Якстере теште/1924/14/Барщинань шкасто/1
| ←Барщинань шкасто (оглавления) | Якстере теште, № 14, 18 мая 1924 г. edited by Васильев, Тимофей Васильевич Барщинань шкасто. Васинце акт by Жининан |
Омбоце акт→ |
| Якстере теште. Еженедельный орган мордовской секции при Ц. К. Р. К. П. (б.). — № 14, 18 мая 1924 г. — с. 2—3 |
| БАРЩИНАНЬ ШКАСТО |
| (Кавто актонь пьеса). |
| Налксицетни: | |
| 1. | Кузьмич, 30 иесэ, кежей, бояронь управляющий. |
| 2. | Александров, Иван Емельянович, 48 иесо, староста. |
| 3. | Фрол Тихоныч, 29 иесэ, покш пеке, атнаватой (глуповатой), бурмистр. |
| 4. | Оношенкань Мося, 31 иесэ, вдовец. |
| 5. | Жидковинь Окан, од цера 23 иесэ, а мазый, пек бедной. |
| 6. | Игошань Лиса, 27 иесэ, вдова, мазый авине, орчезь эрзякс сорока марто, эли похожа мокшо ава лангс. |
| 7. | Марква баба, — бабине 69 иесэ. |
| 8. | Маря 17 иесэ, пек мазый тейтерь, средней эринь кудосто. |
| Тевесь ульнесь Иванцева велесэ Нижегородской губ. 1831 иестэ, сексня. | |
| ВАСИНЦЕ АКТ. |
| Кузмич, Иван Емельяныч ды Фрол Тихоныч. |
(Кузмичинь кудосо. Кузмич ащи столь экшсэ, Иван Емельянович и Фрол Тихоныч ащить икелензэ чапкавтомо. Фрол Тихонычень кецэ локшо. Шказо — сундирьгадозь).
Кузмич: Ну, Иван Емельяныч, пивсыматне веси пивсывсть?
Ив. Ем.: Арась, Афанасий Кузмич, кавто копнат кадовсть.
Кузмич: (кежейстэ). А мекс ино эсть пивсывть? Месть ино тынь те шкас тейниде?
Ив. Ем.: Ненастия тусь, Афанасий Кузьмич, начко. Авнятнэ (овины) апак урядак.
Кузмич: (кежейстэ). Мезе ино тон тейнят? Тон содыть эли арась, что сынь кармить эрявомо? А?
Иван Ем.: Содынь. Ды тосо тевесь аламо, анцяк авня кияксонть урядамс.
Кузмич: Ну ладна... (Чатмони). Мон тече меринь умарь чувтнэнь чувомост, тосо чувить штоли?
Ив. Ем.: Чувить. Тов мольсть кемветее (15) ломать, ды пизимесь пек меше.
Кузмич: А пизимесь, видна, меше, нузякс чись меше. Эряви седе парсте сынст панцимс.
Фрол Тихоныч: (сюкуни) Мон истякак, Афанасий Кузмич, парстэ эйсыст панцян. Валцке вейкень истя пидия, что панарозо керявсь мик. Ванан, сон мотыганть нузяксто пек кепси, а сонзо цирей штоли котмирсынзэ, мон кода сонзо стекадия, сразу верть тусть. Цирейзэяк пичкась. (Раки).
Кузмич: Панцят. Содан, кода тон панцят. Локшось колмоце ие кецэть и те порас одны ащи, буто вестькак эйсынзэ эзить цекать.
Фрол Тих.: Авуль, Афанасий Кузмич, мон сонзо уш ниле раз поладокшныя.
Кузмич: Ну и паро!
Ив. Ем.: Ну, Афанасий Кузмич, можна туимс?... Ванома, мезе тосо, кода тевесь моли... Пора прядомс роботась, эль чополгады...
Кузмич: Азюдо. Тосо киньгак кучодо Игошань дованть кис, сонзэ норовить чиямонзо.
Ив. Ем.: А ки?
Кузмич: Ну ки, ки, те а тынк тевесь. (кежейстэ). Тыненк мезе мерсть, сень и тееде! Мариде?
Ив. Ем.: Ну прощей, Афанасий Кузьмич. (Сюкуни).
Фрол. Тих.: Паро ве тенть, Афанасий Кузмич, паро онт бредямс (Сюкуни).
Кузмич: Тыненкак тожо... А тон, Фрол Тихоныч, локшонть иля жаляк, ата веси пек нузялгацть, етегаяк парынестэ.
Фрол Тих.: Мон истякак стегаян парсте! (Вейсэ Иван Емельяныч марто): Прощей!
Кузмич: С богом.
Кузмич: (Ськамонзо, стесь, яки кудова). Так! Тевтне знярц молить парсте. Вана не кавто копнатнень пивсысынек ды карматам сюронть „Чукалав“ усксиме ды алашень заводонть эйстэ знярояк алашат тов проводятам. (Думаи). Аздан, кодат кармить улиме читне, эряволь бу озимтнень ванкшномс, кодат сынь. Улималть парт, розь вицьнень парт максокшнынь. Ну ды уж мезе ули, те тевесь пазонь кецэ. (Маряви, таго ки эль сови). Ки тосо? (Совась Мося).
