Эрямос совамо/Стака иетнестэ/7
VII
Мотай шешки алашасонть севонь кругонть, шкань-шкань ушодыль Астакан марто кортамо:
— Те алашась сатоць кевейксэеце иестэ. Минь куньцинек кулаконь банда. Розорякшнызь веленть. Течи сыть, — вешнить коммунист, маштыть беднотанть, недля юты, — орштнить якстере армеецэкс ды таго громить веленть. Тон сестэ араселить велесэнть. Минь пурнавинек комсьветеенэк. Эсинек ютксто аравтынек начальник, штобу седе парсте тевтнень ветямс. Аравтынек Долгон Васянь. Ломанесь покш, мазый. Вайгель эйсэнзэ покш. Ну, вот, кинь винтовка, кинь отрез, берданкат ды туинек, повняса, веть, сельмс нерькстак а неят. Лоткинек ташто ки лангс, — Мотай укстазевсь. Сон яходсь локшосонть, алашась яходсь пулосонзо. Но Мотай яла дерговтнесь поводсонть ды цяраесь [ 33 ]локшосонть, мейле таго ушодызе кортамонзо. — Срадынек роштятне ялга, аштитян, ойменэкак арасть. Аламос аштезь верьде появась ласте ломань. Кинть чирева валги велентень. Мельганзо валгить кавксоньгеменьшка ластеть. Минек эйстэ кемень ломанть куйсть вирьганть верев, песок яматнень вельксэс, остаткатне кадовсть теск. Вана уш пачкодсть корязонок. А аштевима саимизь. Вася макссь каманда, — „огонь“. — Минь прок азаргадынек. Ертовинек роштятнестэ, бандась каявсь песок яматненень. Тосто — каршо. Сынест а ков. Каявсть латконть трокс — Сухой кинтень. Ну, а кемат, вейкест пес безмалово путынек яма потмаксонтень. — Мотай а кемезь варштась Астакан лангс, — таго кортась, — Макингак, мерсть мартост ульнесь, эзь понгт ансяк. Вана сестэ максызь тень те алашанть. Доброй алашинесь. — Мотай стакасто таргсезь пильгензэ лоподезь севоньстэнть. Пильгалонзо шлебордсь севонь ведесь, цильсэ пурксевсь чамазонзо.
Астакан васня вансь Мотай лангс, мейле саизе койменть, кармась круг крайтнень кепсеме.
Чизэ тусь валгомав. Шешкевсь севонь кругось. Мотай шлизе алашанть, шлепадизе каряз ланга, мельс паросо рангстась:
— Эх, корминець, — пейдезь молсь Астаканнэнь.
— Парьсте жо аля течи роботынек. Вадря азор пельбутылка вина саевель бу ды закуска путоволь. — Пейдезь кортась Мотай.
— Аволь меша бу, — сизезь отвечась Астакан.
— А виде, синьдсынек нужанть. Осьминник сюром ули видезь, — пель сядо пондо саян. Вот, живи. Тон содат, — Мотай шлепадизе Астаканонь лавтов ланга. — Ульнесь чудной атя. Мольсь мелезэ нужадонть. Козейканстэнь мери: „Молян, муса нужанть ды маштса. Карматан ладнасто эрямо“. Тусь атясь. Знярс якась — а содан. Ансяк содан, сизесь, озась лей чирес, пештизе цилемензэ табакто — уски. Лиссь тензэ сэрей, човине ава. „Дай, келя, таргамс“, — пшкадсь те авась. Атясь [ 34 ]вадишкавтынзе пондакш сакалонзо, кевкстни: „тон кият“. Авась пшкадсь: „нужан“. Атясь радувась. Таргизе зепстэнзэ табак кирканть ды мери: „совак ды тоск таргак“. Нужась кирмицявсь ды — киркантень, атясь шлепадизе лангонть ды кудов. Эрямо кармась дива, кода сюпавсто. Весть сайсь мель ваномс парсте нужанть. Панжизе табак кирканть, нужась скок ды каськазонзо. Ие эзь юта. Атясь одов розорявсь. — Мотай арьсезевсь, чаравсь прясонзо ды пшкадсь: — те евкс, Астакан. — Астакан прась кунст ды раки. Мейле вансы, Мотай нусмакадсь, Астакан лоткась ракамодо, седейшкава кортазевсь:
— Эсь роботадонть башка мезеяк сюпав арась. Тон вана видить осьминник, пиреть путык, учат. Монень а мези учомс...
— Да, аля, те осьминникенть лангс видьстесь сатоць турезь. Кунсолат, евтнеса?
— Евтник ды ярсамо мольдяно, — отвечась Астакан.
