Эрямос совамо/Стака иетнестэ/8
VIII
Омбоце чинть Астакан кувать эзь стя таркастонзо. Сянгорды сельмтне эзть кадо удомояк. Севонев кенжесэнзэ коцькерясь сельме понатнестэ нулконть. Оконики панжовсть, прок туманонь пачк ванозь стясь.
Мотай капшезь ютась Пилай вакска прок эзь фатяяк эйзэнзэ ды молсь Астаканонь таркантень, нолдызе прянзо, жалязь вансь Астакан лангс. Пилай лоткась, велявсь бока ендо, трокс варштась Мотай лангс ды чаравсь прясонзо. Тусь.
Мотай аштесь Астаканонь велькссэ ризназь седеень сэредевть марто ды стамбарнэ путызе кедензэ Астаканонь пряс. Аламос кашт молемадо мейле сорновт вайгельсэ пшкадсь:
— Астакан.
Астакан кепедизе прянзо.
— Кодамо ежот? — пшкадсь Мотай ды новольсь озамо тарка чирентень. Астакан неждясь кенере пакарензэ лангс, кортась.
— А чулксетить, ансяк апокш сув вельтинзе. Валдось мутна.
— Берянь тевесь. Роботанть сави кадомс.
— Тон месть, Мотай леляй. Арьсек, кадсынек роботанть, синьдень трешник а панды теезь роботанть кисэ. Ежем маряса а берянь.
— Астакан, кунсолок, тон а жалят эсь прят, истя емавтсак сельме валдот.
— Цидярдан, ванстови эсь пряськак, — Астакан, стясь коник лангсто, оршась. Евардызе чаманзо ды лелянть лався лангсто мусь ташто розь кши сускомо. Сон ведь марто корчнезь чевелясь розь кши сускомонть. Мотай салава вансь Астакан лангс ды дивсесь, кодамо те Астакан ломанесь. Сеске жо жалязь седейть меревсь: „зняро юты пряванзо пингензэ ютамс, бути сокоргады нейке одсто“. Мезть бути кортыксэль эщо, но се шканть совась Пилай, мельганзо мольсть [ 40 ]кавто ломанть. Сынь ульнесть тоштят. Прясост кепкат ды ташто пальтасот. Вецемаст ульнесть нолтнезь. Сынь Астакан, Мотай вакска ютамсто такода а парсте варштазевсть.
— Мезенк улить? — Кевкстинзе неть ломантнень Пилай.
— Одижинеть, — отвечась вейкесь ды лавтовост лангсто каизь мешокост. Пилай юксизе мешконть ды ушодсь сокарямо, таргсинзе вещатнень ды путынзе столенть лангс. Пилай таргась сиц. Пейдезь, веселасто вартшась аштицятнень лангс.
— Сыцэнкак ули?
— Теке песь, — мерсь вейкесь.
— Варштыка, баба.
Ды таго кармасть калавтнеме.
— Зняро жо нетьнень кисэ вештядо? — Пилай озась столенть пес, кедензэ путызе оршамо-пеленть лангс.
— Арьситян саеме колмо понд сюро, почтсо, — пшкадсь вейкесь.
— Превстэ лисиде? Ды минек велестэ киньгак а мутадо колмо пондт. Колоньгемень фунт, ведь нетнень питнест пель пондо. — Пилай айгинзе вештятнень еност.
— Кунсолок, азор, минь не оршамо-пельтнень кисэ пингенэк ютавтынек роботазь.
— А содан. Путык, козяйка, сицэст, кадык косояк мисызь.
— Азор, прибават. Миненек яла теке миемс.
— Пондо почт ды кши максан.
Ломантне варштасьть карадо каршо ды вейкесь яходсь кедьсэнзэ.
— Саить.
Ломантне получизь почтнэнь, каизь кавтов. Мейле озасть столь экшес. Ярсасть. Кода лиссть ушов, вейкесь мерсь:
— Сюрост аля ламо. Вана эрить... Сонсь азорось прок верь поколь. Аламо крошасть эйстэст [ 41 ]мерзавецнтэнь. Минек аштить заводтнэ, аштитяно вачодо, сынест коть бу хны, — теке марто тусть.
Пилай козейканзо марто покш мелс паросо эщо ванность рамсевксэст. Козейкась ванстозь вачкась эйсэст горобияс.
Астакан Мотай марто аштесть апак корта. Мотай сельмень сявадозь салава вансь кудыкилькстэнть Пилай лангс, тыц эцезь одежадо горобиянть лангс ды сеедстэ укстнесь. Астакан мезде бути домкасто арьсезь вансь ве таркас. Мейле домкасто таргизе оймензэ ды пшкадсь.
— Грабеж.
— Мень те, аля, грабеж. Аволь нельгизь — раминьзе. Сюрось улевельгак монгак рамавлинь, тонгак истяжо.
Астакан чаравсь прясонзо ды тердизе Мотаень роботамо. Мотай яла аштесь сень кисэ, штобу Астакан илязо моль роботамо. Яла теке сыргась. Такода нузяксто, мелень каршо молезь чошкаесь пильгсэнзэ Астакан мельга. Сынь мольсть апак корта ды эрьвась арьсесь: „Эх, кабу эстеть роботамс“, эрьвась эстензэ арьсесь тееме хозяйства Роботамояк кундасть апак корта ды эрьвась эсь потмованзо вешнесь икеле пелев эрямонтень ки.