Мося: (Чапкавтомо. Сюкуни).
Кузмич: Ну мейс тон сыть? А?
Мося: Секе тевенть мельга сынь, Афанасий Кузмич. (Сюкуни).
Кузмич: Ага! Значит нороват Игошань дованть саймензэ?
Мося: Да, Афанасий Кузмич. Улть тетень таркас, колияк парот а стувса, мерть саиманзо Лизань, Игошань дованть (сюкуни).
Кузмич: Ладна, ладна, иля мелявт. Сон авинесь а берень, коть и дова, ды тонгак ведь давець ломанят... Эйкакшот улить?
Мося: Улить.
Кузмич: Зняро?
Мося: Кавто. Кавтнеск церынеть, Вейкесь кото иесэ, а омбоцесь кавто иесэ.
Кузмич: А дованть улить?
Мося: Вейке церыне, потиця эйкакш.
Кузмич: Ну те а беда. (Озась).
Мося: Сон, Афанасий Кузмич, вицтэ ефтамс, минь эрятам а пек сюпавсто, монцинь кавто эйкакшнэ, ды сонзэ вейке. Бедась се, что сонзояк церыне. Уливель бу тейтирне... ды уж мезе теят, сонстимензэ од доват арасть, а тейтерь а моли кавто эйкакш лангс.
Кузмич: Мекс тейтерь а моли? Чей эйкакшнэ сонзэ а сэвсызь? Месть эйкакшнэнь эйстэ пелят?
Мося: Сон, Афанасий Кузмич, сэвиманть а сэвсызь, ды перькаст ламо озямс эряви, орчамс-сустамс эрявить сынь.
Кузмич: И орчамодо тожо а месть пелимс. Мон думаян, что тонеть лучи тейтерь саима. Ки тонеть эряви? Евтак! Любой тейтерь максан тонеть! Тонь ней самай паро шкат ды и содан мон, что ломаниськак тон превият.
Мося: Сон мерян, что а моли, Афанасий Кузмич.
Кузмич: А моли? (Кежейстэ). Кода а моли, буди мон мерян тензэ? Мейс ино бурмистрынь локшось? Ваткамс сонзэ ды моли! Чарькудить тон тень эли арась?
Мося: Чарькудьманть чарькудинь, Афанасий Кузмич, ды уж лучи дованть сайса.
Кузмич: (Кежейстэ). А! истя тонь мельц эзь тук, месть мон кортынь тонеть? Ванок! Ата тонетькак локшось саты!
Мося: (прась кумажа лангс). Афанасий Кузмич! Жалямак монь! Мон колияк тонеть, пародо, башка, мезияк эзинь тей. Мон и роботан парсте теть, мезе мерят, сень теян, анцяк мерть сайме Игошань дованть! (сюкуни). Жалямак, Афанасий Кузмич! (Сюкуни).
Кузмич: Ну ваннынек, сон курук тей сы, мон мерень сонзэ тердимензэ. Оно некак эль сы.... (Маряви, таго ки сови. Совась Окан. Мося стесь кумажа лангсто).
Окан: (Совась чапкавтомо, сюкунесь).
Кузмич: Мейс тон?
Окан: Мон тонеть, Афанасий Кузмич.
Кузмич: Мезе теть эряви?
Окан: Афанасий Кузлдич, мерть монень урьвакстомо. (Сюкуни).
Кузмич: А кинь саят?
Окан: Ды минь ломатне пек беднойтям тейтересь уж а моли монь экшс... Максувлик бу монень Игошань дованть....
Кузмич: Игошань дованть? Сонзэ чийси Мося вана.
Окан: Афанасий Кузмич, сынь эрить а пек беднойстэ, сонензэ тейтерьгак мали, а минь пек беднойтям, тейтерь....
Мося: (Оканнэнь). Да! Тонеть тейтерь а моли. а монень кавто эйкакш лангс тейтерь моли... (Кузмичнень). Максык монень, Афанасий Кузмич. (Сюкуни).
Окан: (Мосянень). Да! Сы монень тейтерь. Сы кодамояк кромой! Ды парось сыньдерейгак, так козейкась а монь ули кодамояк паро церань... (Кузмичнень) Афанасий Кузмич, жалямак монь! Тейтерь саян — пек свадьбас росходось покш ули. Косто мон саян? Минь беднойтям... Максык монень!
Кузмич: Ну вана мезе: сон курок сонци сы тезэй минь и кевксынек, кинень сонь
[ 3 ] моли. (Мосянень). Тон ведь эйкакшунзо эйстэ пелят, так сайть лучи тейтерь.
Мося: Мон а пелян эйкакшунзо эйстэ, Афанасий Кузмич, максык сонзо монень.