— Тунда государствась максь тенек видьмекст. Макин велень промкссо мерьсь: „бедняктнэнень а максомс видьмекст. Сынст, келя, арась сексь сокавтост, видьмексэнть сэвсызь“. Промксов содат кить яксесть — сюпавтнэ. Истя ладизьгак. Вансынек: кальдявт тевтне. Сюронть улавсо ускить, видьмексткак, ярсамскак. Злодя, покойник, травимизь: „мезень кисэ, келя, верь валынек Советэнь властень кисэ!“ Сыреминек. Ведьгеменьшканек сыргинек утомонтень. Минек а нолдыть. Тевесь тусь колияс. Давай ирьдексэст ловномо. Сынь — ков понгсь. Секе неевтест. Мон вестнэнь экшс. Остатка сюронть зернань пес явшинек эсь ланганок. Истя видевсь осьминникесь. Кисэнэк милицият, волостев. Волисполкомонь председателесь Горбунов следствия тейсь. Парсте нать паньсиньзе. Минек нолдавтымизь ды эщо шнымизь. Недлянь ютазь чавизь алянть. Вана кода сатоць те сюрось, — Мотай укстась, нардызе чамастонзо ливезенть.
Астакан видемтизе рунгонзо, нежедсь койменть лангс, ве енов ванозь мерсь:
[ 35 ]— Вана истя пуромомс ды кравтомс вельсоветстэнть...
Мотай яходсь кедьсэнзэ. Астакан лангс апак ван, кортазевсь:
— Иля аля. Верьсэ пурксеват.
— Шляви.
— Иля. Стака тевесь. Центрав бу эйстэдест сермадомс, се тев. Кадык содавольть, кодат мошенникт тесэ, — аламос лоткась, пшкадсь:
— Од советэнь кочкамот теевельтькак, мон аштевлинь тонь кис бу. Кемат церась. Аволь аламо ютыть. Ды моньден башкаяк ламо кисэт аштевельть. Эсь ломань властьсэ улевель бу.
— Мон эщо одан, — кортась Астакан.
— Превет седе свежат.
— А сатыть.
— Заем теть макстан, — Мотай раказевсь. Мольсь ведь марто стойкантень шлямо. Терьдизе Астаканонь.
— Шляк, адя азоронтень ярсамо.
Астакан мольсь малазонзо. Кавнест кашт молезь пулькить ведьсэнть.
— Превеят жо, Мотай леляй, — витькстазь мерсь Астакан.
— Паргось монь аволь чаво, вана кедьтне катардовольть, а маштыть сермас. Улевель ломань эйстэн, — Мотай венстинзе каргодсь, пуворьксэв кедензэ. Сынь ульнесть эчк, сановт. Мейле рикстядинзе, евардынзе ведьсэ ды кавонест тусть обедамо.
Обедтэ мейле эрявсь анокстамс станокт ды урядамс кирпецтненень тарка. Астакан варштась: Мотай тантейстэ уды, эзизе стявто ды тусь ськамонзо. Сон мольсь, станоктнэнь ертынзе ведь марто стойканть, кундась таркань урядамо. Роботась а ломанень вийсэ, пластнэнь ланга дернанть капшазь ертсь, ливизесь ютась эчке коцтонь, лепес нававт панаронть пачк. Сон мезеньгак лангс апак вано, апак лотксе тейсь тевензэ. Ансяк, кода маризе, што чулксетить кедензэ, ды ловажатнеяк [ 36 ]ризныть, сон домкасто укстазевсь ды нежедсь неденть лангс, нолдызе прянзо.
Аламос оймамодо мейле одов капшазь кундас киргсеме лангонть. Сон мик весть эзь варшта окольцяванть ютыця ломантне лангс: роботась, ёртсь стака моданть Окольцяванть мешокке марто, карьнесэ мольсь Лена. Сон варштась меньдявозь Астакан лангс ды мольсь удалонзо. Лена аламос аштесь удалонзо кашт молезь. Астакан яла ертсь моданть.
— Астакан, — пшкадсь Лена, — оймсек аламос.
Астакан варштазевсь. Нардызе чамастонзо ливизенть, мольсь Лена вакс.
Лена кармась сокарямо зепканзо, мейле мызолдозь пшкадсь:
— Коть те коесь ютась, яла теке. Мон туинь велестэнть, аздан, кадован живстэ эли арась — те а содави. На теть кисет, каркс ды вана крест.
Астакан эзь пшкадев, аштесь таймаскадозь ды а чаркодема вановтсо вансь Ленань лангс.
Лена эзь учне, кода Астакан сайсыньзе казнетнень, кундась прязонзо крестонть оршавтомо, карксызе перьканзо раужо понань сурень лапужа карксонть. Кисетэнть шикадизе коморозонзо.
