Якстере теште/1924/18/Эрзянь-мокшонь праздник
| ←Прявтлопа | Якстере теште, № 18, 27 июня 1924 г. edited by Васильев, Тимофей Васильевич Эрзянь-мокшонь праздник |
Кода карматам тонавтомо→ |
| Якстере теште. Еженедельный орган Мордовской секции при Ц. К. Р. К. П. (б.). — № 18, 27 июня 1924 г. — с. 1 |
[ 1 ]
| Эрзянь-мокшонь праздник. |
Июнень васинце чистэнть Саратовской губернянь эрзятне ютавтызь эсь покш праздникест. Те чистэ Петровской ошсо эрзянь-мокшонь педтехникумось нолдась од роботникть, од тонафтыцят. И сон весе минек народонтень праздникекс эряви ловомс.
Кода жо а эргедеме, кода жо а радовакшномс? Ниленькемень чопода чинть марто бороцицят юткозонок совить. Кото кувака иеть учинек те валдо чинть эйсэ. Миненек кувакасто марявсть не иетне. Шкась ульнесь стака и сюронь ачачматне и эрва мезень войнатне се шканть марто пракшность. Но ней апаро читне ютасть, кадовсть удалов и одов а велявтыть. Стувцинек, од ялгат, не апаро читнень ды седе курок ертовдан роботас: эрзятне-мокшотне умок учить эйсэнк и сынь вастадызь эсень паро, эсень вечкема гость лацо.
Ней кавто-колмо валт сень кувалма евтан, ялгат, мезень тевть тенк савить тееме велева роботамсто.
Роботамо сави тенк и школасо и народ ютксо. Ковгак а маштови се тонавтыцясь, кона школадо башка косояк а роботы и народонть юткс пели лисиманзо. Эряви народонтень ефнимс, что тонавтома тевенть кувалт эряви эстензэяк а нувсимс. Советской властентень ськамонзо весе тевтне а теевить, эряви пособлямс тензэ. А чтобу эрзясь-мокшось весе паро тевтнень лангс вановоль сельмень панжозь, эряви стараямс, чтобу сермацтоволть эсинек газета. Не газетнэнь эйсэ весемень кувалт ефнисызь эсинек кельце и сынь рузонь газетнэнь коряс седе чаркодевить.
Тынць жо, эрзянь-мокшонь роботникть, сермадодо эрьва мезень тевде эсь газетозонк. Сёрмадодо «Якстере Тештес,» «Якстере Сокицяс» и «Од велес».
Школанть теинк истя, чтобу сон уливель и эйкакшнэнень и народонтень вечкема кудокс, косо эрьва ломанесь муизэ паро превть, паро совет и улизэ школанк якстере тештекс, валдо тештекс. Косо виенк а сацтавить, вешиде превть сыре роботыцятнень пельде, сынь знярояк а отказыть тенк советсо.
Ней чумбра чи тенк ефтан, ялгат, а весемень педтехникумонь ды эрзянь-мокшон роботникненень, конат кирдизь сонзо, покш спасиба.
Чумбрасто эрязо Петровской педтехникумось, чумбрасто эрязо советской властесь, кона максць тенк эсь кельценек тонафнеме, чумбрасто эрязо коммунистической партиесь.