Якстере теште/1924/24/Эрзень масторсо 1228 иестэ

←Кода Казанень эрзятне арсить эрзянь келень ды икелень эрзянь эрямо чинь тонафтомо

Якстере теште, № 24, 14 августа 1924 г. редактор Глухов, Пётр Семёнович Эрзень масторсо 1228 иестэ сёрмадызе Пиже Немиляв

Максозь тенек вейкеть прават, кадовсь тевс кундамо→

Якстере теште. Еженедельный орган Мордовской секции при Ц. К. Р. К. П. (б.). — № 24, 14 августа 1924 г. — с. 2

 

[ 2 ]

---

Эрзень  масторсо  1228  иестэ.

Пиже лугасо ащинь
Сыре тумо лангс ванынь
Сынст сэтьмэстэ кевстилинь
— Косто мон тей появинь?

— Евтак, пиже лугине,
Кортак сэрий тумине,
Косто велить появасть,
Ков тусто вирьть юмасть?

Тумот монень а шкадить,
Вармат кулят а кандыть,
Верев прязом кепидинь
Валдо тештень кевкстилинь:

— Евтак монень, тештенем,
Евтак монень, валдынем,
Сыре шкасто месть ульнесь
Ки кода тесэ эресь?

Валдонь марто эль валгить
Тештень сэтьме валнынить
Мон марян кода сэтьместэ
Чиить валтнэ стамбарнэстэ:

— Мон ламо тесэ неинь
Те порава як ульнинь
Ки як тесэ арасиль
Анцяк вирь тесэ касыль

Дикой зверть анцяк чийнесть
Вольной нармуннить ливтесть
Мон неинь кода тей састь
Финынь-плематне озасть

Састь тезэй эрьзят мокшот
Сэтьме мазыйть терюшат
Пьяна лейнесь сынст ульнесь
Окань чирива эресть

Саратов таркань займизь
Алатырь леенть саизь
Симбирь ошонь таркас састь
Крепостькить тейме кармасть

Сюпав келий масторга
Сыре пиже вирьгава
Эресть виивть терюшат
Эрзят сэрийть дымокшат

Пиже виринить шумить
Сэтьмэ варминеть пувсить
Чувтнэнень евкскеть морыть
Ливтеме тав ков тердить.

Эрзя-Мазый велисэ
Тёша леень чирисэ
Пиче вирень кунчкасо
Лугань мазый таркасо

Пуромсть вирень эрицят
Вере пазнэнь озныцят
Вейс! эрьзень ават церат
Вольной народонь пакшат

Эсист пазнень озномо
Эсист покш-прень вастомо
Эсист покш-прязо вастыть
Пургас ветицянь учить.

Пьяна леень лангс сыргась
Пургас — пьянава якась
Рузонь князень вастомо
Грабицятнэнь чавномо

Ваныть эрьзят вирь-велькска
Эрьзенень сэтьменеть вельга
Качамнеть верев молить
Парот-чить эрзень палыть

Пургас мельга рузт чиить
Эрзень войсканзо панить
Пурейша сынст миинзе
Рузонь князнень ветинзе

Эрьзя-Мазый велене
Паро лугань цветкене
Ризны пели боярде
Юрий князе пеледе

Кармась велесь сралеме
Тусто вирез кекшеме
Лайшить ризныть бабинить
Чиить вирив авинить

Пиже верись качадомсь
Валдо лейнесь вереевсь
Ризны валдо тештене
Мазый эрзень тейтерне

Вечкема церанть саизь
Рузонь масторов ветизь
Вирсэ ава аварди
Пакшань кисэ укурди

Юрий сонза керизе
Верень леес нолдызе
Бабат дедат авардить
Икилив кувать ваныть

Кода сынст цераст лемдить
Суздалив пленнойкс ветить
Локшосо верикс чавить
Лемдиме сынст кармавтыть

Валдо валдо тештенем
Паро паро сазорнэм
Арась арась виезэм
Кунсоломо теште тонь

Чопонь чопонь перевезэм
Чопоцть чопоцть сельхсэзэм
Кадык кадык лиянень
Эрьзя эрьзя ломаннень

Евтак евтак тештине
Чокшнинь чокшнинь якстерне
Зяро верть тесэ валозь
Мокшт эрзят тесэ чавозь

Кода князьтне воевасть
Эрзень велетнень яжасть
Кода сынст парсте маштызь
Советэнь властень путызь?

Пиже Немиляв.

 

---

Примечаният.

Моросонть од валтнэнь эряви чарькодемс истя:

Терюшат — финынь плема, эрзянь, роднят — ней сынь човорявсть эрзятнень марто.

Ош — город.

Эрьзя-Мазый — Эрьзямас.

Тёша — Эрьзямазонь лейне.

Покшт прят — эрзянь мокшонь ветицят — рускс вождь.

Пургас — эрзень-мокшонь покш пря.

Пьяна — лей Сергачонь уездсэ Нижегородск. губ.

Пурейша — терюшатнэнь покш пря. — эрзятнень ды мокшотнень предал.

Пакша — эйкакш.

Юрий — Суздалень рузонь князь.

П.  Н.

 

---