Мейле Мотай кепедизе прянзо, мольсь Астакан малав, раказевсь, ды вачкодизе лавтов ланга.
— Кунсолок, Астакан. Мезть вачкавсть пря потмозон. Тестэ буто муинь сленикань кукшин, пешксе сырьнеде. Яла сроинь эрямо чи, кудот кардаст, гурт алаша ды лия скотинат. Кудом буто ласковазь, грамофон моры. Мельзэн ульнесь паро. Се шканть кармась чулксетеме карксамом, ематотсь сельместэн весе. Эх... — Мотай општ молсь. Капшазь тейсь таргамс, Астакан тень карщо мезеяк эзь евта, эзь варштав чамазонзо. Чи валдось конявтсь нулков сельмензэ.
— Мекс а кортат, — Мотай ноцковтызе Астаканонь.
— Мезть кортат, коли тевет эзь листь.
— Ды аштек ужо. Бути казна тарган, сестэ лиси?
— А содан.
[ 42 ]— Чудак. Евтнить жо, буто лиснить казнат.
— Умок неть ульнесть?
— Нейгак ковгак эзть моль.
Кинь лангсо аштесь ломань ды вансь лангозост.
— Месть ванат? — сергедсь Мотай.
— Спицькат сюро лангс а полавттадо? — отвечась ломанесь ды мольсь малазост. Алкукскак а Мотаень, а Астаканонь араселть спицькаст ды а косто ульнесь саемскак. Тол тейнекшнить нусатсо. Ды сюроськак арась а тень а тонань. Отказасть.
Ломанесь пезнавтыньзе сельме вановтонзо Астаканонь лангс. Дивазь ладсо кортазевсь.
— Кунсолок, ломань, тон меля ульнить Петропавловскойсэ?
— Ульнинь, — отвечась Астакан.
— Ашти мельсэн прок минь ульнинек мартот вейсэ Петропавловскойс апак пачкодть. Удомо велес эзимизь нолда... — Ломанесь лоткась, прок потомсь кирга парезэ. Астаканонь жуй мольсь потмозо. Ледсь молезэнзэ се велесь. Удость банясо. Банянть вакссо навоз куця, тосо валяясь кулозь туво ды сынь ускизь тувонть банянтень. Тол вельссэ, палка вельде рестасть сывель кулы тувостонть. Астакан киргаксь, ве пелев сельгсь.
— Повняса.
Ломанесь таргась зепстэнзэ спиця коробка ды максызе Астаканнэнь.
— Мон эщо те шкамс эзинь муе робота. Минек заводось ашти, перьканзо кайсь тикше, пильге след понгсь, микшнить одижат. — Ломанесь путызе мешоконзо ды тейсь таргамс.
Аламось аштезь Мотай варштась Астакан лангс, аварьдевть кортамосо пшкадсь:
— Мон кадса роботанть. Од сюрос эщо васоло, семиям вачо, — Мотай вансь алов ды почаксась пильгсэнзэ моданть. — Ярсамо-пель эряви. Авась течи косьтясь ленге лукшт, молян томбасынь, — укстась ды тусь. [ 43 ]Астакан варштась мельганзо, мезеяк эзь пшкадть. Мейле варштась ломаненть лангс ды пшкадсь:
— Прок ледни мелезэн лемет: — Валерьян?
— Виде. Но монь мельс эзь ледть тонь лемесь те шкас. Ды ведь минь сестэ явинекак апак фатя. Мон а содан, мекс эзить озав се поездэнтень. Ансяк Омскойсэ мон фатинь, тон арасят, — Валерьян снартсь ледстямс, кить понгсть мартонзо. Кияк эзь ледть мелезэнзэ, сон евтнизе, кода якась пурнамо. Теде мейле Астаканонь кевкстизе:
— Тон урьвакстыть.
— Арась, Валерьян, — аламос кашт мольсь, мейле поладсь, — родной тетям арась, кулось самозон. Лелям микшнизе хозяйстванть, ули-паронть. Ней эри прок енсто. Монь жо долянть эзизе макст ды монь ней арась меземгак.
— Монь койсэ тонять, Астакан, эряви судямс мартонзо.
Астакан арьсезевсь.
— Вана монень те шканть седе стака. Заводось а роботы. Тетям шумбра, авамгак машты ды саты роботамо виезэ. Эщо ули сазором. Весе аштить тевтеме. А пародо ведь савсь монень туемс спицькань микшнеме. Кулят марьсевить, нолдасызь заводонть.
— Кунсолок, Валерьян. Неяви ялгам кадызе роботанть. Кадовт, прядсынек. Нажуватано мартот кото пондт сюро. Кучсыть ошов, минсь сивидьтяно нуеме.
— Вечкема ялгай, бути кадовсь седейзэт ямксошка седе, кода якинек Сибирьга, то знамо тень тейсак. Ды мон пингезэнь а стувтса парот, — Валерьян энялдозь ладсо вансь Астакан лангс.
— Кадовт ды адя роботамо, — пшкадсь Астакан. Валерьян кевкстизе, мейсь истят якстереть ды нулковт сельмензэ. Астакан а мельсэ евтнесь.
— Астакан, дай мон нартнеса нулконть. Тонь кедет севоневть. — Валерьян таргась зепстэнзэ пацине. Астакан арась икелензэ.
— Ну, ней станкатненень, — мерсь Валерьян, ды кавнест кашт молезь кундасть роботамо.