Лена эзь авардть, ансяк пек уш токавсь седеезэ, сеедстэ таргсесь оймензэ. Лена содась, што Астакан а вечксы сонзэ. Яла теке Лена вечкизе Астаканонь, ансяк эзь сато тейтеренть виезэ меремс: седейсэ вечктян... Лена кежеявтнесь эсь мелензэ лангс, кежеявтнесь эрямо чинзэ лангс. Сон лакась Астаканонь икеле, яла теке кирьдевсь. Мейле никнетезь ладсо пшкадсь:
— Кантлек эйсэст, Астакан, паряк а сави вастомс... ледстясамак...
Лена эщо месть бути кортыксэль, ваксозост мольсь Мотай, эщо малав апак пачкодть, кевкстьсь:
— Сыргить, Лена?
[ 37 ]— Эно, Мотай леляй, — сорновт вайгельсэ кортазевсь Лена.
— Васов пурныть-сэрьнить? — таго кевкстизе Мотай.
— Ков сельмен неить, ков пилен марить... паряк паро тевс понган...
Лена эщо весть чевте вановтсо варштась Астакан лангс ды курго потсо мерсь:
— Проштяйте, эряви сыргамс стамбарнэ. — Ды сон сыргась таркастонзо. Астакан кирвазезь седейсэ пшкадсь:
— Лена, а стувтса паро чить. Ламоксть велявтса казнеть, — ды ней эщо коморсонзо кирьдевть кисетэнть тонгизе зепезэнзэ. Лена лоткась ды апаргадозь кортазевсь:
— Аволь сень кис максынь, штобу пандовлить, — теке марто тусь.
Лена мольсь стамбарнэ. Вармась юхаесь кодазь пулонзо эйсэ. Чинть каршо черьтне цивтердсть. Сон мольсь ды яла теевсь седе алкинекс лы вишкинекс. Кода тусь уш васов, Астакан прок сыргойсь. Мелезэ ульнесь пижакадомс, рангстамс мезе ульсь виезэ. Сасамс Ленань ды евтамс мезеяк паро. Мейле варштась Мотай лангс, кона истяжо чатьмонезь вансь, кода Астаканонь лиякстомсь чамазо.
— Мекс монь эзимик стявто удомсто?
— Парсте матидевить, жаль марявить.
Астакан ертызе кедьстэнзэ койменть, каподизе станоконть ды чатьмонезь кармась кирьпецень тейнеме.
Сынь роботасть чатьмонезь. Мотай вырновтызе станоконть, кежевстэ пшкадсь:
— Пандя, Астакан. Дворецт а нажувавить, — озась тейсь цигарка. Астакан новольсь ваксозонзо.
Чись кеверсь пандонть экшес. Севонь пандось сулейсэнзэ копачизе веленть. Пувась экше чевте кошт.
Васолдо пандонть прясто сыть ават. Зярдо пачкодсть седе малав, Мотай кортазевсь:
[ 38 ]— Игаевень кочкицянзо сыть, — сонсь пувизе цигаркастонть куловонть. Астакан нузялдозь варштась. Вансь ды мезеяк эзь ней. Сон нартниньзе сельмензэ, таго варштась.
— Мотай варштыть сельмен, сокоргадынь, — Астакан велявсь Мотай енов. Мотай евардыньзе севонев кедензэ, кундась сельтнень ванномо.
Друг нолдынзе кедензэ, чувтомсь Астакан икелев. Эзь кеме эстензэ, эзь пшкатькак.
— Мекс а кортат?
— Асодан мезе сельмсэт. Вана пачкодить видезэнэк аватне, — вансызь, — жалязь отвечайсь Мотай.
Аватне севнозь, шалнозь яла шашсть малав, вейке ава сехте пек пижнесь:
— Вачо уш кияк а карми тензэ роботамо!
Мигай мольсь аватнень удало. Сонензэ кургонь автемс шка эзть макстне аватне. Весе кежест чинь-чоп ютавтызь лангозонзо.
— Ават, садояк тей, — яходсь кедсэнзэ Мотай.
— Мезе теевсь?! — Раксезь мольсть аватне.
— Вана Астаканонь сельмензэ лоткасть неемадо,
Вейке ава мольсь, илиштиньзе сельме керьтнень, чаравсь прясонзо ды пшкадсь:
— Верь, ялакскемь, сельмет валыньзе, — авась варштась кувалманзо ды сыргасть.
— Кинь бути те церась? Кодамо мазый, шубра...
— Я, ды Пилаень братозо. Эли аздасак. Аволь умок сась...
Кортнезь дивсезь тусть аватне. Мотай мольсь Астакан вакс, кундызе кедьте ды пшадсь:
— Мезть, Астакан? Адя кудов.
Астакан веньстизе кедензэ. Ризназь пшкадсь:
— Адя. Сельмен кармасть сянгордомо. Эх... одсто сокоргадан...
Стамбарнэ сыргасть кудов.