морянть эзия некшнеяк ды эрь — моря чиресан. Тюнихань тевть. Он. Мезть ансяк онстот а неят! Пазонть мартояк онстон весть [79] палсекшнынь. Эрси жо, а? Эрявить содавтомс тейтерень. Ие уш эзинь нее. Чей, кодамояк апаро эзь тееве Лияна марто? Паро улевель, ладявольтькак аватне чикуншка ёнксон-сетнень ладсо. Тосо, ёвтнить, сеедьстэ цёранть зярыя нинзэ. Кода ладить сынь? Кода а сёвныть? Улевельгак сынст ладсо, кильдевлия Вармань ды молевлинек Элюва марто кадозь ашком варштамо. Арась, тесэ лият койтне: вейкест-вейкест анокт раздемс, сеске черде черьс кундыть. Мезеяк а теят, вачочинь асодыцясь а содасы вачочинть «танстензэ». Секскак монь неть арсематне — ёвкст. Ёвкст-аволь, сы таргостонть ардтнян, содавтсынь. Иеде ламо эзинь нее, араселинь чачома велесэнь. Кадык сёксь, молян Пумбра вирев, ютан таркатнева, косоль эйкакш пингстэнь нешкепиресь ды латкось-лушмось, конадо нейгак мерить Нешкепире латко. Эскелян Пуворня ды Кутора пандонь пиретнева. Зярдо-бути умок-умок кстыень кенерема шкасто яксекшнинек неть таркатнева авань марто!»
Кодаяк а ашолгады.
Удомась одс а тердеви.
«А уды, бешоконь, майсевтицямгак, — полавтовсть арсемань янтнэ. — Паряк, кирякстан сонзэ чирес? Умок уш ёжосонзо араселинь. Снартомс бути? Брикстяеме таго карми... Аволь кода од шкасто. Иетне эсь тевест теить. Сестэ, васень иетнестэ... Сыргозсь-арась? Лексемазо а маряви. Сыргозсь сестэ...»
Айгизе лангстонзо вельксэнть, нолдынзе пильгензэ ды кавто эскельксэнь ютазь, салава, прок чеерень кундамсто псака, илязо лисе кашторкс, васня озась, мейле штавтызе вельксэнть ды венемсь нинзэ ваксс.
— Вай! Мекс тень а максат удомс?! Кадомак, — удомань пачка мельде-валдо мерсь авась. Ялатеке «брикстяеме» эзь карма. Атясь куроксто кутмордызе поланзо кавто кедьсэ ды матедевсь ней уш талаень шкатнень ладсо. Кутмордазь вейсэ удомась нардынзе нусманя арсематнень, оймень наксавтыця майсематнень, сёвноматнень... Истя жо нардасынзе сынст моданть лангсо весе мазычитнень марто куломась.