Якстере теште/1924/20/Тандадомс а эряви

Якстере теште, № 20, 15 июля 1924 г. редактор Васильев, Тимофей Васильевич
Тандадомс а эряви

Мекс налогонть саить весе пашненть коряс, а воль анцяк видезь моданть коряс→

Якстере теште. Еженедельный орган Мордовской секции при Ц. К. Р. К. П. (б.). — № 20, 15 июля 1924 г. — с. 1

[ 1 ]

Тандадомс а эряви.

Рав (Волга) чирева губернятьнень эйстэ кармасть тей сермадомо, што сюротне кармасть коськеме, пиземеть нейгак эще арасть. Скотина дешевалгаць, сюро питнейгаць, а народонь кедть—пильк новольсть, таго пелить сы манынь вачо годось.

Вернасто мерсь вейке эрзя ялга тень кувалт:

— Тандавтозь варака ципокадояк пели.

Тевесь аволь уш истямо страшна, кода ефнесызь. Московсо ули комисия, кона уражаенть кувалт пурнась точной сведеният таркасто, конань парсте проверил.

Тедиде весе республикаванть сюро пурныть зняро жо, зняро ульнесь меля.

Чи валгума и Россеень кунчкава губернятьнень эзга сюротне пек паркстомсть. Молить пиземеть. Сюро видезь мелень коряс больчи.

Сюронь асатомадо пелемс аэряви. Тедиде минь мелень коряс эще больше карматано миеме лишной сюро лия масторов.

Анцяк Рав чирева и обед пеле губернятнень эзга аламодо акарми сюрось эсьтест сатовомо. Весимезэ неурожайсэ захватязь вете миллион пель марто миллон десятина сюро. Те моданть ланксо эриця весимезэ 8 миллион ломань.

Те народонтень Советской правительствась карми лездэме сюросо, видьмесэ и ярмаксо.

Неурожайной таркатнень эзга народ пек тандаць. Кармасть микшнеме скотинаст. Народ думи, што голодесь ули манынь коньдямо. Правительстванть акарми сатомо таго виезо и улить вачодо куломат.

Маны 1921 иестэ вачодо кадовкшность 26 миллион ломань, неурожайсэ захватезь ульнесь 21 миллион десятина сюро. Сестэ минь анцяк оделынек войнанть. Хозяйстванок ульнесь совсем каладозь.

Ней тевесь совсем лиякс ащи. Сибирсэ, Киргизиясо, Уральской облостьсэ и чи валгомо пеле губернятнень эзга уражаесь ули паро.

Россиясо ней пурназь ламо сюронь запас. Те запасось саты од урожайс. Пелемс а эряви.

Если кепедевсть питнетне сюро ланкс, те лисць секс, што народ пек тандаць.

Неурожайной губернятненень кучозь уш ламо сюро, штобу дешевасто микшнемс и акастамс питьнетнень.

Сексня тов кучомо кармить озиминь видметь.

Весимезэ кучить 6½ миллион пондо видьме.

Кармить нолдамо тов ярмак, штобо помогамс беднойнень.

Государства карми соньць рамсеме сюро, штобо дешевасто микшнемсь неурожайной губернятнень эзга. Кармить рамсеме скотина штобо иляст пра питьнетне.

Кооперативнень кармить нолдамо ярмак долкс, штобо сон кармаволь рамсеме сюро и миевель населениентень алка эсинзэ питьнесэ.

Пелемс а мейсь и а мезде.

Рав чирева губернятне светстэ кармась некшнеме неурожаить. Аламот эрцить тува пиземеть Ташто сюро видима койсэ тува курок а видсак хозяйстват. Эрявить ташто койтне кадомс. Советской правительствась пурнась истямо комисия, кона карми арсеме кода седе курок туемс од койс. Кармить кучомо тов аграномт. Нолдыть кредит, штобо народось седе курок кадовлинзе ташто койтнень.

Советской правительствась стараи аволь анцяк тедиде лифтемс Рав чирен эрицетнень не урожайстэнть, но лезды кода бу мейле иетьненьгак иляст уль голодть. Анцяк миньстенек аэряви молемс агрономонь и тонавтозь ломанень карчо. Кадомс курокине ташто койтнень и кармамс видеме—сокамо, кода тонавты наука.

А тедидень неурожай денть тандадомс а эряви.