Окан: Афанасий Кузмич, коли Мося пели эйкакш... (Совась Лиса).
Кузмич: Вана и сонць сась. Ну, Лиса, вана Мося ды Окан састь чиямот, кинень тон молят?
Лиса: Афанасий Кузмич! Улть истямо милосливой, илямак макст Мосянень, максумак лучи Оканнэнь....
Кузмич: А мекс Мосянень а молят?
Лиса: Афанасий Кузмич, мон маринь, кода тынь тесэ кортниде, Мося пели эйкокшом эйстэ.
Мося: Лиса! Мон эзинь мерть, что мон пелян. Молть монь экшс!
Окан: Мерсь, мерсь, что пели! Иля молть тензэ, Лиса, молть лучи монь эксш.
Мося: Мезе тон галдурдат? Коли меринь?
Окан: Кода эзить мерть, коли Афанасий Кузмич сонць мерсь, что тон истя кортыть? А?
Мося: Ванок, Окан, зря иля кортак! (Кузмичнень) Афанасий Кузмич, минь истя анцяк толктомо чуматам, а тевинть..
Кузмич: Ну ладна, лоткадо спорямонть. Мося! Тон сонзо сайсак?
Мося: Сайса.
Кузмич: А тон, Окан, сайсак?
Окан: Сайса.
Кузмич: Ну, Лиса, Оканнэнь молят?
Лиса: Молян.
Кузмич: А Мосянень а молят?
Лиса: Афанасий Кузмич! Коть прям керик, а Мосянень а молен.
Кузмич: (Кежейстэ). А! Так минь розбойникть! Карматам прень керямо! Ах тон трямо левкс истямо! Сонзэ марто парсте кортат, а сон еще совамсто эзь сюкуняяк ды розбойникекс монь ловны! А? Васня локшосо тонь, мейле Мосянень, макстан! Кода мерень, — истя ули!
Лиса: (Прась кумажа лангс). Простямак Афанасий Кузмич, что истя меринь! Илямак макст Мосянень, жалик коть, а монь, жалик эйкакшонть. Коли сон пели эйкакшом эйстэ сон карми сонзо чавомонзо. Жалямак Христа Ради!
Кузмич: (Пек кежейстэ). Чатьмонть, санапал! Верьц керятан! Евтак, молят а молят Мосянень?
Лиса: Тонць, Афанасий Кузмич, содат кода авантень жаль маряви эйкакшось, тонць содат, кода аванть седиезэ ризны коли эйкакшонзо чавить. (Рангозь). Жалямак Христа ради, илямак макст Оношенканень! (Ранги).
Кузмич: (Мосянень). Азю кудов, Мося, максса Лисань тонеть козийкакс
Мося: Сестэ ино, Афанасий Кузмич лучи Лисань...
Кузмич: (Кежейстэ пильгсынзэ стукаць) Чатьмонть! Лисань максса тонесь козийкакс. Азю! Месть еще учат? (Мося сюкинясь ды тусь).
Лиса: (Кумажа лангсо рангозь). Афанасий Кузмич, жалямак Христа ради... Илямак тейть седияк пек несчастнойкс...
Кузмич: Чатьмоньть! Ата сейчас прят лайса! (Мольць Лисань ваксс) Евтак, молят, а молят Мосянь экшс?
Лиса: (рангозь), Жалямак Христа ради...
Кузмич: (Кучкурдызе Лисань пря ланга). Евтак, молят а молят?
Лиса: (Пек ранги). Осподи! Афанасий Кузмич! Улть ломань, илямак неволя, жалик урозынь пингинем!
Кузмич: (Кучкурдызе Лисань, Лиси прась) Ах тон трямонь полавкс! Монь а кунцулат! Ды тон содат мон ки? Анцяк пазось ды мон ланксонк покштам! А тон еще монь а кунцуломо! Цепь кирьгазот путан, вачосто киртян, а Мосянень макстан! (Оканнэнь). А тонеть самай паро тейтерь максан.
Окан: Паро, эжели моли, а амолиндерей?
Кузмич: Монь моли! А ней азю кудов.
Окан: Ну ино пасиба теть, Афанасий Кузмич. Прощей. Пингизым парот а стувса. (Сюкунясь ды тусь).
Лиса: (Рангозь). Афанасий Кузмич, нолдамак моньгак кудов...
Кузмич: Истя Мосянень а молят? Оканнэнь мон а макстан. Тон иля думая, яла-теке Мосянень мастан.
Лиса: Лучи мирдинень а лисян (ранги) а Мосянень а молян!
Кузмич: Молят! А кудов а налдатан, удат теск.
Лиса: Монь тосо потиця эйкакш, сон поди ранги моньстемень (аварди).
Кузмич: Кадык ранги! А пек бояр левкс, а урады.
Лиса: Афанасий Кузмич....
Кузмич: (Молсь Лисань ваксс, кулакунзо кепидизе). Чатьмонть!
ЗАНАВЕС.