Якстере теште/1924/36/Нефтинкь кода велесэнк роботы коммунистэнь ячейкась
| ←Прявтлопа | Якстере теште, № 36, 30 ноября 1924 г. редактор Глухов, Пётр Семёнович Нефтинкь кода велесэнк роботы коммунистэнь ячейкась |
Эряви те тевенть теемс→ |
| Якстере теште. Еженедельный орган Мордовской секции при Ц. К. Р. К. П. (б.). — № 36, 30 ноября 1924 г. — с. 1 |
[ 1 ]
| Нефтинkь kода велесэнk роботы kоммунистэнь ячейкась. |
Коммунистэнь партиянь кемколмовоце с‘ездэсь нефтизе кодамо покш тев партиянь икеле ащи велень роботасо. Те шканть ютамс вэлева улить ламо ячейкат, конатнэ роботыть беряньстэ. Велень тевть ютыть ваксканзо. Беспартийной сокицянь ютксо робота ветить чуроста. Покш тев ащи велень ячейкатнэнь икеле. Седе як покш тев ячейкатнэнь вишка народтнэнь велетнева. Саемс эрзятнэнь. Эрзят русстнэде кадовсть пекь удалов, чопудат, пазоньть лангс ощо пекь кемить, сокарить модасост ташто сокасо. Эрзянь аватнэде кортамсак а месть. Ютксост анцяк кавто процент муят сермас маштыцят. Эрзянь аватнэнь ютксо, вицтэ кортазь, тевесь ощо апак ушод. Секс эрзянь велева ячейкатнэнень ощо ламо вий эряви путомс, чтобу седе вадрясто сорновтомс эрзятнэнь лангсто рудазов пуленть, кона лангсост кадовсь инязоронь ташто койтынестэ. Секс партиянь XIII промксось мерсь, вишка народтнэнь ютксо, особенна истят нациятнэнь юткова, конатнэнь арась эсист автономияст, (эрзят-мокшоть, еврейть, полякт) весе вийсэ эряви вадрясто путомс партиянь роботанть.
Не читнестэ ды декабрь месецень перть моли смотр-ванума — кода косо роботыть велень ячейкатнэ.
Весе Союзной Республикань келес эрьва таркасто, сермадыть „Правдас“, „Беднотас“, „Крестьянской газетас“ велень ячейкатнэнь роботамонь кувалт.
Сермадыть кода ве таркасо ячейкась роботы вадрясто, омбоце велесэ ячейка мезеяк а теи, коммунистнэ эсь пряст кирдить беряньстэ. Весе тевтнеде сермадыть. Ячейкатнэнь вануманть кувалт Коммунистэнь Партиянь Центральной Комитетэсь тейсь комиссия. Комиссиянть председателекс аравтозь Калинин ялгась.
Ячейкатнэнь ванума тевенть эйстэ а эряви кадовомс эрзятнэнень. Эрьва эрзянь велестэ, косо ули ячейка, сермадост „Правдас“, „Беднотас“ или „Крестьянской газетас“ кода роботы ком‘ячейкаст чопуда эрзянь сокицятнень юткова.
Сермадодо, кода эри ячейканк. Якить ли ячейкань собранияс беспартийной ломатне.
Кода роботы ячейкась кооперациянь тевсэ. Лезды ли (помоги ли) ячейка вадрясто путомо взаимопомощэнь комитетэнь тевенть. Евтни ли сокицятнэнень кодамо покш лезэ максыть бедной сокицятнэнень взаимопомощэнь комитетнэ. Кода ячейкась пани эрзянь велетнень эйстэ чопуда чинть. Тейни ли лекцият, ловнума кудот. Терьди ли велень интелигенциянть (учительтнень, агрономтнэнь) просветстельной тевень тееме. Сермадодо кода ячейкась роботы велень хозяйствань тевсэ.
Пособли или арась тееме сокицятнэнь ютксо товариществат плугонь, видимкань, сортировкань и лия машинань рамамонь кувалт.
Сермадодо кода роботы комсомолось эрзянь од ломатнень ютксо. Терди ли эйсэст тонафтнэме ды велень общественной тевень тееме. Пшкади ли комсомол бедной, сюпавонь кецэ роботыця од ломатнень (батрактнэнь) кис.
Те смотрась, ячейкатнэнь ванумась теезь аволь сень гис, чтобу кинь дяк селномс или киньдяк шнамс.
Ячейкатнэнь вануманть Партиянь Центральной Комитетэсь теи, чтобу неемс кода роботыть ячейкатне велесэ. Кода сынь панить велестэ чопуда чинть, кода лездыть велень хозяйствань кепедима тевсэ.
Нефтинк кода эрзятнэнь ютксо роботы ячейканк.